Vergeet agter

LAASTE WEEK WOORD VIR 2019

Filippense 3:14: "Maar een ding: ek vergeet die dinge wat agter is en strek my uit na wat voor is, en jaag na die doel om die prys te verkry van die hoë roeping van God in Christus Jesus."

Hier aan die einde van nog 'n jaar, is baie van ons geneig om te wil terugkyk na alles wat die afgelope jaar gebeur het, en snaaks genoeg, veral daardie dinge wat negatief was, of ons sleg laat voel het, of ons afgetrek het.

Tog kan ons bemoediging ontvang uit die woorde van hierdie vers. Maar dan moet ons leer om vir onsself toe te eien wat Paulus onder leiding van die Heilige Gees ons hier op attent wil maak.

Ek merk dadelik op dat Paulus sê: "Ek VERGEET die dinge wat agter is..."  En die rede waarom ons dit moet leer doen, is omdat satan juis daardie dinge wat in ons verlede gebeur het, of die afgelope jaar gebeur het, wat sleg en nagtief was, teen ons kan en wil en sal gebruik as ons hom nie weerstaan nie.

Want ons moet altyd onthou satan ken die Bybel beter as baie van ons gelowiges, en hy weet ook wat bepaal Lukas 9:62, naamlik:"En Jesus antwoord hom: Niemand wat sy hand aan die ploeg slaan en agtertoe kyk, is geskik vir die koninkryk van God nie."

En juis daarom sal satan sy bes doen om gedagtes in ons koppe te plaas oor al die negatiewe of slegte goed wat die afgelope jaar met ons gebeur het, juis sodat ons nie geskik sal wees vir die koninkryk van God nie.

Kyk gerus na my volledige YouTube video oor: "Kingdom equals Authority" om die werklike implikasie van hierdie teksvers te besef.  (https://youtu.be/MMCMQG5jS50)

Daarteenoor lees ons in Jeremia 29:11 wat God se gedagtes vir ons is, naamlik: "Want Ék weet watter gedagtes Ek aangaande julle koester, spreek die HERE, gedagtes van vrede en nie van onheil nie, om julle ‘n hoopvolle toekoms te gee."

Kom ons maak hierdie week 'n doelbewuste besluit om dit wat agter is, te vergeet, en om elkeen self ook die doel na te jaag om die prys te verkry van die hoë roeping van God in Christus Jesus. En daardie prys lê beslis nie in ons verlede, of die dinge wat reeds afgehandel is nie, dit lê in daardie hoopvolle toekoms wat God vir ons het.

Mag ons Here Jesus Christus jou en jou gesin seën in hierdie week en die volgende paar weke, totdat  ons weer met mekaar korrespondeer vroeg in 2020, indien Jesus nog talm om te kom, en die Here wil en ons lewe.

(NS: Vir diegene wat daarmee gekonfronteer gaan word, en antwoorde nodig mag hê vir vriende en familie, hier is die skakel na my YouTube video van: "The Christmas Lie" (https://youtu.be/2L-kgIUOew0)

GEBED: 

"Vader, leer my asseblief om die dinge wat hierdie afgelope jaar gebeur het te vergeet, en om myself ook uit te strek na voor, om die doel na te jaag om die prys te verkry van die hoë roeping van God in Christus Jesus. Help my om 'n voorbeeld te wees vir andere, as iemand wat nie bly tob en vasgeketting bly aan die seer en mislukkings en negatiwiteit van die verlede nie. In Jesus Naam. Amen."

 Geskryf deur: tiaan gildenhuys
(tg@oicb.co.za)

Vloek

Ek haal  Keith L. Brooks aan:

"’n Jongman was ’n groot vloeker, maar dit het hom nie gehinder nie. Hy trou toe met ’n pragtige Christen meisie. Daarna begin hy sy vloekgewoonte in ’n ander lig sien en probeer hy om dit af te leer.

Een oggend, voor hulle sou kerk toe gaan, staan hy en skeer. Hy sny hom raak. Voor hy homself kon keer roep hy ergerlik uit: ”God!” Toe eers sien hy hoe sy vierjarige dogtertjie, pop in die arms, vir hom staan en kyk.

Sy sit haar pop neer en kyk met vonkelende ogies rond in die badkamer. “Is God hier?” vra sy opgewonde. Die man word rooi in die gesig en skaam vra hy: “Hoe­kom vra jy so?” “Ek het gedink God is hier want ek het gehoor Pappa praat met Hom.” Sy sien die ont­nugterde uitdrukking op sy gesig. “Roep Hom weer, Pappa. Ek weet Hy sal kom as Pappa Hom roep.”

Die kindjie se woorde sny diep in sy hart in. Hy tel haar op in sy arms en met ’n snik druk hy haar teen hom vas en vir die eerste keer roep hy regtig tot God, om hom te vergewe en hom Sy kind te maak en hom te help om soos ’n Chris­ten te lewe. In daar­die oomblik het hy vry geword van sy vloek­ge­woonte. Saam met sy vrou het hy ’n toegewyde Christen geword."

Wanneer ons in gesprek is, elke dag, enige dag, enige gesprek, en daar glip ‘n vloekwoord uit, is dit soos wanneer jy ‘n brief skryf en dit is vol kladmerke.

Die ergste vloekwoord wat ons egter ooit kan gebruik, is om die naam van die Almagtige God Yahweh of sy seun Jesus Christus te MISBRUIK as ‘n vloekwoord. Hoe durf ons die Naam as ‘n vloekwoord gebruik! Die Naam wat vir my en jou sondes gesterf het word deesdae sommer as ‘n “werkwoord” gebruik!

Die woord van God praat genoeg met ons oor die gebruik van onder andere vuil taal. Lyk vir my dit was in die tyd van die apostels ook ‘n groot problem gewees.

In meer as een sendbrief van die apostels spreek hulle die probleem van kwaad word en vloek aan.

Efesiërs 4:29 Laat daar geen vuil woord uit julle mond uitgaan nie, maar net ‘n woord wat goed is vir die nodige stigting, sodat dit genade kan gee aan die wat dit hoor.
Kolossense 3:8 Maar nou moet julle ook dit alles aflê, naamlik toorn, woede, boosheid, laster, skandelike taal uit julle mond.

Gelukkig stel Jakobus ons gemoed gerus met bemoedigende woorde as hy die mag van ons tonge beskryf. Ons struikel ALMAL elke dag want niemand van ons is volmaak nie.

Jakobus 3:2 Want ons almal struikel dikwels. As iemand in woorde nie struikel nie, is hy ‘n volmaakte man, in staat om ook die hele liggaam in toom te hou.

As ons meen dat ons nie struikel nie, tree die sonde sommer dadelik weer in in die vorm van lieg op…

1 Johannes 1:8 As ons sê dat ons geen sonde het nie, mislei ons onsself en die waarheid is nie in ons nie.

Elke keer as iemand vloek, is dit vir my persoonlik soos ‘n mes wat in my hart steek, nie eers te praat van laster nie... maar onder leiding van die Heilige Gees kan ons die persoon reghelp met lankmoedigheid en liefde. Glo my, jy word skeef uitgekyk en afgejak.

Selfs as dit kom by iets soos vloek, kan ons nou maar weer lekker argumenteer daaroor.

"Maar Hein, dis nie vloek nie, dis ‘n werkwoord. Ag Hein, dit beteken iets anders in ‘n ander taal. Hein, hou op so erg wees, dis net ‘n sê-ding. Almal sê dit. Dit staan in die Bybel (verwysing na o.a. Daniel 10:6 en Lukas 10:18) so ek kan dit sê. Hein, sy/hy maak my SO kwaad, toe glip dit uit! Maar Hein, ek vloek al so lank en kan nie ophou nie, maar ek vloek darem al minder."

Jy lieg vir jouself. Filippense 4:13 sê “Ek is tot alles in staat deur Christus wat my krag gee”, so ja, ek KAN ophou vloek.

Geliefdes, ons moet by ‘n punt kom waar selfs vloek as absolute gruwel beskou word, want dit is beslis vir God ‘n gruwel.

Lukas 16:15 En Hy het vir hulle gesê: Dit is julle wat julself regverdig voor die mense, maar God ken julle harte; want wat by die mens hoog geag word, is ‘n gruwel voor God.

Vloek vandag is baie beslis ‘n voorstaander by die wêreld en word baie "hoog geag".

Ek waarsku jou vandag geliefde, vloek is vir God ‘n gruwel. Hou op daarmee!

Gebed:

"Vader, in die naam van Jesus Christus kom ek vandag voor U troon en bely dat ek ‘n sondige tong in my mond het. U het my in geheel geskape, volmaak, insluitend my tong, so daar is geen rede hoekom ek dit nie in toom kan hou nie. Ek vra asb dat U nou my tong sal seën dat die misbruik van enige woord wat enigsins dalk en selfs net miskien as vloek kan uitglip, en dat U my sal beskerm daarteen sodat ek net sal spreek wat goed is in U oë.
In Jesus Naam
Amen."


Geskryf deur: hein henning
(heinh@sunlightfs.co.za)

Tabernakel Bedieninge se afsluit datum 2019

As dit God behaag, en Jesus vertoef om te kom, sluit Tabernakel Bedieninge se kantoor vanaf 20 Desember 2019 tot en met 10 Januarie 2020 vir berading.

Indien U nog 'n afspraak wil maak vir hierdie jaar, kontak my gerus.

(Kantoor - in Krugersdorp)
0788338915
belindapaar@gmail.com

Musiek vingers

In een van my 'ek-tyd' oomblikke, terwyl ek wag vir 'n vergadering, tussen al die geraas van die beton-oerwoud en publieke klets, besluit ek om te gaan soek vir 'n klassieke klavierstuk op die internet. Ek het my slimfoon by my; en die 'classics', saam met my hemelse taal, het my nog altyd gehelp rustiger word vir 'n groter fokus. YouTube is nie net sleg nie. Daar is goeie goed ook.

Ek kry toe 'n stuk. Dit is nuut en vars, en ook iets, wat ek nog nie voorheen gehoor het nie. ['A Breathtaking Piano Piece' by Jervy Hou]

In my vreemde verbasing, terwyl ek rustig na die kunstenaar luister, hoor ek myself hardop dink. Ek bedoel, regtig hardop. My skerpsinnige brein is altyd wakker en ek hou nogal daarvan, om geestelike parallelle te trek met nuwe konsepte. Ek kry toe die volgende mediterende gedagte: 'Kan jy vir jouself indink, hoe dit moet voel, om só 'n mooi solo stuk te kan speel, sonder daardie baie belangrike en nodige regterduim, waaraan jy so gewoond geraak het? Jy weet jy hét hom nodig en hy was nog atyd jou konstante metgesel. Vir die perfekste afronding tot 'n meesterstuk, kan jy nie sonder hom nie, nie waar nie?'

Terwyl die strelende musiek in my ore afstuit, formuleer my gedagtes die volgende realiteit: 'God, die Maestro, is heeltyd sorgvuldig besig, om vir JOU in 'n finale meesterstuk te omskep en Hy het egter ook jou liggaam en al jou fakulteite nodig vir 'n goeie afronding. Uit Sy mooi musiek skepping, moet JY uiteindelik vir Hom kan reflekteer. Soos Vader - soos seun.

En dan wanneer jy nou 'n giftige infeksie in jou regterduim opgetel het, weens 'n Sakspinnekop wat jou bygekom het, toe jy nie jou hand in spinnekop neste moes indruk nie, het dit jou klassieke speel-vermoë geweldig belemmer. Weet jy wat hierdie spinnekop aan jou kan doen? Die gif verteer weefsel.


Jy kan nie meer daardie musiek hand gebruik, soos jy dit altyd voorheen gedoen het nie. Met baie moeite en ook 'n bygevoegde frustrasie tot jou repertoire, probeer jy kompenseer tot jou nuwe disfunksie en probeer jy 'aanpas' tot die bestaande musiek stuk, maar in realiteit, klink dit net nie meer dieselfde nie.

Die note is af en net niks 'vloei' nie. Die harmonisering is uit en jou tempo 'raas', want jy raak al hoe meer angstig en verbouereerd, want jou optrede is nie meer 'n seën tot ander nie en die verleentheid vir jou en vir ander, raak net groter by die dag. Jy 'hap' selfs nou al na die wat naby jou is, veral na die een, wat in jou skoot lê.

Die parallel: Só werk die spinnekop gif van bitterheid en onvergewings gesindheid ook. Indien daar dan nie spoedig mee gedeel word en kwytskelding en vryspraak word gegee nie, gaan 'n duim binnekort geamputeer moet word. En dit het weer die vermoë, om vir jou 'n moontlike musiek loopbaan te kos.

Intussen gaan jou musiek optrede, baie moeilik 'n salwing op die ore van luisteraars kan wees. Die YouTube 'video knipsel van jou lewe', gaan minder mense wil kyk en God gaan minder 'hits' of 'likes' of erkenning kry vir die afronding en finale produksie. Daar gaan geen staande ovasie kan wees nie. Hoe gaan JOU getuienis nou lyk? En wat moet mense van die Musiek Hoof dink?

Die ware realiteit is; Jy sal nooit in hierdie lewe of in die volgende, enige vergelding kan kry, deur SELF die advokaat, die regter of laksman te wil wees, aan die wat jou verwond en teleurgestel het nie. Dit is egter God  se werk. Laat hulle net GAAN. Vergewe en spreek vry.

God kan net in jou VERANDER, wat jy aan Hom kan OORGEE. Gee vir Hom daardie seer regterduim en laat Hom toe, om jou Sterkte en Waagmoed te wees in hierdie vryspraak reis. Jy kan dit nie sonder Hom doen nie, omdat dit bonatuurlik is. MAAK die keuse en God sal die werk in jou begin. Sy Naam is 'Getrou'.

God bevestig altyd Sy Woord aan my op kosbare maniere en nieteenstaande, dat daar menigde, goeie Skrifte oor vergifnis is, was ek gelei na Prediker 10:10 wat sê: 'As die yster [gereedskapstuk] stomp geword het [weens bitterheid] en 'n mens die snykant nie geslyp het nie [bekeer], moet hy die kragte meer inspan..' [God se planne in jou lewe, word gefrustreer]

Gun my om te sê, dat vanaf ek ook hierdie gelowige sprong gevat het tot finale vryspraak teenoor my skuldenaars; nou van die mooiste en geharmoniseerde klanke uit my eie geneesde regterduim vloei! Alle eer en lof aan my Dirigent.


Gebed:

"Vader, my God; gee my die WIL, om gehoorsaam te wees aan U opdrag om te vergewe, asb. U weet, dit kom nie sommer maklik vir ons mense-kinders nie. Maak my 'n musiek instrument, waarop U trots kan wees. Amen."

 Geskryf deur: hennie van der westhuizen
(info@paragonlife.co.za)

Ydel woorde

Efesiërs 5:6-8: "Laat niemand julle met ydel woorde verlei nie, want daardeur kom die toorn van God oor die kinders van die ongehoorsaamheid. Wees dan nie hulle deelgenote nie. Want vroeër was julle duisternis, maar nou is julle lig in die Here - wandel soos kinders van die lig."

Ons teksverse hierdie week, bevat 'n belangrike waarskuwing en ook bekangrike opdragte waarna ons moet kyk.

Die waarskuwing is dat niemand ons met "ydel woorde" moet verlei nie, want daardeur kom God se toorn oor die kinders van die ongehoorsaamheid. Die Griekse woord vir "ydel", beteken ook  "leë" of "nietige". En ons moet ook nie deelgenote daarvan word nie, met ander woorde ons moet nie daaraan deelneem nie.

In kort beteken dit niks anders dat ons nie tyd moet mors in ons daaglikse omgang met "leë" of "nietige" gesprekke nie.

Wat sou dalk leë of nietige gesprekke daarstel?

Die antwoord kry ons in die laaste gedeeltes van die teksverse wat ek aangehaal het. En dit is dat ons vroeër in duisternis gewandel het, maar nou deel is van die lig van die Here. Daarom moet ons wandel soos kinders van die lig en in die lig van die Here.

En as kinders van die lig wat wandel in die lig van die Here, laat ons ons nie meer "verlei met ydel woorde" nie.

Ons kan dus nie meer deelneem aan die "kringe van spotters" (Psalm 1:1) by die werk of tussen vriende nie.

Ons kan nie meer deelneem aan ydele gesprekke vol van skinder nie.

Ons kan nie meer deelgenote wees aan leë vuil grappies of 'n gevloek en skel nie.

Nee, ons woorde moet woorde wees wat hulle oorsprong het in die lig van Jesus Christus, wat diegene rondom ons sal stig, opbou en bemoedig. Spreuke 25:11 leer dat ons woorde moet wees soos goue appels op versierde skinkborde.

Mag die Here Jesus ons in hierdie week aanraak deur Sy Heilige Gees om ons nie te laat verlei deur mense rondom ons se ydele woorde nie, maar om van ons kant af die lig van Jesus vir hulle te laat skyn.


GEBED: 

"Vader, leer my in hierdie week om my nie te laat verlei deur die ydele woorde van mense rondom my nie, maar dat ek sal wandel as 'n kind van die lig, wat die lig van Jesus Christus laat skyn vir almal rondom my. In Jesus Naam. Amen."

 Geskryf deur: tiaan gildenhuys
(tg@oicb.co.za)

Julle vra verkeerd!

Baie kinders van die Here worstel met die kwessie van sogenaamde “onbeantwoorde gebede” en is dit vir ons moeilik om te verstaan dat as God dan ons hemelse Pappa is, hoekom antwoord Hy nie ons gebede nie? Dit is egter wel moontlik dat ons met die verkeerde gesindheid of motief in ons hart kan vra en dan nie ontvang volgens wat ons begeer het nie.

Jak 4:3  Julle bid en julle ontvang nie, omdat julle verkeerd bid, om dit in julle welluste deur te bring.

Tog lees ek in die Bybel van mense soos Elia, Josua, Hiskia ens., wie  vir sekere dinge gebid het en hulle het dit ontvang. Een van die treffendste dele wat my onlangs weer opgeval het, is die deel waar Josua gevra het dat die son moet stilstaan, en dit het. Hy het letterlik die skepping op sy kop laat staan, net om sy doel te kon bereik om die vyand te verslaan.

Jos 10:12  Toe het Josua met die HERE gespreek, op die dag dat die HERE die Amoriete aan die kinders van Israel oorgegee het, en voor die oë van Israel gesê: Son, staan stil in Gíbeon, en maan, in die dal van Ajalon!
Jos 10:13  Toe staan die son stil en bly die maan staan totdat die volk hulle gewreek het op hul vyande. Staan dit nie geskrywe in die Boek van die Opregte nie? En die son het bly staan in die middel van die hemel en het hom nie gehaas om onder te gaan nie, omtrent ‘n volle dag.

Ons lees van Elia wat gebid het dat dit nie moet reën vir drie en 'n half jaar nie en toe later weer bid op Karmel... en dit het begin reën. Op 'n ander geleentheid vra hy twee keer vuur uit die hemel uit en dit verbrand elke keer die koning se soldate wat gestuur is om hom te kom gevange neem.

Tog sê die Bybel duidelik dat hy 'n mens was net soos ons!

Só wat het hierdie manne gehad of geweet wat ons in vandag se tye die kol laat mis?


Ook lees ons dat Jesus sê dat alles wat ons in Sy Naam vra, sal ons ontvang.

Joh 14:13  En wat julle ook al in my Naam mag vra, dit sal Ek doen, sodat die Vader in die Seun verheerlik kan word.
Joh 14:14  As julle iets in my Naam vra, sal Ek dit doen.

Joh 15:16  Julle het My nie uitverkies nie, maar Ek het julle uitverkies en julle aangestel om vrug te gaan dra en dat julle vrug kan bly, sodat wat julle die Vader ook al in my Naam vra, Hy julle dit kan gee.

Soos ek deur hierdie gedeeltes in die Bybel lees, is ek oortuig dat al hierdie mense 'n ware en opregte verhouding met die lewende God gehad het en dat hulle Hom nie beperk het in dit wat hulle wou gehad het nie. Dikwels is ons geneig om te “klein” te vra en sit ons God in die beperkinge van ons eie denke se boksies. Tog sê die Bybel dat niks by God onmoontlik sal wees nie!

Luk 1:37  Want geen ding sal by God onmoontlik wees nie.

Ek weet ook dat God geen aannemer van die persoon is nie en dat wat Hy vir hulle gedoen het, Hy ook in gelyke dele vir my sal doen!

Hand 10:34  En Petrus het sy mond geopen en gesê: Ek sien waarlik dat God geen aannemer van die persoon is nie,

Kom ons laat God God wees wanneer ons tot Hom nader in gebed en kom ons maak seker dat ons werklik 'n diep en intieme verhouding met Hom het, sodat ons ook kan glo dat ons sal ontvang wat ons
VOLGENS SY WIL vra.


GEBED:

"Vader ek bely dat ek U baie kere beperk in die dinge wat ek in gebed van U vra...vergewe my daarvoor. Help my om werklik 'n intieme verhouding met U te hê en om U toe te laat om volgens U wil te gee wat ek ookal nodig mag hê...amen!"


Geskryf deur: ernest phillipson
(ecp@oicb.co.za)

Waar water is, is daar LEWE

Ons persepsies

Dit is weer Somer. Die kinders wil swem en met 'n swembad, wat grens aan 'n grasperk en bome, raak die onderhoud nou 'n daaglikse instelling. Nodeloos om te sê - 'n frustrasie ook. Maar, dis wat jy wil doen, as jy die vrolike klanke van gelukkige kinders, elke dag wil hoor in jou besige grootmens wêreld.

Waar water is, is daar LEWE.

Verlede week maak ek toe weer swembad skoon. Na honderde ure van 'pool-boy' speel met 'n visnet aan 'n lang stok, het ek uiteindelik toe slimmer geword en een van GloMail se puik uitvindsels aangeskaf, wat jy aan die uitlaat van die swembad pomp verbind en hy doen sommer al die harde werk vìr jou. Die beste R400-belegging ooit.

Een keer 'n week, skud jy net hierdie flottasie toestel se sykous uit van al die swerwende blare en gras, wat die seuns in die swembad ingetrap het en hey...
'Bob's-your-uncle.'

Nietemin, hierdie week wou my 'sykous' geen blare vang nie. Na verdere ondersoek vind ek toe uit, dat die pomp nie meer alles so lekker suig nie. Met genoeg deursettings vermoë, soek ek die probleem deur die 'wet-van-uitskakeling'.

Diagnose: Dit was toe die swembad filter, wat tot oorlopens toe vuil en verstop was. Geen water kom meer deur nie. Die operasie staan. As die kalf nie nou uit die put gered word nie, sit ek weer met groter uitdagings, soos groen alge en melkbaddens. Of dikbêk kinders, wat nie kan swem nie en geen vrolike geluide vanaf die agterplaas nie.


Terwyl ek die filter sorgvuldig skoonmaak, praat my Here met my. Hy maak my toe verstaan, dat ek ook nog 'persepsie filters' het, wat vuil is en ook Sy 'vloei van lewende water' deur my na ander, staak en verhoed om te vloei. Waar daar vloeiende water is, is daar mos lewe, nie waar nie? Wanneer water stilstaan en daar is geen natuurlike vloei nie, kan dit sleg en onbruikbaar word.

In daardie oomblikke, berispe Abba my toe sagkens met die woorde: 'Ek kan soveel MEER deur jou doen, My seun, as jy My nie beperk met jou besmette persepsies nie. Jy moet filters skoonmaak, My kind. Anders sit jy binnekort met groen alge in jou verwysing van wie Ek IS en ook, wie Ek vir jou wil wees, en jy gaan ook ander behandel, sonder My liefde, genade en wysheid. Jou visie gaan 'melkerig' word en jy gaan nie meer My waarhede kan raaksien, vir wat dit werd is nie. Gee jou filters. Ek sal dit skoonmaak.'

God is goed en soos altyd, het Hy Sy ewige Woord aan my kom bevestig met Spreuke 23:7 wat sê: 'Want soos die mens in sy siel [sy filters] bereken, so IS hy.'

Gun my om te sê, dat ek nog steeds 'n 'goeie werk in proses is' en Sy genade is genoeg.

Gebed:

"Vader, ek bid dat U my altyd leerbaar sal hou. Ek bid, dat U meer kan verander in my, wat ek kan erken. Vergewe my, vir my vuil filters, Vader. Ek gee U my filters om skoon te maak. Ek gee oor. Verander ook my realiteite daardeur, Here. Ek kies LEWE."

 Geskryf deur: hennie van der westhuizen
(info@paragonlife.co.za)

Geen veroordeling

Romeine 8:1: "Daar is dan nou geen veroordeling vir die wat in Christus Jesus is nie, vir die wat nie na die vlees wandel nie, maar na die Gees."

Hierdie is een van daardie wonderlike teksverse in die Bybel om werklik op 'n daaglikse basis ons eie te maak.

As ons weet dat ons Jesus Christus aangeneem het volgens Johannes 1:12,13, en dat ons Hom met ons mond bely het en glo dat God Hom uit die dood opgewek het, volgens Romeine 10:9,10, en Hom gevra het om ons te lei deur Sy Heilige Gees, volgens Romeine 8:14, dan bevind ons onsself IN Christus Jesus.

En as ons onsself IN Christus Jesus bevind, en gelei word deur Sy Heilige Gees, dan is daar GEEN veroordeling vir ons nie.


Maar terselfdertyd moet ons nie die voorwaarde in daardie teksvers, mislees nie. Daar is geen veroordeling vir die wat in Christus Jesus is nie, vir die WAT NIE NA DIE VLEES WANDEL NIE, maar na die Gees.

As ek myself dus 'n kind van God noem, maar willens en wetens aanhou sondig en die dinge van die vlees soek en najaag, kan ek nie aanspraak maak daarop dat daar vir my geen veroordeling sal wees nie.  Daar is slegs geen veroordeling, as ek IN Christus Jesus is EN na die Gees wandel, met ander woorde, onder leiding van Sy Heilige Gees, soos Romeine 8:14 ons wys.

Kom ons vra dus ons Hemelse Vader om ons in hierdie week in elke moontlike situasie te lei deur Sy Heilige Gees, sodat ons nie sal wandel deur die vlees nie, maar deur die Gees. Want dan kan ek weet sal daar vir my geen veroordeling wees nie.


GEBED: 

"Vader, baie dankie dat ek mag weet dat as ek IN Christus Jesus is, en wandel deur die Gees, daar vir my geen veroordeling sal wees nie. Lei my en leer my in hierdie week om die dinge van die vlees te weerstaan op 'n daaglikse basis sodat ek kan weet daar is dan vir my ook geen veroordeling nie. In Jesus Naam. Amen."

 Geskryf deur: tiaan gildenhuys
(tg@oicb.co.za)

Jou onreinheid

Nadat die vyand weer die afgelope week probeer het om my vorige onreinheid teen my kop te gooi en my deur 'n gelowige boeta probeer oortuig het dat ek nogsteeds skuldig staan voor die Here, het Vader my weer op verskeie maniere herinner dat ek reeds deur Sy bloed gewas is en dat daar geen skuldbrief teen my uitstaande is vir die sonde van die verlede wat ek reeds teenoor Hom bely het nie. Dit het ek natuurlik ook geweet en het ek die aantygings met 'n “heilige woede” verwerp!

Ek het egter in hierdie laaste jaar sóveel mense bedien wie hulself nie kan vryspreek of aanvaar dat Vader hulle vergewe het nie. Tog kom hulle aan die einde van elke sessie tot besef dat die vyand hulle net gebind wil hou en neem hulle die besluit om hulself te vergewe. Wanneer ek hulle lei in gebed en by die deel kom waar hulle hulself by die naam moet vryspreek, dan sukkel sommige só om hul eie naam te noem dat dit soms 'n rukkie vat om dit uit te kry.

Tog is dit juis ons onreinheid wat vir ons 'n pad oopmaak reguit na Jesus toe indien ons bereid is om ons sondes na Hom te bring dat Hy ons in Sy bloed kan was.

Vader het my konstant herinner aan die vrou met die bloedvloeiing wie se onreinheid juis vir haar 'n pad oopgemaak het tot by Jesus.

Mat 9:20  En daar het ‘n vrou wat twaalf jaar lank aan bloedvloeiing gely het, van agter gekom en die soom van sy kleed aangeraak.
Mat 9:21  Want sy het by haarself gesê: As ek maar net sy kleed kan aanraak, sal ek gesond word.
Mat 9:22  En Jesus het omgedraai en haar gesien en gesê: Hou goeie moed, dogter, jou geloof het jou gered. En die vrou het gesond geword van daardie uur af.

In daardie tyd was daar 'n wet wat bepaal het dat as 'n vrou in haar tyd van maandstonde was, dat sy dan onrein is totdat dit verby is en sy haarself gereinig het. Alles waaraan sy sou vat sou ook onrein wees en enige iemand wat haar sou aanraak sou ook onrein word. Die wet was dan ook dat indien enige iemand onrein sou wees as gevolg van watter rede ookal, hulle hardop moes verklaar dat hulle onrein is wanneer hulle in die openbaar beweeg het of as iemand naby aan hul sou kom.

Vir hierdie vrou om dus deur die skare te kon kom tot by Jesus, moes sy haar onreinheid bekend maak, anders sou hulle haar doodgemaak het as dit bedek was en later op die lappe sou kom. Sy het verder ook nie die liggaamskrag gehad om deur die skare te kon stoei om naby Jesus te kom nie. Haar onreinheid het dus vir haar 'n pad oopgemaak reguit na Jesus toe en in geloof het sy toe haar genesing ontvang soos sy geglo het.

Ek wil dus vandag elkeen uitnooi wié nog stoei met vorige sondes of wié homself/haarself nie kan vryspreek vir vorige dinge nie, om daardie dinge na Jesus toe te bring en jou genesing te ontvang dat jy kan vrykom van die leuens van die vyand. Die Bybel is duidelik dat God nie meer aan jou sondes dink as Hy dit vergewe het nie, só waarom laat jy die vyand toe om jou daaraan te herinner?

1Joh 1:9  As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig.

Heb 8:12  Want Ek sal barmhartig wees oor hulle ongeregtighede en aan hulle sondes en hulle oortredinge nooit meer dink nie.

1Joh 1:7  Maar as ons in die lig wandel soos Hy in die lig is, dan het ons gemeenskap met mekaar; en die bloed van Jesus Christus, sy Seun, reinig ons van alle sonde.


 GEBED: 
Here Jesus, baie dankie vir U genade wat só ontsettend groot is vir ons dat U die vorige sondes selfs nie eers onthou nie. Kom help elkeen van ons om in die lig te wandel deur U genade te aanvaar sodat ons ook onsself kan vergeef soos wat U reeds gedoen het...amen!


Geskryf deur: ernest phillipson
(ecp@oicb.co.za)

Hoe lank moet ek nog uithou?

Wanneer kom die einde van my probleme?

Rom 12:2  En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is. 

Ons almal gaan deur verdrukking en soms verstaan ons nie waarom God ons nie help nie. Dieselfde het gebeur met Hosea. Sy vrou was 'n prostituut en alhoewel hy baie lief was vir haar, kon hy nie verstaan waarom God vir hom gesê het om met haar te trou, as God geweet het dat hy so seer gaan kry in sy huwelik nie.

Gomer, sy vrou sou verkoop word as slaafin, en uiteindelik kon hy haar loskoop en haar lewe red. Hy kon haar terugneem na sy huis waar sy, sy vrou kon wees, en nie sy slaaf nie.

Hosea het nooit opgehou met sy bediening nie, ten spyte van die feit dat hy binne hom baie seer gehad het, en ten spyte van die feit dat hy God se weë nie verstaan het nie. Hy het aangehou om vir sy vrou te bid, om vir God te vra om hom te help, en op die einde het hy as oorwinnaar gestaan omdat God sy gebede gehoor het, sy hart gesien het, sy deursettingsvermoë raakgesien het, en toe sy gebede verhoor het.

Ons verstaan nie altyd hoekom goed met ons gebeur nie, maar een ding is verseker! Met God werk alles ten goede mee.

As dit altyd goed gaan met ons, het ons God nie nodig nie, kan ons God nie in aksie sien nie, kan ons Hom nie verhoog nie, nie dank nie, nie prys nie. God weet hoe om ons desperaat te maak vir Hom, hoe om Sy leiding te vra, sodat ons God se grootheid, liefde en almag kan sien, daarom se Paulus vir ons wees in alles dankbaar!

God het die perfekte tyd vir alles, al kan ons dit nie verstaan nie, God weet ook hoe sterk Hy jou gemaak het, hoe lank jy sal kan uithou en volhard, Hy sal jou nooit bo jou vermoë toets nie. Moet nooit moed opgee nie, hou aan om op God te vertrou vir die beste uitweg in jou lewe, want Hy het die perfekte plan vir jou, as jy net kan wag om dit te sien en beleef.

Sëenwense
Belinda

Rom 5:3  En nie alleen dit nie, maar ons roem ook in die verdrukkinge, omdat ons weet dat die verdrukking lydsaamheid werk,

5:4  en die lydsaamheid beproefdheid en die beproefdheid hoop;

5:5  en die hoop beskaam nie, omdat die liefde van God in ons harte uitgestort is deur die Heilige Gees wat aan ons gegee is.

5:6  Want toe ons nog swak was, het Christus op die regte tyd vir die goddelose gesterwe.

Dors na die Woord

Amos 8:11: "Kyk, daar kom dae, spreek die Here HERE, dat Ek 'n honger in die land stuur, nie 'n honger na brood nie en nie 'n dors na water nie, maar om die woorde van die HERE te hoor."

Mense vra my gereeld wat sien ek is besig om in die geestelike te gebeur, soos wat ons deur Suid Afrika en ander lande reis om te bedien? En dan is my antwoord gereeld dat ek Amos 8:11 rondom my sien gebeur.

Want daar is orals 'n honger om die woorde van die Here te hoor, selfs op plekke waar mense soms nie eens kos het om te eet of water het om te drink nie.  Duidelik het hulle geleer dat fisiese kos en water hulle niks kan help in die ewigheid nie, maar die woorde van die Here bring vir hulle ewige redding. Dit is iets wat nie bereken kan word of enige fisiese of monetêre waarde aan gekoppel kan word nie.

Ek sien ook al hoe meer die werklikheid van wat Jesus gespreek het in Mattheus 5:6:
"Salig is die wat honger en dors na die geregtigheid, want hulle sal versadig word."

Geregtigheid is in gewone taal, God se manier van dinge doen. Ek sien ook hoe mense in hulle gewone lewens begin honger en dors na God se manier van dinge doen, en ek sien ook hoe hulle geestelik versadig raak daardeur, ongeag hoe beroerd hulle fisiese omstandighede lyk.

En dan lui Jesus se dringende uitnodiging in Openbaring 22:17 ook in my ore:
"En die Gees en die bruid sê: Kom! En laat hom wat hoor, sê: Kom! En laat hom wat DORS het, kom; en laat hom wat wil, die water van die lewe neem, verniet."

Is jy al honger en dors na die woorde van die Here in die Woord van die Here, geliefde? Ongeag hoe jou fisiese omstandighede daar uitsien? Of veroorsaak jou fisiese omstandighede dat jy moeg en moedeloos raak en nie meer wil ag slaan op God en Sy woorde in Sy Woord nie?

Want jou tydelike fisiese omstandighede bepaal nie jou ewige toekoms nie, slegs jou persoonlike verhouding met Jesus Christus kan dit bepaal. En as jy na Hom toe gaan, soos Hy jou in Openbaring 22:17 uitnooi, dan sal Hy jou versadig, met die fisiese, en ook met die ewige.

Mag ons Hemelse Vader jou in hierdie week ook 'n honger en 'n dors gee na Sy woorde in Sy Woord sodat jy Sy deurbrake in jou fisiese omstandighede kan begin sien, maar ook die wonderlike vooruitsig sal hê om vir ewig saam met Hom te wees. Hy gee dit immers verniet.


GEBED: 

"Vader, gee ons in hierdie week 'n nuwe honger en dors om U woorde te hoor vanuit U Woord. En dankie dat ons kan weet dat U ons wil voed, beide met die fisiese, maar ook met die ewige geestelike beloftes wat U verniet uitdeel aan die wat na U toe kom. In Jesus Naam. Amen."

 Geskryf deur: tiaan gildenhuys
(tg@oicb.co.za)

Aangename geur

2 Korinthiërs 2:14 - 16: "Maar God sy dank wat ons altyd laat triomfeer in Christus en wat die reuk van sy kennis deur ons oral versprei. Want ons is 'n aangename geur van Christus tot eer van God onder die wat gered word en onder die wat verlore gaan; vir die laaste 'n reuk van die dood tot die dood, maar vir die eerste 'n reuk van die lewe tot die lewe."

Ons sien hier die wonderlike bevestiging dat God ons altyd laat triomfeer in Christus. En wat het daardie triomf in Christus tot gevolg in ons persoonlike lewens?

Dit versprei die reuk van sy kennis orals - deur ONS! God het ons dus nodig om die reuk van Sy kennis te versprei na die wêreld rondom ons. Ons moet dus soos 'n plant wees wat 'n baie spesifieke geur afgee as iemand met ons te doen kry.

En ons moet ook nie skaam wees, of huiwer om God se geur af te gee teenoor die wêreld nie. Jesus sê immers as ons Hom verloën voor die mense, sal Hy ons ook verloën voor Sy Vader wat in die hemel is.

Maar die vraag is, watter geur gee ons af teenoor diegene rondom ons, hetsy in ons gesinne, of by die werk, of in ons sosiale lewe?

Is ons vir hulle 'n aangename geur van lewe tot lewe, met ander woorde lei ons optredes teenoor hulle daartoe dat hulle ook gaag die lewe van Christus wil hê wat hulle in ons sien en ervaar?

Of is ons vir hulle 'n geur van die dood tot die dood, met ander woorde dat ons optredes hulle 'n afkeer gee aan ons en wat ons glo, omdat ons dalk skynheilig is?

Maar natuurlik is ons, as ons wel in ware heiligmaking lewe, weer vir nog andere óók 'n geur van die dood tot die dood, wat bloot beteken ons heiligheid en opregte lewens "stink" vir hulle, want hulle kan ons nie verdra nie, omdat hulle nie die lig wat uit ons uitstraal, kan verdra nie.

Mag ons ewige Skeppergod jou in hierdie week ook laat triomfeer in Christus, sodat jy ook vir sommige 'n aangename geur kan wees van lewe tot die lewe, en moenie bekommerd wees as daardie aangename geur vir andere rondom jou 'n geur van die dood tot die dood is nie. Mag jou lig vir Jesus so skyn dat dit die duisternis in hulle kan verdryf.


GEBED:

"Vader, baie dankie dat U ons altyd laat triomfeer in Christus. Gee my asseblief hierdie week die krag om 'n aangename geur te wees, en om vir diegene rondom my 'n geur te wees van lewe tot lewe, en oortuig asseblief diegene wat U nog nie ken nie, en wat my aangename geur mag ervaar as dood tot die dood, om U ook in hulle lewens in te nooi. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)

Almal het einas

Hoé maklik is dit nie om iemand anders te oordeel oor sy of haar optrede of verkeerde keuses nie, terwyl onsself met sóveel dinge in ons eie lewens sukkel!

Die realiteit is dat almal einas het en dat dit baie keer die wortel is van die kwaad in mense se lewens of wat hul optrede bepaal in sekere situasies.

Jesus waarsku ons egter baie pertinent hieroor:

Mat 7:3  En waarom sien jy die splinter in die oog van jou broeder, maar die balk in jou eie oog merk jy nie op nie?
Mat 7:4  Of hoe sal jy vir jou broeder sê: Laat my toe om die splinter uit jou oog uit te haal, en kyk, in jou eie oog is die balk!
Mat 7:5  Geveinsde, haal eers die balk uit jou oog uit, en dan sal jy goed sien om die splinter uit die oog van jou broeder uit te haal.

As ons dan nou kinders is van die lewende Jesus, hoekom is daar só min liefde in ons teenoor ons naaste? Is dit miskien om ons eie seer te verberg?

Tydens beradingsessies, kom Heilige Gees en Hy openbaar hierdie einas en laat mense ook verstaan hoé 'n groot impak dit op hul lewens het. Wat kinders van die Here egter moet besef, is dat God ons nie veroordeel vir ons optrede as gevolg van hiérdie dinge nie.


Jesus gee ons dan ook die perfekte voorbeeld in die hantering daarvan in liefde:

Joh 8:10  En toe Jesus Hom oprig en niemand sien behalwe die vrou nie, sê Hy vir haar: Vrou, waar is daardie beskuldigers van jou? Het niemand jou veroordeel nie?
Joh 8:11  En sy antwoord: Niemand nie, Here. En Jesus sê vir haar: Ek veroordeel jou ook nie. Gaan heen en sondig nie meer nie.

Ons moet altyd onthou dat dieselfde genade wat ons ontvang, is ook vir die ander persoon en moet ons baie waak dat ons nie te vinnig 'n oordeel vél nie.

Mat 7:1  Moenie oordeel nie, sodat julle nie geoordeel word nie.
Mat 7:2  Want met die oordeel waarmee julle oordeel, sal julle geoordeel word; en met die maat waarmee julle meet, sal weer vir julle gemeet word.

Ek wil dit sommer ook duidelik stel dat genade nie 'n “get out of jail free”- kaartjie is nie. Mens kan dit nie gebruik as 'n verskoning vir sonde nie.

Laat ons dus ophou om mense te oordeel terwyl ons nie hul einas ken nie en veral ook nie as jy nog nie in hulle skoene gestaan het nie!


GEBED:

"Vader, baie dankie vir U genade aan my bewys...help my dat ek dieselfde aan ander sal gee deur hul lief te hê net soos wat ek myself liefhet...in Jesus se Naam, amen!"


Geskryf deur: ernest phillipson
(ecp@oicb.co.za)

God gee my krag

Jesaja 40:28,29 & Filippense 4:13: "Weet jy dit nie? Of het jy dit nie gehoor nie? 'n Ewige God is die HERE, Skepper van die eindes van die aarde; Hy word nie moeg of mat nie; daar is geen deurgronding van sy verstand nie. Hy gee die vermoeide krag en vermenigvuldig sterkte vir die wat geen kragte het nie... Ek is tot alles in staat deur Christus wat my krag gee."

Hierdie teksverse leer ons 'n paar baie belangrike punte. In die eerste plek natuurlik, dat ons Here 'n EWIGE God is, dat Hy die Skeppergod is, dat Hy nie moeg of mat word nie, en dat ons nooit Sy verstand kan "deurgrond" nie, m.a.w ons kan nooit met ons nietige verstandjies Sy gedagtes of verstand begryp nie.

Maar dan die wonderlike belofte dat Hy sterkte vermenigvuldig vir ons as ons vermoeid raak en geen kragte meer het nie!

En daardie belofte word herhaal in Filippense 4:13 dat ek wel tot ALLES in my lewe in staat is, juis OMDAT Christus vir my die krag gee.

Kom ons maak hierdie week 'n punt daarvan om daardie paar belangrike punte in ons lewens, te bedink en bietjie daaroor te mediteer.

M.a.w glo jy dat die Here in jou lewe daardie enigste en ewige Skeppergod is, dat Hy nooit moeg of mat word nie en dus ook altyd daar is vir JOU?

En is jy bewus daarvan dat Hy ALTYD vir jou krag gee om enigiets wat jy moet hanteer, te kan hanteer in jou lewe op 'n daaglikse basis? Dit beteken dus niks anders as dat daar NIKS is wat jy en ek hierdie week moet hanteer, waarvoor ons NIE krag by die Here voor kan kry nie.

Mag ons ewige Skeppergod jou in hierdie week Sy krag gee as jy vermoeid en kragteloos voel.


GEBED:

"Vader, baie dankie dat ek mag weet ek is tot alles in staat deur Christus wat my die krag gee. Ek vra U, gee my asseblief elke oomblik van elke dag U krag om enige omstandighede in my persoonlike lewe te kan hanteer. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)

Bemoedig mekaar

 In hierdie dae waarin ons leef, trek baie kinders van die Here, baie swaar op verskeie gebiede en is baie van hulle vasgevang in vrees. Daar is baie bekommernisse oor die dag van môre en gryp hulle na elke strooihalmpie wat uitgegooi word om te sê dat dit sal beter word.

Terwyl ek self glo dat ons veilig in Jesus se hande is en dat Hy getrou is aan Sy woord en ook in elkeen van ons behoeftes sal voorsien, lees ek egter ook in die Bybel dat dinge nog erger gaan word. Ons lees van familie-lede wat teen mekaar gaan opstaan...en kry ek ook daarmee te doen in beradingssessies...en allerhande vorme van verdrukking wat in hierdie laaste dae gaan plaasvind.

Ten spyte van dit alles, skryf Paulus dat dit slegs maar ligte verdrukkinge is en hang die impak daarvan op ons lewens, af van hoé ons daarna kyk en op watter manier ons dit hanteer.

2Kor 4:14  Want ons weet dat Hy wat die Here Jesus opgewek het, ons ook deur Jesus sal opwek en saam met julle voor Hom sal stel.
2Kor 4:15  Want dit is alles om julle ontwil, sodat die genade, wat groter geword het deur so baie mense, die danksegging oorvloedig kan maak tot die heerlikheid van God.
2Kor 4:16  Daarom gee ons nie moed op nie, maar al vergaan ons uiterlike mens ook, nogtans word die innerlike mens dag ná dag vernuwe.
2Kor 4:17  Want ons ligte verdrukking wat vir ‘n oomblik is, bewerk vir ons ‘n alles oortreffende ewige gewig van heerlikheid;
2Kor 4:18  omdat ons nie let op die sigbare dinge nie, maar op die onsigbare; want die sigbare dinge is tydelik, maar die onsigbare ewig.

Niemand is dus gevrywaar teen die dinge wat nog sal kom nie en glo ek dat die “herlewing” wat almal verkondig en almal só op hoop, dalk op 'n heel ander manier gaan wees as wat baie mense verwag of dink. Dié realiteit is dat ons nie kan bekostig om ons oog NIE op Jesus te rig nie en dat ons baie seker moet maak dat ons leer om na die Heilige Gees se stem te luister.

Terwyl ons dus hierdie dinge rondom ons sien gebeur en sien dat die Bybel in vervulling gaan, dan weet ons dat die einde baie naby is en behoort ons êrens  moeite daarmee te maak om onsself voor te berei.

Terwyl ons dan ook nog die evangelie verkondig aan almal rondom ons deur ons dade en woorde!

Fil 2:12  Daarom, my geliefdes, soos julle altyd gehoorsaam gewees het, nie in my teenwoordigheid alleen nie, maar baie meer nou in my afwesigheid, werk julle eie heil uit met vrees en bewing;
Fil 2:13  want dit is God wat in julle werk om te wil sowel as om te werk na sy welbehae.
Fil 2:14  Doen alles sonder murmurering en teëspraak,
Fil 2:15  sodat julle onberispelik en opreg kan wees, kinders van God sonder gebrek te midde van ‘n krom en verdraaide geslag onder wie julle skyn soos ligte in die wêreld,

Dit is dus uiters belangrik dat ons waaksaam en heilig moet lewe in hiérdie tye en dat ons ook mekaar eerder moet bemoedig as om mekaar met vreespraatjies vas te bind aan hiérdie wêreld!

1Th 5:1  Maar oor die tye en geleenthede, broeders, het julle nie nodig dat aan julle geskryf word nie;
1Th 5:2  want julle weet self baie goed dat die dag van die Here kom net soos ‘n dief in die nag.
1Th 5:3  Want wanneer hulle sê: Vrede en veiligheid—dan oorval ‘n skielike verderf hulle soos die barensnood ‘n swanger vrou, en hulle sal sekerlik nie ontvlug nie.
1Th 5:4  Maar julle, broeders, is nie in duisternis, dat die dag julle soos ‘n dief sou oorval nie.
1Th 5:5  Julle is almal kinders van die lig en kinders van die dag; ons is nie van die nag of die duisternis nie.
1Th 5:6  Laat ons dan nie slaap soos die ander nie, maar laat ons waak en nugter wees.

1Th 4:17  Daarna sal ons wat in die lewe oorbly, saam met hulle in wolke weggevoer word die Here tegemoet in die lug; en so sal ons altyd by die Here wees.
1Th 4:18  Bemoedig mekaar dan met hierdie woorde.


GEBED: 
"Here Jesus, dankie dat ons kan weet dat dié dag nader kom dat U weer sal terugkeer soos U belowe het. Dankie dat ons ook kan weet dat U Woord hierdie dinge wat nou aan die gebeur is in hierdie wêreld, reeds vooruit vertel het, sodat ons kan weet om wakker en waaksaam te lewe terwyl ons U koms te wagte is...amen!"



Geskryf deur: ernest phillipson
(ecp@oicb.co.za)

Soek God

Jesaja 55:6 & Hosea 10:12: "Soek die HERE terwyl Hy nog te vinde is; roep Hom aan terwyl Hy naby is...want dit is tyd om die HERE te soek, totdat Hy kom en geregtigheid oor julle laat reën."

Hierdie twee teksverse is baie belangriker as wat ons ooit mag dink. Want in die een is daar 'n waarksuwing, en in die tweede een is daar 'n belofte.

Die waarskuwing in die eerste teksvers is dat ek en jy die Here moet soek terwyl Hy nog te vinde is, wat natuurlik die implikasie bring dat daar 'n dag gaan kom wat Hy nie meer te vinde gaan wees vir die wat Hom gaan aanroep nie. Dit beteken ons moet nie uitstel om moeite te doen om God te soek nie.

Hoe soek ons Hom? Deur TYD met Sy Woord te spandeer, en ook deur TYD met Hom persoonlik te spandeer in daaglikse gesprekke (gebed). En verder om ook tyd te spandeer deur soms net stil te sit by Sy voete, en Hom kans te gee om in die stilte diep in ons harte met ons te praat.


En wat is die belofte in die tweede teksvers?

Dat as ons sal aanhou om Hom so te soek, Hy sal kom en geregtigheid oor ons sal laat reën. Daardie geregtigheid verwys na God se manier van dinge doen in ons alledaagse lewens.

As ons dus aanhou om God so te soek, sal Hy kom en Sy manier van dinge doen in ons lewens laat plaasvind, wat beteken Hy sal ons deur Sy Heilige Gees lei om prakties te doen wat Sy Woord ons leer om te doen.

Mag jy in hierdie week 'n daadwerklike keuse maak om GOD TE SOEK in alles wat jy doen!


GEBED:

"Vader, leer my asseblief om U daagliks te soek in alles wat ek doen, deur tyd met U en met U Woord te spandeer, sodat U ook U geregtigheid oor my kan laat reën. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)

Hou vas wat jy het !

Openbaring 3:11: "Kyk, Ek kom gou! Hou vas wat jy het, sodat niemand jou kroon kan neem nie."

Wanneer mens kyk na wat rondom ons gebeur in die wêreld, is daar geen twyfel dat ons werklik aan die einde van die eindtyd lewe nie.

Jesus se tweede koms is baie baie naby, en daarom kom hierdie waarskuwing in vandag se teksvers. Elkeen van ons moet vashou wat ons het, sodat niemand ons kroon kan neem nie. Die Bybel is duidelik dat daar verskillende lone en krone op Jesus se gehoorsame volgelinge wag in die hemel.

Jy is welkom om my volgende YouTube video daaroor te kyk as jy wil.

En uit die aard van die saak sal satan wil sekermaak dat ons nie daardie lone of krone ontvang nie, en sal hy dit by ons probeer steel.


En hoe probeer hy ons krone neem? Deur ons moedeloos, negatief en swaarmoedig te probeer maak oor al die dinge wat rondom ons aan die gang is. En daarvoor gebruik hy baie suksesvol alle vorme van sosiale media waaraan ons kan dink.

Maar hy gebruik ook familielede, werkskollegas en selfs vriende om ons in sommige gevalle so negatief te maak, hoe hartseer dit ookal is. Hier gebruik hy soms verhoudingsprobleme tussen huweliksmaats, of tussen ouers en kinders, om ons so moedeloos of negatief te maak.

Hoekom doen hy dit? Want uiteindelik wil hy baie graag hê dat ons totaal moet wegval van Jesus Christus af, behalwe die feit dat hy nie wil hê ons moet eendag krone in die hemel sal ontvang nie.

En juis daarom kom die woorde van hierdie week se teksvers dat ons moet vashou wat ons het, juis sodat niemand ons kroon kan neem nie. Hoe hou ons vas?

Deur aan Jesus Homself vas te hou, daagliks my Bybel te lees en Sy Woord in te neem, en om deurlopend met Hom in gesprek te wees by wyse van gebed.

Onthou gebed is nie hoogdrawende woorde of net 'n gebedjie in die oggend of in die aand nie. Gebed is ook deurlopende gesprekke met ons Hemelse Vader oor alles waarmee ons op 'n daaglikse basis gekonfronteer mag word.

Mag jy in hierdie week 'n daadwerklike keuse maak om VAS TE HOU AAN JESUS!


GEBED: 

"Vader, baie dankie dat ek vandag mag vra dat U my hierdie week U krag sal gee om vas te hou aan wat ek reeds in U het, sodat niemand my kroon kan neem nie. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)

Vrede wat alle verstand te bowe gaan.

Een van die kosbaarste geskenke wat Jesus aan ons agtergelaat het, is: “die vrede wat alle verstand te bowe gaan.” Tog is daar sóveel kinders van die Here wié werklik sukkel om in hiérdie vrede te lewe. Dit is 'n kosbare geskenk wat geen geld of wêreldse besittings, aansien of  titels ooit kan koop nie. Jy kan dit slegs bekom deur werklik in 'n intieme verhouding met die Gewer daarvan te lewe. In Johannes 14 lees ons die volgende:

Joh 14:27  Vrede laat Ek vir julle na, my vrede gee Ek aan julle; nie soos die wêreld gee, gee Ek aan julle nie. Laat julle hart nie ontsteld word en bang wees nie.

Ons lees dan ook in die evangeliese boeke, dat wanneer Jesus Sy dissipels uitstuur, Hy hulle dan ook die opdrag gee om, waar hulle ookal kom, die mense te groet met die woord: “vrede”.
Dan sê Hy ook dat as daar iemand van vrede in daardie plek is, dan sal die vrede op hom of haar rus, anders sal dit terugkeer na die dissipels.

Luk 10:5  En in watter huis julle ook al mag ingaan, sê eers: Vrede vir hierdie huis!
Luk 10:6  En as dáár ‘n man van vrede is, sal julle vrede op hom rus; anders sal dit tot julle terugkeer.

Ons lees dan ook op 'n paar plekke dat Jesus gekom het om die evangelie van vrede te verkondig, omdat Hy juis die Een is wié die prys betaal het, sodat daar nou vrede tussen ons en God kan wees.

Act 10:36  Dit is die woord wat Hy gestuur het aan die kinders van Israel toe Hy die evangelie van vrede verkondig het deur Jesus Christus—Hy is die Here van almal.

Ef 2:17  En Hy het die evangelie van vrede kom verkondig aan julle wat ver was en aan die wat naby was;

Vrede is egter 'n keuse soos enige ander ding in hierdie wêreld en hang dit van jou af of jy sal kies om daarin te lewe eerder as om toe te laat dat jou omstandighede of die wêreld rondom jou vir jou gaan dikteer hoé jy elke ding moet hanteer. In die begin van Johannes 14: 27, waarsku Jesus ons dan ook om nie toe te laat dat ons benoud word of vrees nie!

Ons opdrag is dan ook om in vrede met alle mense saam te leef en om vrede na te jaag.

Heb 12:14  Jaag die vrede na met almal, en die heiligmaking waarsonder niemand die Here sal sien nie;
Heb 12:15  en pas op dat niemand in die genade van God veragter nie; dat geen wortel van bitterheid opskiet en onrus verwek en baie hierdeur besoedel word nie.

Rom 12:16  wees eensgesind onder mekaar; moenie na hoë dinge streef nie, maar voeg julle by die nederige; moenie eiewys wees nie;
Rom 12:17  vergeld niemand kwaad vir kwaad nie; bedink wat goed is voor alle mense;
Rom 12:18  as dit moontlik is, sover as dit van julle afhang, leef in vrede met alle mense.

Mat 5:9  Salig is die vredemakers, want hulle sal kinders van God genoem word.

Mag elkeen van ons in hierdie komende week, 'n keuse maak vir vrede en dit najaag soos 'n kosbare skat!


GEBED:
Here Jesus, baie dankie vir hierdie kosbare skat wat U aan ons agtergelaat het en mag elkeen van U kinders dit najaag en besef dat dit meer werd is as enige aardse skat of besitting...amen!

Geskryf deur: ernest phillipson
(ecp@oicb.co.za)

Hoeveel kanse gaan ek nog kry?

Hoeveel kanse kry ek tog wel in my lewe? Beslis baie meer as wat ons dink, ervaar of kan verduidelik!

In die fisiese is daar baie kanse waarvan ons nooit eers sal weet nie, want sê nou net jy het twee minute vroeër gery, was die kans dalk daar dat jy in ‘n ongeluk sou wees. Jy loop verby ‘n konstruksie werksplek in die straat en die kans is daar dat ‘n baksteen dalk op jou kop sou val. Jy loop oor die straat, al kyk jy mooi, is die kans daar dat ‘n motor jou kan omry.

In God se Woord verskyn die woord kans net twee keer in die Afrkaans 1933-53 vertaling. Die eerste keer is gemik op die fisiese voorbeeld soos ek genoem het bo.

Josua 8:20 Toe die manne van Ai agter hulle omkyk, sien hulle hoe die rook van die stad na die hemel optrek; maar hulle het geen kans gehad om hierheen of daarheen te vlug nie, want die manskappe wat op die vlug was na die woestyn, het omgedraai teen die vervolgers.

Ek glo dat dit nie soseer kans in die fisiese is nie, maar wel die beskerming van die engele van God, deur Hom gestuur as ons Hom gevra het vir hulle beskerming wat baie dinge na kans laat lyk.

So kan ons ons “kanse” in die fisiese lewe in elke aspek van die lewe herken. In finansies, werksgeleenthede, gesondheid, lewenstyl, besittings, noem hulle maar. Daar is party kanse wat ons wel kan aangryp en party wat ongesiens verbygaan asook party wat selfs verwoesting inbring as ons die kans gemis het.

As jy dan nou eintlik regtig sit en dink aan hoeveel ter menigte kanse ons tog wel kry in ons lewe in die fisiese, hoeveel kanse dink jy kry ons tog nie in die geestelike nie?

Dit is die geestelike kanse in die lewe wat die meeste afgeskeep word en natuurlik wanneer ons die geestelike kanse weggooi, sal die fisiese ook daaronder ly.

Hoeveel keer is jy al gevra om saam te gaan kerk, biduur, sel groep, seminaar, ens toe, en eintlik is jy nie lus nie, so jy reel eerder iets anders in plek daarvan. Dis ‘n geestelike kans wat weggegooi was!

Hoeveel dae lees jy glad nie die Woord van God nie, dis ‘n geestelike kans om te groei wat weggegooi was.

En so kan ek baie dinge opnoem wat verbeurde kanse uitwys.

Aan die ander kant in die geestelike weer, hoeveel kanse kry jy tog nie om iets te doen VIR die koninkryk van God nie? Help ‘n boemelaar nie net met ‘n geldjie nie, maar deel Jesus ook.

Hoeveel keer het jy oorskiet kos in die huis wat weggegooi word, wat jy eerder kon gaan uitdeel het? Hoeveel keer as iemand na jou toe kom met ‘n probleem, om sommer net te bid vir hom of haar daar en dan.

As ons nie die geestelike kanse aangryp nie, gaan dit nie op ‘n skinkbord vir ons aangebied word nie.

Ons moet die kans aangryp en alles doen in ons vermoë om dit te bewerkstellig, soos genoem in
Lukas 5:19  En toe hulle vanweë die skare geen kans sien om hom in te bring nie, klim hulle op die dak en laat hom met die bed afsak deur die panne tussen die mense in en voor Jesus.

Geliefde, ek daag jou uit om van vandag af uit te kyk vir die kanse in die lewe. Nie net in die fisiese nie, maar meerso in die geestelike, want dan sal dit beter gaan in alle aspekte van jou lewe gepaard met gehoorsaamheid aan die Woord van God.


Gebed
Almagtige Vader in die Hemel, dankie vir al die kanse wat U my gun in hierdie lewenswandel van my. Ek vra dat U deur U Heilige Gees my sal lei dat ek veral die geestelike kanse in my lewe kan aangryp wat U op my pad stuur.
Gee my asb die krag om alles te doen tot erkenning en tot eer aan Jesus Christus van Nasaret
Amen


Geskryf deur: hein henning
(heinh@sunlightfs.co.za)

Hy verlaat ons nie!

Hebreërs 13:5,6: "...want Hy het gesê: Ek sal jou nooit begewe en jou nooit verlaat nie. Daarom kan ons met alle vrymoedigheid sê: Die Here is vir my 'n Helper, en ek sal nie vrees nie; wat sal 'n mens aan my doen?"

Hierdie is 'n wonderlike bemoediging van ons Here, dat Hy ons NOOIT begewe of verlaat nie. En dit is juis wat ek en jy ook hierdie week moet hoor.

Want so baie kere is ons as gelowiges geneig om te dink dat die Here Jesus ons "verlaat" het, of ons alleen los om self ons eie probleme met die mense rondom ons, op te los.

Maar volgens my, beteken die woord: "nooit", mos steeds niks anders as "nooit" nie. Dit sluit dan ook aan by Jesus se woorde in Mattheus 28:20 dat Hy met ons is, al die dae tot aan die voleinding van die wêreld en ook Galasiërs 2:20 wat bepaal dat Hy IN ons is.

En juis wanneer daardie teksvers vir ons 'n werklikheid word, kan ons verder bemoediging ontvang uit die woorde van vers 6 dat die Here vir ons 'n Helper is, wat meebring dat ek niks hoef te vrees nie, want as hy my Helper is, wat kan ENIGE mens aan my doen?

As jy dus nodig het om hierdie week enige mens te konfronteer oor enige situasie, veral as jy dalk valslik beskulidg mag wees oor iets, staan gerus op hierdie duidelike teksverse.

Ons dien inderdaad 'n wonderlike God wat nooit Sy kinders alleenlaat, of verlaat nie. Hy is altyd daar om saam met ons deur enige situasie in ons lewens te stap, maak nie saak hoe ongemaklik dit mag wees in ons vlees nie.

GEBED: 

"Vader, baie dankie dat ek vandag opnuut mag kennis neem van die feit dat U my nooit begewe en nooit verlaat nie. Help my asseblief om dit elke dag van my lewe te onthou. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)

Keer vir Leë beloftes!

Daar is so baie plekke in die Bybel waar ons ongehoorsaam is. Een daarvan om beloftes te maak en dit nie na te kom nie. Jy leen iets by iemand en belowe om dit terug te bring. Jy hou nie jou woord nie... en jou woord is veronderstel om jou woord van eer te wees.

“As jy ’n gelofte aan God gedoen het, stel nie uit om dit te betaal nie, want daar is geen welgevalle in dwase nie. Betaal wat jy belowe. Dit is beter dat jy nie belowe nie as dat jy belowe en nie betaal nie. “ Pred 5:3-4

Moet nou nie probeer verskoon dat dit net beloftes is wat mens aan die HERE maak wat tel nie. Die HERE sê: “Vir sovele jy dit aan die geringste van My doen, doen jy dit aan My”
Matt 25:40

          Almal van ons het al, sonder om te dink 'n belofte gemaak wat ons nie nagekom het nie. Ons maak almal die fout om beloftes te maak en dit nie na te kom nie. Maar laat iemand anders 'n leë belofte aan jou maak en dit nie nakom nie, dan is die vet in die vuur.

            Dis ook om onwaardig by die Nagmaaltafel aan te sit en ‘n OORDEEL oor jouself te drink.

Ons lees telkemale in die Bybel van God se beloftes aan ons en ons is vinnig om daarop aanspraak te maak. Ons staan bakhand en wag, ongeduldig want 'n belofte moet nagekom word. In ons arrogansie vergeet ons gerieflikheidshalwe baie maklik om ons beloftes gestand te doen.

Wanneer jy in die moeilikheid is en jou lewe nie volgens plan verloop nie word beloftes maklik gemaak. Sommige mense is onder die indruk dat hulle God kan omkoop of met Hom kan onderhandel deur die beloftes wat hul maak. Beloftes wat uit desperaatheid en ondeurdag gemaak is, beloftes wat nie nagekom word nie.

Ons moet baie versigtig wees met die maak van beloftes. God verwag dat jy jou beloftes aan Hom sal nakom, Hy eis dit van jou. Moenie beloftes maak wat buite jou bereik is nie, hou eerder vas aan die beloftes wat God jou gee. Hy is betroubaar en 'n waarmaker van Sy woord. Wees geduldig en wag met vrede in jou gemoed vir die uitkoms.

            “Laat die liefde ongeveins (rein, suiwer) wees; verafsku wat sleg is; hang die goeie aan;  0 wees hartlik teenoor mekaar met broederlike liefde; die een moet die ander voorgaan in eerbetoning; wees nie traag in die ywer nie; wees vurig van gees; dien die Here...” Rom 12:9-11

Bid vir mekaar

Gebed is seker dié belangrikste komponent van ons verhouding met 'n lewende God. Gebed is doodeenvoudig 'n gesprek met ons Redder en Verlosser, Jesus Christus van Nasaret. Tog is dit 'n deel van ons wandel in Christus wat die meeste afgeskeep word. Enige Christen sal kan getuig dat daar baie krag in gebed is.

Die belangrikste gebed ooit waarvan ons in die Bybel lees, is sekerlik dié een wat Jesus self vir ons gebid het, voordat Hy Sy lewe vir ons as losprys gegee het!

Joh 17:11  En Ek is nie meer in die wêreld nie, maar hulle is in die wêreld; en Ek kom na U toe. Heilige Vader, bewaar in u Naam die wat U My gegee het, sodat hulle een kan wees net soos Ons.

Joh 17:12  Toe Ek saam met hulle in die wêreld was, het Ek hulle in u Naam bewaar. Oor die wat U My gegee het, het Ek gewaak; en nie een van hulle het verlore gegaan nie, behalwe die seun van die verderf, sodat die Skrif vervul sou word.

Joh 17:13  Maar nou kom Ek na U toe; en Ek spreek hierdie dinge in die wêreld, sodat hulle my blydskap volkome in hulle kan hê.

Joh 17:14  Ek het hulle u woord gegee, en die wêreld het hulle gehaat, omdat hulle nie van die wêreld is nie, net soos Ek nie van die wêreld is nie.

Joh 17:15  Ek bid nie dat U hulle uit die wêreld wegneem nie, maar dat U hulle van die Bose bewaar.

Joh 17:16  Hulle is nie van die wêreld nie, net soos Ek nie van die wêreld is nie.

Joh 17:17  Heilig hulle in u waarheid; u woord is die waarheid.

Ons lees dan ook op verskeie plekke waar Jesus, vroeg en laat, baie tyd in gebed spandeer het en ook dat Hy in besonder vir Sy dissipels gebid het.

Luk 22:31  En die Here sê: Simon, Simon, kyk, die Satan het vurig begeer om julle soos koring te sif.

Luk 22:32  Maar Ek het vir jou gebid, dat jou geloof nie ophou nie; en as jy eendag bekeerd is, moet jy jou broeders versterk.


Verder lees ons dan ook hoé Paulus by verskeie geleenthede vir die gemeentes en individue gebid het.

2Ti 1:3  Ek dank God, wat ek van my voorouers af in ‘n rein gewete dien, wanneer ek onophoudelik nag en dag aan jou in my gebede dink,

Dit is dus duidelik uit die Woord dat dit belangrik is dat ons op gereelde basis vir mekaar moet bid en só mekaar se laste kan help dra. Een van die belangrikste uitvloeisels van gebed, die van genesing vir jouself, word baie keer geminag en lei ons skade as gevolg van onkunde!

Jak 5:16  Bely mekaar julle misdade en bid vir mekaar, sodat julle gesond kan word. Die vurige gebed van ‘n regverdige het groot krag.

Geliefdes, kom ons begin om meer intens vir mekaar te bid, sodat ons die volle krag van gebed ook in ons eie lewens kan ervaar.

GEBED: 
Jesus, baie dankie dat U alreeds meer as 2000 jaar gelede vir my ook gebid het (en vandag steeds vir my intree) en baie dankie vir elke persoon wie gereeld ook vir my bid. Help my dat ek ook getrou ander sal opdra in gebed aan U en dat my gebede ook as lieflike geur sal opstyg tot U troon...amen!



Geskryf deur: ernest phillipson
(ecp@oicb.co.za)

Kom ons eet!

Reg aan die begin van die skepping, in die tyd van Adam en Eva, het God slegs een boom uitgesonder waarvan die mens nie mag geëet het nie. Terwyl die mens dus aan niks tekort gehad het nie en vrylik van die ander kon eet, glo ek dat daar 'n dag gekom het waar hierdie woorde die eerste keer op hierdie aarde gespreek is.

Dit was die dag toe Eva vir Adam genooi het om te eet van die verbode vrugte. Ons weet dan ook dat daardie daad van ongehoorsaamheid, die verderf op hierdie aarde en oor die mensdom gebring het.

Tog, baie jare later, word daardie uitnodiging weer gerig deur die tweede Adam en word ons weereens genooi om te eet. Hierdie keer word ons genooi om deel te hê aan Sy liggaam en Sy bloed wat vir ons die verlossing gebring het.

Joh 6:53  En Jesus sê vir hulle: Voorwaar, voorwaar Ek sê vir julle, as julle nie die vlees van die Seun van die mens eet en sy bloed drink nie, het julle geen lewe in julleself nie.
Joh 6:54  Hy wat my vlees eet en my bloed drink, het die ewige lewe, en Ek sal hom opwek in die laaste dag.
Joh 6:55  Want my vlees is waarlik spys, en my bloed is waarlik drank.
Joh 6:56  Wie my vlees eet en my bloed drink, bly in My en Ek in hom.

Wanneer Jesus die nagmaal instel, herhaal Hy weer hierdie uitnodiging en gee dan ook aan ons hierdie verbondstekens as 'n herinnering aan die offer wat Hy met Sy liggaam gebring het vir ons genesing en ook dat Sy bloed die prys vir ons sondes betaal het.

1Kor 11:24  en nadat Hy gedank het, het Hy dit gebreek en gesê: Neem, eet; dit is my liggaam wat vir julle gebreek word; doen dit tot my gedagtenis.
1Kor 11:25  Net so ook die beker ná die ete, met die woorde: Hierdie beker is die nuwe testament in my bloed; doen dit, so dikwels as julle daaruit drink, tot my gedagtenis.
1Kor 11:26  Want so dikwels as julle hierdie brood eet en hierdie beker drink, verkondig julle die dood van die Here totdat Hy kom.

Jesus het Homself gegee om ons te reinig van alle ongeregtigheid en om ons heilig voor Vader te stel.

Tit 2:14  wat Homself vir ons gegee het om ons te verlos van alle ongeregtigheid en vir Homself ‘n volk as sy eiendom te reinig, ywerig in goeie werke.

Laat ons onsself dan daagliks herinner aan hierdie genade wat ons verniet ontvang het en kom ons neem hierdie uitnodiging aan, terwyl ons die dinge van die oumens aflê en die vrees van die Here najaag in heiligmaking.

2Kor 7:1  Terwyl ons dan hierdie beloftes het, geliefdes, laat ons ons van alle besoedeling van die vlees en die gees reinig, en laat ons die heiligmaking in die vrees van God volbring.


GEBED:  Here Jesus, baie dankie dat ons deel mag hê aan U liggaam wat vir ons gebreek is tot genesing en U bloed wat die prys van ons ongeregtighede betaal het...amen!


Geskryf deur: ernest phillipson
(ecp@oicb.co.za)

Doen goed

Mattheus 5:44,45: "Maar Ek sê vir julle: Julle moet jul vyande liefhê, seën die wat vir julle vervloek, doen goed aan die wat vir julle haat, en bid vir die wat julle beledig en julle vervolg; sodat julle kinders kan word van julle Vader wat in die hemele is; want Hy laat sy son opgaan oor slegtes en goeies, en Hy laat reën op regverdiges en onregverdiges."

Hierdie is twee van daardie teksverse in die Bybel wat die meeste Christene nie graag wil hoor nie, of hoop dat Jesus dit dalk nie so letterlik bedoel het nie.

Want wanneer iemand my vloek, is die eerste reaksie in ons vlees, gerugsteun deur die standaard siening in die wêreld daarbuite, om hom of haar dadelik terug te vloek!

Maar tog wil Jesus hê ons moet anders wees en daardie persoon eerder seën, juis sodat ek seën kan ontvang. En waar is daar beter geleenthede om hierdie tekvers prakties te beoefen as elke week by die werk as iemand wat nie van my hou nie, my sou slegsê of vloek? Kan ons die week kies om dit dan eerder te doen soos Jesus dit wil hê, en eerder seën as om terug te vloek?

En hoe is dit moontlik om goed te doen aan iemand wat my haat, of om te bid vir daardie mense wat my beledig en vervolg en my net heeltyd in die moeilikheid wil laat beland? Of hoe kan ons ons vyande liefhê? Ons gaan hierdie dinge beslis nie in ons eie krag kan regkry nie.

Daarom prys ons die Here vir verse soos Filippense 4:13 in die Bybel, wat bepaal dat ons tot ALLES in staat is deur Christus wat ons die krag gee! Ons kan dus regtig al daardie goed doen wat Jesus van ons verwag - as ons Hom net elke dag leer VRA vir Sy krag om dit te doen.


Die vraag is nou - maar hoekom moet ek al daardie dinge so doen? En die antwoord kry ons in vers 45 wat bepaal: "...sodat julle kinders kan word van julle Vader wat in die hemele is..."

Wil ons regtig vir die mense rondom ons wys dat ons kinders van ons Hemelse Vader is, dan moet ons al daardie dinge PRAKTIES begin doen teenoor almal rondom ons, selfs teenoor die slegtes en die onregverdiges in ons daaglikse lewens.

Kom ons vra in hierdie week die Vader om ons werklik Jesus se krag te gee om soos Hy op te tree teenoor al die mense rondom ons in elke situasie waar ons gekonfronteer word, en begin daardie paar dinge prakties te DOEN, en kyk wat doen Vader vir jou in jou situasie.


GEBED: 

"Vader, ek bely vandag dat ek nie altyd U opdragte in Mattheus 5:44 nagekom het nie. Vergewe asseblief my sonde Here, en gee my in hierdie week Jesus Christus se krag om te doen wat U van my verwag, selfs teenoor die slegtes en die onregverdiges in my lewe wat my haat, vloek, vervolg en beledig, juis sodat ek U kind kan wees en soos U kan wees, en U my kan seën. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)

Vadoek storie

Vanoggend staan ek en skottelgoed was en ek dink sommer. Jy weet mos as jy skottelgoed was dink jy sommer net. Na alles mooi opgestapel is in die oorvol skottelgoedrak, droog ek my hande af en ek dink dadelik aan 'n vriendin wat altyd praat oor watter storie vertel jou vadoeke? Daarop wonder ek hoekom baie vrouens so skuldig voel oor hulle vadoeke, en net daar bekyk ek my klomp vadoeke.

Die twee mooi gryses hang elkeen op hulle eie reëlings. Een by die  opwas wasbak vir afdroog en die ander een by die afspoel wasbak in die kombuis vir opvryf.

Die wit en groene is my gunsteling. Hy is die "all rounder". Is oor my skouer as ek kook om vinnig my hande af te vee en sommer om die proe-lepel ook af te vee. Hy vee gou-gou af waar ek mors terwyl ek werskaf. Hy hou die warm kastroldeksel vas en kan soms sommer net enige plek rondlê.

Daar is die gele wat onder die wasbak bly vir vuilwerk soos daai koffievlekke op die vloer wat gemors het toe jy geloop het met ‘n oorvol koppie.

Dan is daar die spesiale nuwe turkoois vadoeke wat in die onderste laai bly vir wanneer koek en tee gaste opdaag.

Laastens die twee groen waslappies. Hulle was en maak skoon. Dit is hulle primêre doel .

Toe my kinders kleiner was kon dit my heeltemal irriteer as hulle ‘n lap vir die verkeerde doel gebruik. Die "all rounder" droog nie af nie. Die groen waslappies maak nie vloere skoon nie. Die gryses vee nie kaste af nie.
Hulle het baie vining geleer dat vadoeke wat bo kasoppervlakte hang nie vir vloere bedoel is nie en daardies onder die kasoppervlakte nie vir skottelgoed nie.

Verstommend was nog altyd dat die dag wanneer ek besluit een moet vervang word, is dit tyd dat die buite tafel of stoele afgevee moet word en dan geld geen reëls skielik meer nie. Die oues word heeltemal misgekyk asof hulle nie bestaan nie en die nuwe een word sommer vir die doel gebruik. Dit het my  destyds rasend gemaak. Is dit net ek wat die verskil kon sien tussen ou en nuwe vadoeke en waslappe?

Een ding besef ek. Vadoeke is die geduldigste artikels in my huis. Hulle doen net presies dit waarvoor jy hulle gebruik.

So saam met die gedagtes dink ek aan my geestelike lewe en besef dat ons met alle respek gesê, die Heilige Gees binne in ons soms soos daardie vadoeke behandel. Hy word aangewend soos benodig. As ons alleen is, laat ons Hom eenkant lê. As daar gemors is in my lewe is, moet Hy help skoonmaak. Hy moet al die vuil en nat absorbeer. As daar gaste kom word Hy uitgestal. Ja, net soos mens se vadoeke met jou kan "praat", so praat die Heilige Gees.

Jy voel vining aangekla as gaste skielik in jou kombuis inkom en jou vadoeke lyk soos wie-kom-daar-aan. Vinnig pluk jy dan daai nuwe mooies uit die onderste laai en  verduidelik hoe jy net beplan het om vandag die oues weg te gooi en jy prop hulle vinnig onder in die wasbak se kas. As die gaste weg is, haal jy hulle weer uit en bêre die nuwes.

Net so waarsku die Heilige Gees ons wanneer vuilheid aan ons lewens kom karring. Hy vee trane af wanneer daar hartseer is en Hy maak foute vining skoon en toe as ons Hom om vergifnis smeek. As ons uitgevang word wanneer ons besig is met verkeerde dinge of gedagtes, kan ons soms ons eie aksies vinnig regverdig en wanneer ons tussen mense is sit ons die beste kant voor.

Ek het ook besef vadoeke is altyd daar. So ook die Heilige Gees. Hulle dwing hulle nie op ons af nie. Hulle is beskikbaar vir gebruik soos nodig. So onderdruk ons baie kere die Heilige Gees se volle potensiaal in ons lewens. Hy wil en kan soveel meer vir en in ons wees. Hy wil jou elke oomblik raadgee, beskerm, waarsku, lei, leer, troos en nog baie meer.

Van vandag af kies ek om die Heilige Gees toe te laat om Sy werk voluit te doen in my lewe. Hy gaan nie meer my geestelike vadoek wees nie. Hy is elke dag nuut. Hy stel my nooit in ‘n verleentheid nie. Hy is altyd op Sy pos. Wat ‘n voorreg om Hom in my te mag hê.

Joh 14:26 – maar die Trooster, die Heilige Gees, wat die Vader in My Naam sal stuur, Hy sal julle alles leer en sal julle herinner aan alles wat Ek vir julle gese het.

Rom 5:5 – en hoop beskaam nie, omdat die liefde van God in ons harte uitgestort is deur die Heilige Gees wat aan ons gegee is.

1Kor 6:19 – of weet julle nie dat julle liggaam ‘n tempel is van die Heilige Gees wat in julle is, wat julle van God het, en dat julle nie aan julleself behoort nie?

1 Joh 2:27 – en die salwing wat julle van Hom ontvang het, bly in julle, en julle het nie nodig dat iemand julle leer nie; maar soos dieselfde salwing julle aangaande alles leer, so is dit ook waar en geen leuen nie; en soos die julle geleer het, so moet julle in Hom bly

Gebed:

“Vader in die hemel, vergewe my dat ek U Heilige Gees se potensiaal in my lewe so onderdruk het met my eie wil en planne. Help my om van hierdie oomblik af meer en meer te luister na U stem. Leer my gees asseblief sodat ek my volle potensiaal in U koninkryk kan bereik en U daardeur verheerlik kan word. Jesus kom maak my asseblief opnuut vol met U Heilige Gees. Amen.”

 
 Geskryf deur: rene short
(grs@oicb.co.za)

Liefde vir God

1 Johannes 5:2,3: "Hieraan weet ons dat ons die kinders van God liefhet: wanneer ons God liefhet en sy gebooie bewaar. Want dit is die liefde tot God, dat ons sy gebooie bewaar; en sy gebooie is nie swaar nie."

Die Bybel leer ons dat ons ons naaste moet liefhê soos onsself. Nou is die probleem juis dat baie mense nie vir hulleself lief is nie, so hoe kan hulle dan enigiemand anders om hulle, liefhê? As hulle hulleself haat, dan gaan hulle uiteraard hulle naaste haat. As hulle nie hulleself kan vergewe nie, dan gaan hulle nie hulle naaste kan vergewe nie, ensomeer. Want hulle sal hulle naaste liefhê op dieselfde wyse as wat hulle hulleself liefhet.

Hoe stel ons dit dan reg? Ons kry die antwoord in die bogemelde verse. Ons sal die kinders van God kan liefhê wanneer ons God liefhet en Sy gebooie bewaar. En uit die aard van die saak sluit Sy gebooie in dat ons mekaar 70 x 7 keer moet vergewe, dat ons nie bitterheid jeens ander mense moet toelaat nie, dat ons diegene moet seën wat ons vervloek ensomeer.


Maar nou is die probleem dat ons almal nog al die jare gesê het: "Maar dis so moeilik!" En dit het ons laat grootword en laat dink dat ons nie in staat is om hierdie dinge reg te kry nie.

Tog leer die teksvers waarmee ons besig is, dat God se gebooie NIE SWAAR IS NIE. En hoekom is hulle nie swaar nie? Want as ons God liefhet, en uit liefde vir Hom Sy gebooie begin onderhou, gaan ons agterkom dat dit vir ons al hoe makliker raak om dit alles te kan begin doen. Want dan doen ons dit uit ons liefde vir Hom en nie uit enige dooie godsdienstige tradisies nie.

Kom ons vra dus hierdie week vir die Here om ons te leer om Hom al hoe meer lief te kry vir dit wat Hy alles vir ons gedoen het, steeds doen, en nog gaan doen in die ewigheid. En daarmee saam dat Hy ons dan sal leer om Sy kinders lief te hê met Sy liefde.

Wat daaruit gaan voortvloei, is dat ons dan Sy gebooie sommer gemaklik gaan onderhou en ons verhouding met Hom en ons medemens gaan begin geniet!


GEBED: 

"Vader, hierdie week wil ek U vra dat U my 'n hart sal gee om U lief te hê met die liefde wat U vir my het. En daarmee saam wil ek vra dat U my verder sal leer om myself te leer liefkry met U liefde, sodat ek my naaste kan begin liefhê soos myself. Laastens vra ek dat U my sal leer om U gebooie uit liefde uit te begin doen en dit te begin geniet tot U eer. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)