Hoe moet ons die Bybel bestudeer?

 

George Mueller was ‘n Pruis wat in Kroppenstaedt gebore is op 27 September 1805. Hy is na die Hemel op 10 Maart 1898, so kort voor sy 92e verjaardag. Hy het die groot Herlewing beleef wat in 1859 uitgebreek het en waarin honderde duisende mense gered is. Hy was 66 jaar lank predikant van die onafhanklike Calvinistiese Baptistekerk in Bristol, Engeland.

Mueller het reg  deur sy vrugbare lewe, gebede en geloof 'n groot weeshuis in Bristol in stand gehou. Hy vertel self hoe hy sy stiltetyd gehou het.

“Vroeër het ek in my binnekamer dadelik begin bid. Nou lees en oordink ek eers die Here se Woord. Ek lees die Woord van vooraf deur, maar elke oggend minstens een hoofstuk uit die Nuwe Testament. Eers vra ek die Here om my deur die werking van sy Heilige Gees deur die Woord te seën. Dan lees ek stadig en aandagtig. 'n Woord of gedagte of teks wat my aanspreek oordink ek.

“So praat die Here deur Sy Woord met my. Hy bemoedig my, of waarsku my, of ek raak oortuig van 'n verkeerde ding wat in my lewe is. Dit bring mee dat ek in die midde van my Bybellees 'n sonde bely, of ek dank die Here vir 'n seën waaraan ek nie voorheen gedink het nie. Of 'n teks gee my vrymoedigheid om iets van die Here te vra. Die Woord laat gebed in my hart ontwaak en terwyl ek voortgaande lees, bid ek vir myself of vir ander mense of vir die Here se werk.

“Dit het 'n groot verskil in my stiltetyd gemaak. Ek kon voorheen lank op my knieë wees, sonder om te ondervind ek is met die Here in aanraking. My gedagtes het afgedwaal en eers na 'n lang ruk het ek besef ek is mos besig om te bid. My stiltetyd het nou 'n gespreksvoering tussen die Here en myself geword. Ek word meer en meer bewus van die Persoon van die Here. "Die Gees staan ons ook in ons swakheid by: ons weet nie wat en hoe ons behoort te bid nie, maar die Gees self pleit vir ons met versugtinge wat nie met woorde gesê word nie" (Rom.8:26).

Ons het weer ‘n magtige Herlewing nodig. In jou stiltetyd en in gebedsgroepe, waar ook al, bid asseblief sonder ophou vir die Herlewing. – Sjibbolet

Indien jy geestelike berading of gebed benodig, kontak my, belindapaar@gmail.com

Weet jy waar jou kinders is?

 

Ouer waar is jou kinders? Hierdie skoolvakansie het ek net weereens besef in watter toestand ons jeug is.

Hoe stukkend moet 'n kind wees as hy/sy SELF hulp gaan soek? Ek het sedert Maandag 4 kinders gesien en nie een van hulle se eie ouers het eens geweet dat hierdie kinders kom hulp soek het nie....ek praat nie van "tannie my motorfiets het gebreek nie" ek praat van DIEP gewortelde seer wat hierdie kinders rond dra en hulle ouers sien dit nie eens raak nie!!

Moenie dink jou kind is 'n tiener en gaan deur 'n fase nie! Jou kind se rebelsheid, opstandigheid, teruggetrokkenheid, luiheid, losbandigheid is NIE 'n fase nie, dit is nie TIENER-STADIUM nie, Jou kind is seer, rou, ongelukkig, verwerp, sit met vrese in sy/haar sielsdimensie!!

Jy kry pragtige oumas wat regtig inspring en probeer help en ek dank die Here vir hulle, maar skokkend is daar ook oumas uit die hel uit! Ouma, as jy nie van jou skoondogter hou nie, moenie jou kleinkinders teen haar opmaak nie! Jy’t nie idee wat jy aan jou kleinkind doen nie!!!

En pa...as jy oulik genoeg kon wees om 'n kind te kan maak, wees oulik genoeg om vir jou kind te kan sorg.... Daar is soveel pa's wat skei en NOOIT weer enige verpligting het teenoor SY EIE kind of kinders nie!....en ek sluit ma's nie uit hier nie! As jy genoeg geld het vir drank....het jy sekerlik genoeg geld om te sien jou kind het kos en klere nodig....maar meer dat jou kind jou aanvaarding en liefde nodig het!

God het genoeg vertroue in jou as ouer gehad, om vir jou 'n kind of kinders te gee.... Dit is JOU VERANTWOORDELIKHEID om jou kind te versorg en lieftehe en reg groot te maak.

Weet jy wat doen dit aan my as 'n tiener seun my vasgryp en huil soos 'n klein dogtertjie omdat ek liefde aan hom betoon? Waar is die kind se ouers in sy lewe? Of as 'n dogter met rooi gesiggie vir my moet vertel dat sy seks het met enige iemand wat beskikbaar is omdat sy liefde soek?

Sien jou kind raak, praat met jou kind, weet waar jou kind is!! Ek het nou die dag 'n 12-jarige meisie 7uur in die straat op 'n sypaadjie gekry wat so onder die invloed van dwelms was dat sy nie huis toe kon loop nie, toe ek haar vra waar bly sy kan ek haar ouers gaan haal, is haar antw "tannie hulle gee nie om waar ek is nie"

Regtig is dit wat God van jou as ouer verwag? More lees ons in die koerant die kind is verkrag en vermoor dan wil almal die SAPS en wereld die skuld gee (en tot vir GOD) en die ouers jammer kry!! Maar waar was die ouers toe die kind in die nag op straat was??

Mag Jesus ons kinders beskerm, en ons ouers wakker maak want meeste ouers het nie 'n idee wat in hulle kinders se lewens aangaan nie!

Jesus Groete
Belinda

Indien jy geestelike berading of gebed benodig, kontak my, belindapaar@gmail.com