Die prys om te betaal

Daar is altyd ‘n prys om te betaal. Maak nie saak hoe groot, hoe klein, hoe duur of hoe goedkoop nie.

Ons kan ‘n prys op elke liewe item op aarde plaas en dit betaal, ja, selfs in vandag se tyd op iemand se lewe want vandag is selfs ons lewens nie meer prysloos nie.

Koop jy iets, betaal jy ‘n prys met geld. Doen jy iets uit liefdadigheid, betaal jy ‘n prys met tyd en liefde. Ontvang jy selfs iets, betaal jy die prys van dankbaarheid.

Maar, vir ons eie sondes is daar geen prys wat ons kan betaal wat sal keer dat ons in die hel opeindig nie. Daardie prys is so groot dat slegs Jesus Christus dit kon betaal en nie net vir jou en my sondes nie, vir AL die sondes in AL die wêreld in AL die tyd, verlede, hede en toekomstig, deur slegs een maal aan die kruis te hang op Golgota 2019 jaar terug!

Ons kan maar so soet en vriendelik en gehoorsaam en getrou wees soos ons wil, as dit nie vir Jesus se opoffering was nie, sou dit niks gehelp het nie, want Hy is die Een wat die volledige en finale prys betaal het, VIR ONS.
Dit is die prys waarop ons oog moet vestig in vandag se tyd. Nie wat ons betaal nie, maar wat HY REEDS betaal het.

Hebreërs 12:2  die oog gevestig op Jesus, die Leidsman en Voleinder van die geloof, wat vir die vreugde wat Hom voorgehou is, die kruis verdra het, die skande verag het en aan die regterkant van die troon van God gaan sit het.

In vandag se lewe is daar dalk baie groot en duur pryse wat ons moet betaal, alreeds betaal het of nog gaan betaal.

In die fisiese dimensie is dit meestal op finansies gefokus en alles wat betaal word, moet deur een of ander kommoditeit bepaal word. In die geestelike dimensie daarenteen, is die enigste prys wat ek en jy kan betaal vir dit wat Jesus vir ons gedoen het, niks anders as om te streef na ‘n lewe van 100% heiligmaking om Hom te eer en te dien te alle tye in alles wat ons doen, bv.

Alles op te offer vir Hom, want dis wat Hy gedoen het vir ons

Hebreërs 10:14  Want deur een offer het Hy vir altyd volmaak die wat geheilig word.

Alles te doen nie vir onsself of iemand anders nie, maar soos vir God

Kolossense 3:23  En wat julle ook al doen, doen dit van harte soos vir die Here en nie vir mense nie,

Heilig te lewe in alles wat ons doen

1Petrus 1:16  …Wees heilig, want Ek is heilig.

En nog soveel ander dinge, dat ek nie alles reël op reël kan benoem nie, maar weet dit, dat ALLES wat ons is, doen en nog gaan wees, moet, sonder dat ons woorde gebruik, uitskree: “Jesus is my alles!”

Gebed

Onse Vader wat in die hemel is, ek dank U dat U seun Jesus Christus die finale genoegsame prys betaal het vir my sondes aan die kruis op Golgota. Hernuwe asseblief hiermee die begeerte in my hart om alles wat ek doen, te doen uit dankbaarheid met die wete dat die prys betaal is en dat ek gered is deur Hom.
Heilige Gees lei my asseblief dat ek my lewe so kan lei dat ander mense Jesus in my sal sien.
Amen


Geskryf deur: hein henning
(heinh@sunlightfs.co.za)

Jou woorde....

Min mense besef wat die krag is in jou woorde en omdat woorde die wyse is waarmee die mensdom met mekaar kommunikeer, is die mens nie ingestel om te let op jou woorde nie. Die Bybel is egter baie duidelik dat daar dood en lewe in mens se woorde is, nogtans kies ons om maar die woorde net oor ons lippe te laat rol en baie keer is dit vir ons tot verderf instede van lewe.

Spr 18:20  Van die vrug van iemand se mond word sy maag versadig; hy word versadig van die opbrings van sy lippe.
Spr 18:21  Dood en lewe is in die mag van die tong; en elkeen wat dit graag gebruik, sal die vrug daarvan eet.

Wat baie mense egter nie besef nie, is dat mens kan opbou en afbreek met jou woorde en dat woorde baie dieper letsels laat as wat 'n steekwond kan doen. Deur jou woorde kan jy stig en deur jou woorde kan jy mense wegdryf van jou af en selfs van Christus af.

Kol 4:6  Laat julle woord altyd aangenaam wees, met sout besprinkel, sodat julle kan weet hoe julle iedereen moet antwoord.

Baie keer wil ons só maklik iemand reghelp met die Bybelse dinge en dan dink ons nie altyd daaraan dat daardie persoon nie dinge verstaan soos wat ek doen nie en somtyds is daardie persoon nog besig om sy voete in die geloof te vind, dan kom ek met my hoogmoedige aanmerkings of kommentaar en doen dan skade aan die koninkryk, omdat dit die ander persoon wegdryf van Christus af.

Dit is beter om te wag op die leiding van die Heilige Gees oor wanneer om wat te sê, as om net soos 'n haelgeweer af te gaan en 'n gat te skiet in iemand anders se wandel in Christus. Baie keer maak dit dat daardie persoon só minderwaardig voel omdat hy nie kan verstaan soos jy dit doen nie en dan besluit hy om liewer maar handdoek in te gooi en weg te draai. Baie keer is dit ook die hoogmoed wat stink in sy neusgate en dat hy dan besluit om liewer weg te stap van Christenskap af.

Baie keer moet ons maar soos Paulus liewers bid en vra vir 'n deur om geopen te word, sodat ons op die regte tyd sal spreek en dat ons woorde met sout besprinkel mag wees, sodat dit nie 'n swak smaak agter los nie.

Kol 4:3  en bid tegelykertyd ook vir ons, dat God vir ons die deur van die woord mag open om te spreek van die verborgenheid van Christus, waarvoor ek ook in boeie is,
Kol 4:4  dat ek dit openbaar kan maak soos ek dit behoort te spreek.


GEBED: 
Vader, ek bely dat ek baie keer deur my woorde al mense van U af weggestoot het en ook aanstoot gegee het deur hoogmoedige woorde...vergewe my asseblief en help my dat ek ook verborgenhede van Christus sal openbaar maak soos ek dit behoort te spreek en ook wanneer ek dit moet spreek...amen!

Geskryf deur: ernest phillipson
(ecp@oicb.co.za)

Nader tot God!

Jakobus 4:8: "Nader tot God, en Hy sal tot julle nader. Reinig die hande, julle sondaars, en suiwer die harte, julle dubbelhartiges!"

Baie mense is gou om te sê dat dit vir hulle voel of God "ver" van hulle af is. Maar gewoonlik is die rede bloot omdat hulle nie doen wat in hierdie teksvers staan nie, naamlik dat hulle hulle EERSTE tot God moet nader, en dan sal Hy tot hulle nader.

God wil hê ek en jy moet die eerste stap neem om na Hom toe te kom, Hy doen dit nie namens ons nie. Net soos wat ons lees in die verhaal van die verlore seun, was dit die verlore seun wat tot homself moes kom en moes terugkeer na sy vader se huis. Die vader het hom nie uit die varkhok kom haal nie, hy moes self die besluit neem, en toe die besluit volvoer deur op te staan en na sy vader se huis terug te stap.

En dan lees ons dat die vader hom van ver af sien kom het, en toe na hom toe gehardloop het om hom te  verwelkom. Op dieselfde wyse wag ons Hemelse Vader dat ons ook tot onsself sal kom en sal terugkeer na Hom, maar ONS moet die eerste stap neem.


Die probleem is dat die meeste mense nie bereid is om daardie stap te neem nie, want hulle is nie bereid om te doen wat die tweede deel van die teksvers leer nie, naamlik om hulle hande te reinig, en hulle harte te suiwer nie.

Met ander woorde, om op te hou om die verkeerde dinge te DOEN, en verkeerde dinge in hulle harte toe te laat.

Die punt is egter, as ons eerste tot God nader, sal Hy tot ons nader, en ons dan Sy krag gee om dit wat ons vasbind in die verkeerde dinge in ons lewens, te kan oorwin.

Geliefde van God, moenie hierdie week verder weghardloop van God af nie. Nee, nader tot Hom, gaan na Hom toe met jou probleme, jou sondes, jou swakhede, en Hy sal tot jou nader en jou help om in oorwinning te kom oor al daardie dinge in jou lewe - wat dit ookal mag wees.


GEBED: 

"Vader, hierdie week wil ek tot U nader met al my probleme, my sondes en my swakhede. Gee my asseblief U krag om in my alledaagse bestaan tot U te nader, om my hande te reinig en my hart te suiwer en nie meer dubbelhartig te wees nie. En help my asseblief verder om in U krag in oorwinning te lewe oor die aanslae wat teen my kom en my wil oortuig om eerder weg te hardloop van U af. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)

Wees geduldig!

Geduldig

Hierdie is seker een karaktereienskap van die vrug van die Heilige Gees wat baie mense in vandag se lewe, moeilik vind om uit te leef. Veral in die lig van die gejaagdheid van die lewe met al die uitdagings daarvan, het min kinders van die Here lus om geduldig te wees. Daar is te veel druk wat geplaas word op prestasies en is daar ook gewoonlik te min ure in die dag vir alles. Daar word dan ook van God verwag om spoedige antwoorde op gebede te gee en word daar gewoonlik te min tyd spandeer om 'n saak deur te bid en te wag op God se perfekte antwoord op die perfekte tyd.

Jak 5:7  Wees dan geduldig, broeders, tot op die wederkoms van die Here. Kyk, die landbouer wag op die kostelike vrug van die aarde en het geduld daarmee totdat dit die vroeë en die laat reën ontvang het.
Jak 5:8  Julle moet ook geduldig wees; versterk julle harte, want die wederkoms van die Here is naby.

Aangesien mense nie bereid is om geduldig te wag nie, neem hulle gewoonlik verkeerde besluite of soms ook die regte besluit op die verkeerde tyd. God werk nie volgens 'n horlosie of kalender nie en lees ons ook in die boek van Daniël dat die engel elke keer berig gebring het dat God se antwoord oombliklik uitgestuur was.

Dan 9:21  terwyl ek nog spreek in die gebed, het die man Gabriël wat ek, uitgeput van vermoeienis, ‘n vorige keer in die gesig gesien het, na my gekom omtrent die tyd van die aandspysoffer.
Dan 9:22  En hy het my onderrig en met my gespreek en gesê: Daniël, nou het ek heengegaan om jou insig te gee.
Dan 9:23  By die begin van jou smekinge het ‘n woord uitgegaan, en ek het gekom om dit mee te deel, want jy is ‘n geliefde man; gee dan ag op die woord en verstaan die gesig.

Dan 10:12  Toe sê hy vir my: Wees nie bevrees nie, Daniël; want van die eerste dag af dat jy jou hart daarop gerig het om ag te gee en jou voor die aangesig van jou God te verootmoedig, is jou woorde gehoor, en om jou woorde ontwil het ek gekom;

In beide gevalle lees ons dat Daniël onmiddelik verhoor is, maar het die antwoord 'n tyd lank gevat om by hom te kom, aangesien daar weerstand gebied word uit die koninkryk van duisternis. Ons moet altyd daarvan bewus wees dat die duiwel nie wil hê dat ons ontvang wat God vir ons bestem nie en dat hy magte en owerhede opgestel het om te verhinder, of om dit wat na ons toe moet kom, te vertraag.

Wat dan as Vader tog besluit om soms bietjie terug te hou op Sy raad of antwoord om ons geloof te toets of om ons te laat groei in ons verhouding met Hom? Sal ons dan nogsteeds getrou en gehoorsaam bly?

2Pe 3:8  Maar laat hierdie een ding julle nie ontgaan nie, geliefdes, dat een dag by die Here soos duisend jaar is en duisend jaar soos een dag.
2Pe 3:9  Die Here vertraag nie die belofte soos sommige dit vertraging ag nie, maar Hy is lankmoedig oor ons en wil nie hê dat sommige moet vergaan nie, maar dat almal tot bekering moet kom.

Hierdie verse verwys in konteks na Jesus se wederkoms, maar dink ek dat dit ook reël op reël in hierdie verband gebruik kan word, aangesien dit ook verwys na spotters wat in hierdie laaste dae sal vra wanneer die koms van die Here dan sal wees, aangesien dit lank al verkondig word. Netsó is daar ook mense wat die spot dryf indien ek en jy besluit om te wag op die Here en veral as hulle sien dat ons deurbraak of antwoord nie vinnig genoeg, volgens wêreldse standaarde, afgelewer word nie.

Die vraag is dan: “Is jy bereid om te wag op die Here en Hom alleen te vertrou?”

Psa 27:14  Wag op die Here! Wees sterk en laat jou hart sterk wees! Ja, wag op die HERE!

Psa 37:34  Kof. Wag op die HERE en hou sy weg, en Hy sal jou verhoog, om die aarde te besit; jy sal met welgevalle neersien op die uitroeiing van die goddelose mense.

Psa 130:5  Ek wag op die HERE; my siel wag, en ek hoop op sy woord.

Spr 20:22  Moenie sê: Ek wil die kwaad vergelde nie! Wag op die HERE, dat Hy jou help.

Jes 40:29  Hy gee die vermoeide krag en vermenigvuldig sterkte vir die wat geen kragte het nie.
Jes40:30  Die jonges word moeg en mat, en die jongmanne struikel selfs;
Jes 40:31  maar die wat op die HERE wag, kry nuwe krag; hulle vaar op met vleuels soos die arende; hulle hardloop en word nie moeg nie, hulle wandel en word nie mat nie.

Ek ken nie jou omstandighede nie en ek weet ook nie waarop jy wag en hoé lank jy al wag nie, maar God weet!!! Ek weet dat dit die moeite en wag werd is om God te vertrou en jou hoop op Hom te plaas! Ek wil jou dus bemoedig om te volhard en geloof te behou.

Mat 24:13  Maar wie volhard tot die einde toe, hy sal gered word.

GEBED:
Hemel Vader, U weet alles en U weet wat die beste vir ons is en wat die regte tyd is vir U antwoord, daarom vra ek dat U ons met Jesus krag versterk sodat ons met geduld en afwagting sal wag op U antwoord...amen!


Geskryf deur: ernest phillipson
(ecp@oicb.co.za)