Hoe moet ek vertrou?

Met ons hele hart!

(Spreuke 3:5,6): “Vertrou op die HERE met jou hele hart en steun nie op jou eie insig nie. Ken Hom in al jou weë, dan sal Hy jou paaie gelykmaak.”

Ons is baie kere geneig om te sê ons vertrou op die Here. Maar doen ons dit werklik met ons hele hart? Want baie kere is dit makliker om eerder op ons eie insig staat te maak. Ons bid so een of twee maal oor ‘n saak, en as ek nie gou genoeg ‘n antwoord van die Here af kry nie, dan maak ek maar my eie plannetjies.

Tog sê vers 6 dat ons Hom moet ken in AL ons weë. Hoekom? Juis sodat Hy ons paaie kan gelykmaak. En wat is AL jou weë? ALLES wat ons kan doen. Maak van vandag af ‘n punt daarvan om ons Hemelse Vader te ken in ALLES wat jy doen, insluitende hoe jy optree teenoor jou huweliksmaat, hoe jy optree teenoor jou ouers of kinders, wat jy moet doen by die werk en moet optree teenoor werkskollegas, hoe jy jou finansies moet aanwend in elke area van jou lewe, ensomeer.

In Lukas 6:46 vra Jesus vir ons waarom noem ons Hom Here, here, maar ons DOEN NIE wat Hy sê nie? As Hy dus vir ons sê om op Hom te vertrou met ons hele hart en om Hom te ken in AL ons weë, dan is dit immers wat ons moet DOEN indien ons die die resultate wil sien wat die Bybel ons leer, naamlik dat Hy dan ons paaie sal gelykmaak. Baie kere is ons paaie maar vol heuwels en gate en blokkasies, bloot omdat ons Hom nie met ons HELE hart vetrou nie en Hom ook nie ken in AL ons weë nie.

Mag Hy jou in hierdie week lei en leer om Hom te vertrou met jou HELE hart en om Hom te ken in AL jou weë.

Gebed:

Hemelse Vader, ek kom na U in die Naam van U Seun, Jesus Christus. Here, ek bely vandag dat ek U nie altyd vertrou het met my hele hart nie, en U ook nie geken het in al my weë nie, en ek bid dat U my asseblief daarvoor sal vergewe. Dankie Here dat ek weet U vergewe my daarvoor, en nou vra ek dat U my asseblief van vandag af sal leer om U werklik te vertrou met my hele hart en om U te ken in al my weë. En dankie dat ek weet dat U dan my paaie sal gelykmaak, want U is altyd getrou aan U Woord. In Jesus Naam. Amen.

 (tiaan gildenhuys - tg@oicb.co.za)
Geplaas met toestemming van Tiaan Gildenhuys

Bid of vergaan! - Gratis e.boek

 Wekroep!

Wetenskaplikes het die Oordeelsdag Horlosie nader gedraai aan middernag

soos wat toestande in die wêreld verder versleg het. Ook in SA gaan dit nie

goed nie. Gelowiges kan egter enige situasie omkeer deur vurige gebed. Die

e-boekie “Bid of Vergaan” kan op aanvraag verkry word, en verder versprei

word. Dit handel oor die krag van gebed en hoe om die situasie in Suid-Afrika

deur gebed om te keer.


As u die gratis e-boekie wil bekom kontak my by belindapaar@gmail.com.

Wat as more nie kom nie?

As ons rondom ons kyk in hierdie tyd waarin ons leef, kan ons duidelik sien hoé Jesus se eie woorde aangaande die eindtye in vervulling gaan...dat dit sal wees soos in die dae van Noag of dan soos Paulus dit stel aan Timotheüs in sy twee briewe:

1Tim 4:1  Maar die Gees sê uitdruklik dat in die laaste tye sommige van die geloof afvallig sal word en verleidende geeste en leringe van duiwels sal aanhang

1Tim 4:2  deur die geveinsdheid van leuenaars wat gebrandmerk is in hulle eie gewete,

2Tim 3:1  Maar weet dit, dat daar in die laaste dae swaar tye sal kom.

2Tim 3:2  Want die mense sal liefhebbers van hulleself wees, geldgieriges, grootpraters, trotsaards, lasteraars, ongehoorsaam aan hulle ouers, ondankbaar, onheilig,

2Ti m3:3  sonder natuurlike liefde, onversoenlik, kwaadsprekers, bandeloos, wreed, sonder liefde vir die goeie,

2Ti m3:4  verraaiers, roekeloos, verwaand, meer liefhebbers van genot as liefhebbers van God;

2Ti m3:5  mense wat ‘n gedaante van godsaligheid het, maar die krag daarvan verloën het. Keer jou ook van hierdie mense af.

Baie mense...en menige kinders van die Here ook...lewe asof daar nog 'n dag van môre sal wees. Daar is ook dan groot verdeeldheid onder die kinders van die Here oor wanneer Jesus weer gaan kom...sommige meen dat daar 'n “wegraping” sal wees, ander meen dat die ongelowiges weggeneem sal word en dat die heiliges hier op aarde gaan bly en ander meen weer dat die wederkoms nog baie vér in die toekoms is.

Afgesien van watter een van die gebeurlikhede jy voorstaan, wat van as die dag van môre vir jou nie aanbreek nie? Is jy gereed om jou Skepper te ontmoet? Ek het menige kinders van God in die laaste jaar bedien wie gemeen het dat hulle gereed is en daar was selfs een of twee wat só gely het as gevolg van pyn, dat hulle gebid en begeer het om dood te gaan. Uit gesprekke met hulle het ek afgelei dat daar egter nog onvergifnis en of bitterheid in hul harte was oor mense wie hul nie wil vergeef nie, omdat hulle só seergekry het.

Ek verstaan egter van die woord van God, dat as jy nog onvergifnis teenoor enige persoon het, jy die poorte van die hemel nie sal binnegaan nie. Toe ek dit met hulle deel, was almal van hulle eweskielik baie lus vir lewe en ook bereid om die ander partye vry te spreek. My oortuiging is na aanleiding van die volgende Skrifte:

1Joh 3:15  Elkeen wat sy broeder haat, is ‘n moordenaar; en julle weet dat geen moordenaar die ewige lewe as iets blywends in hom het nie.

Mat 6:14  Want as julle die mense hulle oortredinge vergewe, sal julle hemelse Vader julle ook vergewe.

Mat 6:15  Maar as julle die mense hulle oortredinge nie vergewe nie, sal julle Vader julle oortredinge ook nie vergewe nie.

Afgesien van die heiliges wie nog nie heeltemal gereed is vir die poorte van die hemel nie, is daar 'n menigte mense rondom ons en in ons eie huise wie nog nie gered is nie! Jesus self het dit ook voorspel dat daar verdeeldheid in 'n mens se eie huis sal wees...man en vrou wat nie in dieselfde kamp is nie, kinders wat opstandig is, familie en vriende wat 'n bespotting maak van die gelowiges, ens.

Die vraag is of ons werklik genoegsaam vrug dra sodat die ander kan jaloers raak op dit wat ons het? 'n Vriend het my gister vertel van 'n kollega van hom wie hom onlangs gevra het hoé 'n mens kan word soos hy is. Tereg het my vriend ook dan gesê dat hierdie kollega natuurlik glad nie gereed was vir die antwoord nie en ook nog nie op 'n punt is waar hy bereid is om sy lewe vir Jesus te gee nie.

Tog sê die skrif duidelik:

Heb 4:6  Terwyl dit dan so is dat sommige daar ingaan, en diegene aan wie die evangelie eers verkondig is, deur ongehoorsaamheid nie ingegaan het nie,

Heb 4:7  bepaal Hy weer ‘n sekere dag, naamlik vandag, as Hy soveel later deur Dawid spreek, soos gesê is: Vandag as julle sy stem hoor, verhard julle harte nie.

Die realiteit is dat daar nog geleentheid is vir mense om te bekeer en tot inkeer te kom, solank dit nog vandag is. Môre is vir niemand gewaarborg nie!

Daar is slegs een manier om in die hemel te kom en dit is om Jesus Christus van Nasaret aan te neem as Redder, Verlosser en Saligmaker en om weg te draai van die sondige weë!

Ek en jy het nog geleentheid om ander na Jesus te trek deur die wyse waarop ons optree en lewe en ook om ons eie lewens reg te kry, sodat ons die poorte van die hemel kan ingaan.

1Tim 3:5  Maar as iemand nie weet om sy eie huis te regeer nie, hoe sal hy vir die gemeente van God sorg dra?

1Tim 3:7  Maar hy moet ook goeie getuienis hê van die buitestaanders, sodat hy nie in veragting en in die strik van die duiwel val nie.

Gebed:

Hemelse Vader, gee ons 'n dringendheid in ons hart om volkome oor te gee aan U en met 'n wederkoms verwagting, elke dag, heilig te lewe. Gee aan ons ook U liefde vir ander mense, sodat ons ook sal omgee vir hul redding en dat ons waardige getuies vir U sal wees in ons handel en wandel...amen

(ernest phillipson - ecp@oicb.co.za)
Geplaas met toestemming van Tiaan Gildenhuys.

Jy sal nooit honger wees nie!

Iets so eenvoudig soos brood

  

Hoe gemaklik het ons nie geword in vandag se alles onmiddelik beskikbare lewe nie. Brood is op elke hoek van die straat, in amper elke winkel, aanlyn, in skole, in kerke, 24 uur van die dag beskikbaar.

Tog is daar mense wat selfs nie eers ‘n brood het om te eet nie, al is dit so maklik verkrygbaar.
Party mense wil nie eers brood hê, al is dit verniet nie.

Hierdie geld presies net so ook in die geestelike realm, soos in die fisiese hier op aarde.

Jesus sê in Joh 6:35 Ek is die brood van die lewe; wie na My toe kom sal nooit honger kry nie;…

Die brood van die lewe, Jesus Christus, is vrylik, orals en altyd beskikbaar vir enige iemand (en almal) wat dit WIL eet. Brood word nooit in ons kele af geforseer nie, beide in die fisiese en geestelike wereld. Dis ‘n vrye wils keuse.

As ons in ons huise nie brood het om tee et nie, ry ons sommer gou en gaan koop brood. Ons hoef egter nie eers iewers heen te ry om die brood van die

Lewe VERNIET te kry nie. Lees net Sy Woord.

Kind van God, wanneer ons die brood van die Lewe proe, brand daar ‘n honger in ons harte vir meer en meer, nog en nog, sonder ophou. Dit is Jesus, die brood van die Lewe.

Hy is ons voorbeeld selfs met iets so eenvoudig soos brood.

Hy is ons daaglikse brood:

Matt 6:11  gee ons vandag ons daaglikse brood

Luk 11:3  gee ons elke dag ons daaglikse brood

Sy liggaam is ons ewige brood:

Matt 26:26 en Mark 14:22    En terwyl hulle eet, neem Jesus die brood, en nadat Hy gedank het, breek Hy dit en gee aan sy dissipels en sê: Neem, eet, dit is my liggaam.

Luk 22:19  Daarop neem Hy die brood, en nadat Hy gedank het, breek Hy dit en gee dit aan hulle en sê: Dit is my liggaam wat vir julle gegee word; doen dit tot my gedagtenis.

Die Woord bevestig ook dat Jesus die Ware brood van die Lewe is:

Joh 6:33  Want die brood van God is Hy wat uit die hemel neerdaal en aan die wêreld die lewe gee.

Joh 6:48  Ek is die brood van die lewe.

Joh 6:58  Dít is die brood wat uit die hemel neergedaal het – nie soos julle vaders die manna geëet en gesterwe het nie; wie hierdie brood eet, sal tot in ewigheid lewe.

Wanneer ons van hierdie wonderlike, kosbare, ewige brood eet, word ons een in Christus:

1 Kor 10:17  Omdat dit een brood is, is ons almal een liggaam, want ons het almal deel aan een brood.

Ek hoop dat jy sal honger na die ware brood van die ewige Lewe wat regtig saak maak.

Gebed:         

Jesus Christus, brood van die Lewe, gee my asb ‘n honger vir meer van U lewensbrood sodat ek daardeur een kan word met U en gevoed kan wees tot in alle ewigheid, amen!


(hein henning - heinh@sunlightfs.co.za)
Geplaas met toestemming van Tiaan Gildenhuys

Ek vertrou op die Here

Hoeveel keer het ek en jy nie al gehoor dat mense sê dat hulle die Here vertrou vir dit of vir dat nie...en baie kere het ons self ook daardie verklaring gemaak, maar wanneer die papaja die “fan” slaan, dan skarrel ons vinnig rond om self planne te maak vir die uitkoms wat ons graag wil sien of hê! Baie kere is hierdie planne dan tot ons nadeel en dompel dit ons soms ook in 'n spul skuld wat moeilik is om af te betaal.

Ek het ook al baie kere gehoor dat mense sê dat die Here vir hulle sekere dinge gesê het om te doen of nie te doen nie, en dan is die uitkoms daarvan ook nie tot hul voordeel nie. Ek het ook die afgelope week gehoor dat iemand sê dat die Here duidelik vir hom gesê het om al sy geld uit een belegging uit te haal en oor te plaas na 'n ander...en toe plaas hy net die helfte oor.

Die vraag in bogenoemde geval, is dus: “is ons werklik oortuig dat ons die Here se stem hoor ..en indien wel, hoekom doen ons dan nie wat Hy sê nie..of is dit 'n geval van die misbruik van die heilige Naam van God?”

Die ander vraag natuurlik, is: “hoekom sal ons eerder kies om te vrees en te kommer as om met geduld en geloof te wag op die Here se uitkoms...as ons dan beweer dat ons op Hom vertrou?”

Die Bybel sê tog duidelik:

Spr 3:5  Vertrou op die HERE met jou hele hart en steun nie op jou eie insig nie.

Spr 3:6  Ken Hom in al jou weë, dan sal Hy jou paaie gelykmaak.

Spr 3:7  Wees nie wys in jou eie oë nie; vrees die HERE, en wyk af van die kwaad;

Ps 146:3  Vertrou nie op prinse, op die mensekind, by wie geen heil is nie.

Jer 17:5  So sê die HERE: Vervloek is die man wat op die mens vertrou en vlees sy arm maak, terwyl sy hart van die HERE afwyk.

Waar staan ek en jy wat hierdie saak betref, want die Bybel sê tog ook duidelik dat ons eers die balk uit ons eie oog moet haal! En dan waarsku die Bybel ook dat as ons ons oor die dag van môre bekommer, dan is ons in werklikheid maar net soos die heidene.

Mat 6:31  Daarom moet julle jul nie kwel en sê: Wat sal ons eet, of wat sal ons drink, of wat sal ons aantrek nie?

Mat 6:32  Want na al hierdie dinge soek die heidene; want julle hemelse Vader weet dat julle al hierdie dinge nodig het.

As ons dan beweer dat ons op God vertrou, hoekom sukkel ons dan met die geloof -deel wat daarmee moet saamgaan? Die realiteit is dat die meeste mense só ingestel is op die dinge wat ons kan sien, hoor of aanraak dat dit ons meer laat fokus op die vlees as op die gees. God is egter getrou aan Sy woord en beloftes en sal ons nooit in die steek laat as ons kies om ons geloof en vertroue volkome in Hom te stel nie!

Ps 37:3  Bet. Vertrou op die HERE, en doen wat goed is; bewoon die aarde en beoefen getrouheid,

Ps 37:4  en verlustig jou in die HERE; dan sal Hy jou gee die begeertes van jou hart.

Ps 37:5  Gimel. Laat jou weg aan die HERE oor en vertrou op Hom, en Hy sal dit uitvoer;

Fil 4:19  En my God sal elke behoefte van julle vervul na sy rykdom in heerlikheid deur Christus Jesus.

Heb 13:5  Julle gedrag moet vry van geldgierigheid wees. Wees tevrede met wat julle het, want Hy het gesê: Ek sal jou nooit begewe en jou nooit verlaat nie.

Heb 13:6  Daarom kan ons met alle vrymoedigheid sê: Die Here is vir my ‘n Helper, en ek sal nie vrees nie; wat sal ‘n mens aan my doen?

Geloof is egter nie 'n maklike saak nie en dit verg dat jy alles moet neerlê voor God en in totaliteit oorgee aan Hom met die wete dat jou hoop nie beskaam sal word nie. Dit bly egter 'n keuse wat net ek en jy kan maak!

Luk 18:7  Sal God dan nie reg doen aan sy uitverkorenes wat dag en nag tot Hom roep nie, al is Hy ook lankmoedig in hulle geval?

Luk 18:8  Ek sê vir julle dat Hy gou aan hulle reg sal doen; maar as die Seun van die mens kom, sal Hy wel die geloof op die aarde vind?


Joh 16:7  Maar Ek sê julle die waarheid: Dit is vir julle voordelig dat Ek weggaan; want as Ek nie weggaan nie, sal die Trooster nie na julle kom nie; maar as Ek weggaan, sal Ek Hom na julle stuur;

Joh 16:8  en as Hy kom, sal Hy die wêreld oortuig van sonde en van geregtigheid en van oordeel:

Joh 16:9  van sonde, omdat hulle in My nie glo nie;

GEBED:  Vader, vergewe ons kleingelowigheid en die feit dat ons meer op onsself en ander mense vertrou as om te bly hoop op U en te glo dat U 'n Waarmaker van U woord is. Help ons Heilige Gees om geloof te behou en te fokus op U woord instede van dit wat ons kan sien, hoor of voel...amen!

(ernest phillipson - ecp@oicb.co.za)
Geplaas met toestemming van Tiaan Gildenhuys

Wat doen ek as mense my haat?

 SPRING OP EN WEES BLY!

“Salig is julle wanneer die mense julle haat, en wanneer hulle julle verstoot en beledig en jul naam weggooi soos iets wat sleg is, ter wille van die Seun van die mens. Wees bly in daardie dag en spring op, want kyk, julle loon is groot in die hemel…” (Lukas 6:22,23)

Dalk is dit hoe dit daagliks of weekliks daar by jou werk gaan, of selfs in jou huwelik, of in jou familie. Moontik word jy ook gespot, verkleineer of sleggesê omdat jy opstaan en standpunt inneem vir Jesus Christus. Moontlik word jy ook verstoot en beledig en jou naam ook weggegooi soos iets wat slegs is, ter wille van Jesus Christus in jou lewe.

Moenie dat dit jou onderkry nie. Glad nie. Inteendeel.

Lees gerus wat sê die Bybel wat jy in werklikheid moet doen wanneer so iets met jou gebeur – wees bly en spring op! Hoekom? Want jou loon is groot in die hemel! Nie hier op aarde nie. Hier is dit nie lekker wanneer so iets met jou gebeur nie, maar eendag wanneer ons voor die Troon van Jesus staan en ons beloning van Hom ontvang daarvoor, sal al die pyn en emosies as gevolg daarvan hier op aarde, totaal vergete wees.

Ek wil graag hê jy moet bemoedig word hierdeur, dat jy mag weet dat alhoewel dit in die huidige nie baie lekker is om hierdie dinge te beleef nie, dat dit uiteindelik ewige belonings vir jou tot gevolg sal hê.

Gebed:

Vader, ek kom na U in die Naam van Jesus Christus en ek dank U dat ek bemoediging daaruit kan ontvang wanneer mense my verstoot en beledig en my naam weggooi soos iets wat slegs is, ter wille van die Here Jesus Christus in my lewe. Dankie dat ek mag weet dat dit beteken dat my loon in die hemel eendag groot sal wees as gevolg daarvan. Leer my net om hulle wat my so vervolg, te seën en steeds lief te hê, net soos wat Jesus dit gedoen het. Amen.

(tiaan gildenhuys - tg@oicb.co.za)
Geplaas met toestemming van Tiaan Gildenhuys

Eet die Brood!

Joh 6:32  En Jesus sê vir hulle: Voorwaar, voorwaar Ek sê vir julle, dit is nie Moses wat die brood uit die hemel aan julle gegee het nie, maar my Vader gee julle die ware brood uit die hemel.

Joh 6:33  Want die brood van God is Hy wat uit die hemel neerdaal en aan die wêreld die lewe gee.

Joh 6:34  Toe sê hulle vir Hom: Here, gee ons altyd hierdie brood.

Joh 6:35  En Jesus sê vir hulle: Ek is die brood van die lewe; wie na My toe kom, sal nooit honger kry nie; en wie in My glo, sal nooit dors kry nie.

In hierdie deel lees ons dat die skare mense van Jesus 'n teken vra sodat hulle in Hom kon glo en herinner hulle Hom aan die manna wat hul voorvadders in die woestyn, uit die hemel ontvang het. Jesus herinner hulle daaraan dat die brood uit die hemel van God af gekom het en nie deur die hand van Moses nie.

Dan gaan Hy voort en maak hierdie stelling dat Hy die ware brood is wat volkome kan versadig en dat elkeen wat van Hom eet en in Hom glo, nie verlore sal gaan nie. Dit was natuurlik 'n vreeslike woord vir die mense om te aanvaar, aangesien die werklike betekenis daarvan vir hulle verborge was.

In Openbaring lees ons dat Jesus in werklikheid ook die lewende Woord van God is. Dit beteken dus dan dat as ons Jesus as brood moet eet, dat ons die Woord van God moet “eet” deur dit te bestudeer en te glo, elke dag van ons lewens!

Opb 19:11  Toe het ek die hemel geopend gesien; en daar was ‘n wit perd, en Hy wat daarop sit, word genoem Getrou en Waaragtig, en Hy oordeel en voer oorlog in geregtigheid.

Opb 19:12  En sy oë was soos ‘n vuurvlam, en op sy hoof was baie krone; en Hy het ‘n Naam wat geskrywe is, wat niemand ken nie, behalwe Hy self.

Opb 19:13  En Hy was bekleed met ‘n kleed wat in bloed gedoop was, en sy Naam is: Die Woord van God.

Toe Jesus deur Satan in die woestyn versoek is en hy aan Jesus voorgestel het om brood van die klippe te maak omdat Hy honger was, het Jesus hom terug verwys na dit wat geskrywe was in Deut 8: 3...dat die mens nie net van brood sal lewe ne, maar van elke woord wat uit God se mond gaan. Dit was dus alreeds 'n heenwyser na Jesus Christus as die enigste Weg na die ewige lewe.

Deu 8:3  En Hy het jou verootmoedig en jou laat honger ly en jou die manna laat eet wat jy en jou vaders nie geken het nie, om aan jou bekend te maak dat die mens nie van brood alleen lewe nie, maar dat die mens lewe van alles wat uit die mond van die HERE uitgaan.

As ons dan na die wetenskaplike sy gaan kyk van wat met brood gebeur sodra dit in die mens se maag volkome verteer is, dan sien ons dat dit deur die hele liggaam versprei word en dat dit dan wetenskaplik onmoontlik is om dit te kan onderskei as weefsel geneem en ondersoek word.

Net só is die Woord van God veronderstel om só deel van ons hele lewenswandel te moet wees, dat ons ononderskeibaar van Christus sal wees!

In die boek van Spreuke lees ons dan ook dat as ons die Here só intiem ken en in verhouding met Hom lewe, sal dit ook vir ons genesing wees!


Spr 3:5  Vertrou op die HERE met jou hele hart en steun nie op jou eie insig nie.

Spr 3:6  Ken Hom in al jou weë, dan sal Hy jou paaie gelykmaak.

Spr 3:7  Wees nie wys in jou eie oë nie; vrees die HERE, en wyk af van die kwaad;

Spr 3:8  dit sal genesing wees vir jou liggaam en verkwikking vir jou gebeente.


Liewe leser, "eet" jy al op hierdie wyse van die Brood van die Lewe?


Gebed:  Vader gee my asseblief 'n nuwe honger vir die ware Brood van die lewe en Heilige  Gees, bring my in 'n meer intieme verhouding met die Heilige en Almagtige God, Jesus Christus van Nasaret...Amen!


(ernest phillipson - ecp@oicb.co.za)
Geplaas met toestemming van Tiaan Gildenhuys

Profete vir die nasies

(Jeremia 1:4,5): - “Die woord van die HERE het dan tot my gekom en gesê: Voordat Ek jou in die moederskoot gevorm het, het Ek jou geken; en voordat jy uit die liggaam voortgekom het, het Ek jou geheilig; Ek het jou tot ‘n profeet vir die nasies gemaak. Toe het ek gesê: Ag, Here HERE, voorwaar, ek kan nie praat nie, want ek is jonk. Maar die HERE het vir my gesê: Moenie sê: Ek is jonk nie; want na wie Ek jou ook al stuur, moet jy gaan; en wat Ek jou ook al beveel, moet jy spreek.”

Het jy al die bogemelde teksverse mooi bestudeer? En het jy dit al vir jouself toegeëien? Want alhoewel mense kan argumenteer dat dit in die “konteks” eintlik op Jeremia van toepassing sou wees, het ek geen twyfel dat die Here dit ook vir JOU en MY sê nie, ongeag wat jou naam is.

Daar sien ons ‘n paar interessante dinge waarvan elkeen van ons beslis moet kennis neem. Eerstens sien ons dat God elkeen van ons geken het reeds van voor ons geboorte af al, en dat Hy ons aangestel het as profete vir die nasies. Hoekom? Want Sy opdrag in Mattheus 28:19 is immers dat ons moet gaan dissipels maak van al die nasies. Jou skeppingsdoel op hierdie aarde is dus nie om bloot maar net ‘n sekretaresse te wees nie, of ‘n dokter, of ‘n meganikus, of ‘n onderwyser, of ‘n ingenieur nie.

Nee, jou ware skeppingsdoel is om ‘n profeet te wees vir die nasies wat elke dag deur jou kantoor stap, of deur jou werkswinkel, of deur jou spreekkamer, of deur jou klaskamer. Om hulle aan te raak met die liefde van Jesus. Jy is dus nie sommer maar net hier op aarde om geen bydrae tot God se Koninkryk te maak en eendag te sterf nie. Maak nie saak hoe gering dit ookal mag wees wat jy doen nie, moenie dink jy is nie goed genoeg nie. God sê jy is goed genoeg vir HOM.

Verder lees ons daar dat die Here sê na wie ookal Hy ons stuur, moet ons gaan, en wat Hy ons ookal beveel, moet ons spreek. Mag ek en jy dus in hierdie nuwe week gehoorsaam wees aan ons skeppingsdoel en ook daardie opdragte van die Here.

Gebed:

“Vader, baie dankie dat U my waardig ag om my as profeet vir die nasies rondom my te gebruik. Gee my asseblief U krag om te gaan na wie U my ookal beveel om te gaan, en om te spreek met wie U my ookal beveel om te spreek. Ek bid dat U alleen verheerlik sal word in my lewe in hierdie week. In Jesus Naam bid ek dit. Amen.”

(tiaan gildenhuys - tg@oicb.co.za)
Geplaas met toestemming van Tiaan Gildenhuys

Jesus Christus ons Groot Hoë Priester

Hebreërs 4:14 – 16 “Terwyl ons dan ‘n groot Hoëpriester het wat deur die hemele deurgegaan het, naamlik Jesus, die Seun van God, laat ons die belydenis vashou. Want ons het nie ‘n hoëpriester wat nie met ons swakhede medelye kan hê nie, maar een wat in alle opsigte versoek is net soos ons, maar sonder sonde. Laat ons dan met vrymoedigheid na die troon van die genade gaan, sodat ons barmhartigheid kan verkry en genade vind om op die regte tyd gehelp te word.”

Jesus as ons Hoëpriester is een van die kosbare waarhede waardeur ons groei tot  volwassenheid en wat ons in intimiteit nader aan Hom trek. Wanneer ons die grootheid van Jesus in hierdie amp besef word ons standvastigheid versterk. Heb 4:14 “Terwyl ons dan ‘n groot Hoëpriester het wat deur die hemele deurgegaan het, naamlik Jesus, die Seun van God, laat ons die belydenis vashou.” Belydenis is dit wat jy spreek en verklaar. Jesus was heeltemal suksesvol is Sy opdrag en missie van verlossing. Hy kom en sterf as offer vir ons sonde. Hy het opgestaan in oorwinning oor die sonde en die dood. Hy het opgevaar na die hemel en sit in die gesagsposisie van outoriteit, aan die regterhand van Vader. Omdat ons dít weet, het ons ‘n groter rede om standvastig te bly in ons belydenis van hoop in Hom.

Verder, ons Hoëpriester is nie verwyderd en onsimpatiek teenoor ons behoeftes en swakhede nie. Heb 4:15(a) “Want ons het nie ‘n hoëpriester wat nie met ons swakhede medelye kan hê nie,” Die vyand het al sy versoekings tegnieke teen Jesus gebruik. Jesus het dit wat jy deurgaan ook deurgaan, dit waarmee jy versoek word is Hy mee versoek. Nog ‘n feit van groter belang en waarheid is dat Hy nooit ingegee en toegegee het nie. Heb 4:15(b) “maar sonder sonde.” So, Jesus verstaan nie net ons geveg nie, Hy gee ook die oorwinning.

Hierdeur het ons die reg om Vader te nader, deur ons Hoëpriester, sonder twyfel of vrees om die hulp te ontvang wat ons nodig het. Heb 4:16 “Laat ons dan met vrymoedigheid na die troon van die genade gaan, sodat ons barmhartigheid kan verkry en genade vind om op die regte tyd gehelp te word.” Ons God regeer die hemel en aarde vanaf ‘n troon van genade. Hierdie genade kan net verstaan word deur die wat onder Sy nuwe verbond van genade leef. Hierdie genade is genoeg om die wat tot Hom gaan te regverdig en te heilig, die wat in nederigheid op Hom vertrou. Die genade hier is nie vir die aanvanklike redding nie maar dit is tot die redding van die verlostes wanneer hulle van hulle tekortkominge bewus word. Ek en jy word genooi om nader te kom, Vader te nader op ‘n intieme wyse, deel te hê in Sy volheid ten spyte van ons tekortkominge.

“Here Jesus, my Hoëpriester, ek loof en eer U vir U grootheid. U is groot in verstaan, omgee, oorwinning en genade. Soos ek nader aan U kom verwag en aanvaar ek dat U genade genoeg is om in my tekorte te voorsien. Amen.”

(cobus van heerden - cvh@oicb.co.za)
Geplaas met toestemming van Tiaan Gildenhuys

My gebed slaan teen die plafon vas!

Ek is seker dat menige kind van God al gevoel het dat sy of haar gebed, nie verder as die plafon strek nie. In sulke gevalle raak mens dan ook soms mismoedig en het dan nie meer lus om te bid nie, want ons voel ons kry geen antwoorde of deurbrake in ons situasies nie.

Die vraag is of dit dan enigsins moontlik is dat my gebed teen die plafon kan vasslaan?

Kom ons ondersoek die Skrifte!

Gal 2:20  Ek is met Christus gekruisig, en ék leef nie meer nie, maar Christus leef in my. En wat ek nou in die vlees lewe, leef ek deur die geloof (in) van die Seun van God wat my liefgehad het en Homself vir my oorgegee het.

Rom 8:26  En net so kom ook die Gees ons swakhede te hulp, want ons weet nie reg wat ons moet bid nie, maar die Gees self tree vir ons in met onuitspreeklike sugtinge.

Rom 8:27  En Hy wat die harte deursoek, weet wat die bedoeling van die Gees is, omdat Hy ooreenkomstig die wil van God vir die heiliges intree.

Op grond van hierdie twee verse, is dit alreeds duidelik dat dit onmoontlik is dat ek as wedergebore kind van God, teen die plafon kan vas bid!

Hoekom gebeur dit dan dat daar nie antwoorde kom op gebede wat met 'n opregte hart gebid word nie. Daar kan verskeie redes wees waarom gebede nie beantwoord word nie en sommige daarvan is, sonde en ongehoorsaamheid aan God se woord, of omdat dit gebede is vir dinge wat in die welluste van die vlees moet voorsien, of dit is bloot omdat daar bose magte is wie die antwoord op ons gebede verhinder.

Ons kry baie duidelike voorbeelde hiervan in die boek van Daniël in hoofstukke 9 en 10 toe die engel aan Daniël berig gebring het dat God reeds geantwoord het by die begin van Daniël se smekinge. In hoofstuk 10 lees ons dan ook dat die engel vir 21 dae verhinder is deur die vorse van Perse voordat hy verlos is en die antwoord aan Daniël kon bring.

Die Bybel is duidelik dat daar 'n stryd teen bose magte is wie daarop uit is om ons lewens te verderf.

Ef 6:12  Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug.

Kom ons kyk ook wat sê die Bybel oor gebed”

Mat 7:8  Want elkeen wat bid, ontvang; en hy wat soek, vind; en vir hom wat klop, sal oopgemaak word.

Luk 11:9  En Ek sê vir julle: Bid, en vir julle sal gegee word; soek, en julle sal vind; klop, en vir julle sal oopgemaak word.

Ps 91:15  Hy sal My aanroep, en Ek sal hom verhoor; in die nood sal Ek by hom wees; Ek sal hom uitred en eer aan hom gee.

Ps 50:15  en roep My aan in die dag van benoudheid: Ek sal jou uithelp, en jy moet My eer.

Ps 5:2  Gee ag op die stem van my hulpgeroep, my Koning en my God, want tot U bid ek.

Ps 5:3  In die môre, HERE, sal U my stem hoor; in die môre sal ek dit aan U voorlê en afwag.

1Pet 4:7  En die einde van alle dinge is naby; wees dan ingetoë en nugter, om te kan bid.

Bogenoemde verse is slegs 'n paar skrifgedeeltes wat daarop wys dat dit uiters belangrik is om te volhard in gebed. Toe Jesus in die tuin van Getsemané in 'n swaar stryd was oor die dinge wat Hy sou deurmaak wanneer Hy oorgelewer word aan die Romeine, het Hy net met nog meer inspanning gebid. Dit is dan ook vir ons tot voorbeeld dat ons nie moet moed verloor nie, maar net nog meer moet volhard in gebed.

Luk 22:43  En ‘n engel uit die hemel het aan Hom verskyn en Hom versterk.

Luk 22:44  En toe Hy in ‘n sware stryd kom, het Hy met groter inspanning gebid, en sy sweet het geword soos bloeddruppels wat op die grond val.

Geliefdes, as daar dinge is wat tussen jou en God staan en wat ook daartoe mag bydra dat jou gebede verhinder word, kry dit uit die pad uit, sodat jou gebede nie verhinder word deur jou eie toedoen nie!

En manne, let asseblief noukeurig op die volgende vers en slaan ag daarop!!!

1Pet 3:7  Net so moet julle, manne, verstandig met hulle saamlewe en aan die vroulike geslag, as die swakkere, eer bewys, omdat julle ook mede-erfgename van die genade van die lewe is—sodat julle gebede nie verhinder mag word nie.

GEBED:  Hemelse Vader, versterk ons asseblief soos U vir Jesus versterk het in die tuin van Getsemané en gee ons die krag om nie moedeloos te word nie, maar dat ons sal volhard in gebed...in Jesus se naam – amen!

 (ernest phillipson - ecp@oicb.co.za)
Geplaas met toestemming van Tiaan Gildenhuys

Wie luister na ons?

(1 Johannes 4:6-8): “Ons is uit God; hy wat God ken, luister na ons; hy wat nie uit God is nie, luister nie na ons nie. Hieruit ken ons die Gees van die waarheid en die gees van die dwaling. Geliefdes, laat ons mekaar liefhê; want die liefde is uit God, en elkeen wat liefhet, is uit God gebore en ken God. Hy wat nie liefhet nie, het God nie geken nie, want God is liefde.”

Het jy as kind van God dalk al gewonder waarom luister sommige mense nie na jou nie, selfs al gee jy hulle goeie raad? Want die Bybel sê die wat nie uit God is nie, luister nie na ons nie. Maar die wat self ook uit God is, luister wel na ons, want hulle gees getuig dadelik saam met my en jou gees oor die waarheid. En juis hierdeur onderskei ons die Gees van die waarheid of die gees van die dwaling.

Tog hoor ek God se uitroep in die woorde dat ons mekaar moet liefhê, want die liefde is uit God en elkeen wat liefhet is uit God gebore en ken God. Daarom wil Hy hê dat ons mekaar moet liefhê, juis omdat liefde uit Hom uit is. En as ons uit Hom is, sal ons ook na mekaar luister en by mekaar kan leer rondom die waarheid van God se Woord.


Maar, as ek nie liefhet nie, kan ek nie aanspraak maak daarop dat ek God ken nie, want God is liefde. En tog is so baie van ons geneig om te verklaar dat ons uit God is, maar tog wil ons nie na mekaar luister nie, en sukkel ons om liefde te betoon, selfs teenoor die mense die naaste aan ons. Kom ons vra die Here om ons te leer om Sy liefde te betoon aan ‘n stukkende wêreld rondom ons, sodat die wêreld kan sien dat God en die gees van die waarheid in ons is.

Gebed:

“Vader, ek kom na U in die Naam van U Seun, Jesus Christus. Ek bely vandag dat ek nie aan die wêreld gewys het dat God in my is nie, omdat ek nie U liefde aan almal rondom my betoon het nie. Ek vra dat U my asseblief sal vergewe, en my sal leer om U liefde te betoon aan ‘n stukkende wêreld rondom my, maar veral ook diegene die naaste aan my. Gee dat hulle wat uit God uit is na my sal luister, en dat ek ook sal luister na diegene wat uit God uit is sodat die wêreld kan sien dat God in ons is. In Jesus Naam. Amen.”

 (tiaan gildenhuys - tg@oicb.co.za)
Geplaas met toestemming van Tiaan Gildenhuys

Praktiese Christenskap

Jakobus 2:26 “Want soos die liggaam sonder gees dood is, so is ook die geloof sonder die werke dood.”

Jakobus word is Gal 1:19 beskryf: “en ek het niemand anders van die apostels gesien nie, behalwe Jakobus, die broer van die Here.” Sy bynaam was “Die Regverdige” en hy het, uit sy heilige lewenswandel, respek afgedwing, baie wyer as die grense van die Christelike kerk. Terwyl Paulus met doktrines en lering gedeel het, was Jakobus besorg oor die praktiese toepassing. Paulus verduidelik die wonderlike betekenis van die dood en opstanding van Jesus Christus, Jakobus die betekenis van die lerings van Jesus en spesifiek die Bergpredikasie. Terwyl Paulus hamer op geloof as pad na geregtigheid voor God, lê Jakobus klem op die werke wat uit geloof moet vloei.

Dit lyk asof Jakobus die briewe van Paulus gelees het want hy maak gebruik van dieselfde frases en voorbeelde, en het homself opgestel om díe wat die leringe van Paulus verdraai, tee te staan. (Maar hierdie is deur die Heilige Gees aan hom openbaar aangesien sy skrywe lank voor die briewe van Paulus geskryf is.) Daar was in hierdie tyd baie wat aan Christus geglo het en geroem het in die tradisie en akkuraatheid van hulle geloof, maar Jakobus handhaaf die siening dat dit nie genoeg is om die siel te red nie.

So vêr as glo gaan kan geen geloof meer absoluut godsdienstig wees as die geloof van bose geeste nie. Herhaaldelik, gedurende die lewe van Jesus Christus, het hulle erken dat Hy die Heilige van God is, maar dit het geen invloed op hulle karakter gehad nie. Inteendeel het dit hulle gevul met vrees en siddering. Jak 2:19 “Jy glo dat God één is. Jy doen goed; die duiwels glo dit ook, en hulle sidder.”

“Geloof sonder werke is dood.” Dit is goed om onsself te toets. Ons moet toesien dat ons harte suiwer is en ons weë absoluut deursigtig. In ons interaksies met diegene rondom ons moet ons altyd daarna streef om die hoogste vlakke van liefde en pligsbesef te realiseer. Selfs wanneer ons pogings van welwillendheid en omgee nie dadelik vrug af werp nie, moet ons nie die hoë vlakke van ons werke verlaag nie, maar moet ons gefokus bly op die lewe van Jesus in Nasaret. Wees genadeloos teenoor jouself maar barmhartig teenoor ander, dra die laste van díe om jou en pas jou aan by die pas van die swak en weerlose. Selfs Ragab was geregverdig deur ‘n geloof wat bewerk is in pragtige en onselfsugtige aksies.

Jak 2:25 “En is Ragab, die hoer, nie ook net so geregverdig uit die werke toe sy die boodskappers ontvang en met ‘n ander pad weggestuur het nie?” en in

Heb 11:31 “Deur die geloof het Ragab, die hoer, nie saam met die ongehoorsames omgekom nie, omdat sy die spioene in vrede ontvang het.”

Onthou die woorde van Jesus Christus in Mat 7:20 & 21: “so sal julle hulle dan aan hul vrugte ken. Nie elkeen wat vir My sê: Here, Here! sal ingaan in die koninkryk van die hemele nie, maar hy wat die wil doen van my Vader wat in die hemele is.”

GEBED

“Here Jesus, help my asseblief. Voeg by my geloof die broederlike liefde, vergewe my elke harde woord en ongeduldige reaksie, elke harde en selfsugtige daad, die nalating om vriendelike hulp te verleen waar ek die geleentheid gehad het. Bekragtig my om sô te leef sodat ek daagliks iets kan doen om die behoeftes en pyn van mense te verlig en om tot die vreugde van die om my, by te voeg. AMEN.”

(cobus van heerden - cvh@oicb.co.za)
Geplaas met toestemming van Tiaan Gildenhuys

Wie is die mens?

Psa 8:4 wat is die mens dat U aan hom dink, en die mensekind dat U hom besoek?

Psa 8:5 U het hom ‘n weinig minder gemaak as ‘n goddelike wese en hom met eer en heerlikheid gekroon.

Dit is vir my opvallend hoéveel mense ek die laaste tyd bedien het en wie feitlik almal met dieselfde binding gestoei het..en dit is die feit dat hulle nie hulself kon of wou vryspreek en vergewe vir die dinge van die verlede nie. Meeste van hulle het ook nie geweet dat hulle hulself ook moes vryspreek om waarlik vry te kom van die bagasie van die verlede nie en só sleep hulle die goed saam jaar in en jaar uit en hou aan “repent”, maar sonder dat deurbrake plaasvind.

Tog is die woord van God baie duidelik:

1Joh 1:9  As ons ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig.

Heb 8:12  Want Ek sal barmhartig wees oor hulle ongeregtighede en aan hulle sondes en hulle oortredinge nooit meer dink nie.

As God dan sê dat Hy nooit weer aan daardie sondes dink nadat dit opreg bely is nie, hoekom aanvaar ons dan nie Sy vergifnis nie en laat ons toe dat die Satan ons aanhou herinner aan die verlede? Die Bybel is tog duidelik dat ons die dinge van die verlede moet aflê en vergeet en ons oog hou op die toekoms in Christus.

Isa 43:18  Dink nie aan die vorige dinge nie, en slaan geen ag op wat vroeër gebeur het nie.

Luk 9:62  En Jesus antwoord hom: Niemand wat sy hand aan die ploeg slaan en agtertoe kyk, is geskik vir die koninkryk van God nie.

In meeste van die gevalle het ek gevind dat die mense wie ek bedien het, nie kon aanvaar dat hulle nou nuwe skepsels in Christus is nie en dat hulle meer ingestel is op wat mense van hul sê en dink, as wat God van hul dink. Hulle kyk elke slag in die spieël vas na die ou mens wie hul was, instede van om die nuwe mens te sien wie skoongewas is deur die bloed van Christus!

2Kor 5:17  Daarom, as iemand in Christus is, is hy ‘n nuwe skepsel; die ou dinge het verbygegaan, kyk, dit het alles nuut geword.

1Kor 6:10  Moenie dwaal nie! Geen hoereerders of afgodedienaars of egbrekers of wellustelinge of sodomiete of diewe of gierigaards of dronkaards of kwaadsprekers of rowers sal die koninkryk van God beërwe nie.

1Kor 6:11  En dit was sommige van julle; maar julle het jul laat afwas, maar julle is geheilig, maar julle is geregverdig in die Naam van die Here Jesus en deur die Gees van onse God.

Die vyand het dit egter reg gekry om mense deur middel van godsdiens só vas te maak aan leringe en leerstellings van mense en instansies, dat baie kinders van God sukkel met minderwaardigheid en dat hulle dink dat hulle nie goed genoeg sal wees om eendag die poorte van die hemel te mag binnegaan nie. Hulle verwerp dus inderwaarheid dit wat Christus gedoen het en dink dat daar altyd nog iets is wat hulle moet doen, anders as om net heilgmaking na te jaag.

Kom ons lees egter wat sê die woord van God:

Psa 103:8  Barmhartig en genadig is die HERE, lankmoedig en groot van goedertierenheid.

Psa 103:9  Hy sal nie vir altyd twis en nie vir ewig die toorn behou nie.

Psa 103:10  Hy handel met ons nie na ons sondes en vergeld ons nie na ons ongeregtighede nie.

Psa 103:11  Want so hoog as die hemel is bo die aarde, so geweldig is sy goedertierenheid oor die wat Hom vrees.

Psa 103:12  So ver as die ooste verwyderd is van die weste, so ver verwyder Hy ons oortredinge van ons.

Psa 103:13  Soos ‘n vader hom ontferm oor die kinders, so ontferm die HERE Hom oor die wat Hom vrees.

Psa 103:14  Want Hy, Hy weet watter maaksel ons is, gedagtig dat ons stof is.

Liewe leser, as jy dalk ook nog sukkel om jouself te vergeef vir die verlede, dan is my woord aan jou vandag:...aanvaar dit wat Jesus vir jou gedoen het en aanvaar Sy vergifnis, want jy kan niks daaraan toevoeg nie. Haal jouself nou van jou rug af en spreek jouself vry, sodat jy die oorvloed lewe kan geniet wat Jesus met Sy bloed vir JOU losgekoop het!!

GEBED:  Heilige Gees, ek vra dat U nou by elkeen sal gaan stilstaan wie nog sukkel om hulself te vergeef vir die verlede en hul te oortuig van die groot genade en liefde wat daar in Jesus Christus vir hulle is. Versterk hulle dan ook nou om hulself finaal te kan vryspreek en vergewe soos wat Abba reeds gedoen het...amen!

(ernest phillipson - ecp@oicb.co.za)
Geplaas met toestemming van Tiaan Gildenhuys

Saai en jy sal maai.

Die Totale Aanslag

Wêreldwyd is daar ‘n totale aanslag op die Christendom, pleks van die omgekeerde.

            “So, sê Ek vir julle, is daar blydskap voor die Engele van God oor een sondaar wat hom bekeer.” Luk 15:10

Hoe kan enige Gelowige dit nie begeer om deel van so ‘n Hemelse blydskap te wees nie!

            Ons kan, as ons die volgende doen: “Sing tot eer van die HERE, loof sy Naam, verkondig sy Heil van dag tot dag.  Vertel onder die nasies sy eer, onder al die volke sy wonders.” Ps 96:3

            By Sjibbolet is ons ‘n paar mense wat saamwerk om die Goeie Nuus selfs oor die grense van die land uit te dra. Ons versprei die Woord meesal in gedrukte vorm, maar sommige predik ook voor groepe.

            Ons ontvang briefies en e-posse van Gelowiges wat vra: “Wat is daar wat ek vir die HERE kan dien?” Ander sê: “Ek wil ook graag iets vir die HERE doen.”

Die oes is baie groot en gereed om in te bring. Die arbeiders is min.  Dit alles kos egter geld.  As jy nog nie weet hoe die HERE jou wil gebruik in die oesveld nie, begin dan en help  ten minste vir ons en ander om die werk te kan doen en leer van ons.

VOORDELE VAN DIE GEDRUKTE WOORD

*  Dit bereik mense op die mees afgelëe plekke;

*  Dit bring die Woord aan skole, universiteite, gevangenisse, hospitale. Daar gaan meer mense deur die hospitale en gevangenisse van die wêreld as deur die kerke.

*  Dit beweeg oor taalgrense heen en is nooit bevooroordeeld nie;

*  Dit reis baie goedkoop en het nie ‘n paspoort of visum nodig nie;

*  Dit bring aan ryk en arm, bekend en onbekend, presies dieselfde boodskap;

*  Dit spreek vir so lank  as wat dit mag bestaan en herhaal sy boodskap oor en oor;

*  Dit word nooit mismoedig nie, werk 24 uur per dag, 365 dae per jaar;

*  Dit keer nooit leeg terug nie, want dit bly die Lewende Woord.

            Jare gelede het ons traktaatjies op sypaadjies en op straathoeke verspei. Mense wil dit nie langer so aanvaar nie. Versprei die boodskappe per e-pos, of maak fofostate en versprei dit in posbusse, in tydskryfte in spreekkamers, glip dit in iemand se sak of inkopies.

            Daar is plek in die Hemel vir boemelaars ook. Wanneer jy vir hulle ‘n geldjie of kos gee, gee sommer ‘n boodskap saam.

            Hou altyd boodskappe in jou motor aan, daar is baie mense langs die pad vir wie jy dit kan gee. Bid daaroor en dank die HERE dat sy Woord nooit leeg terugkeer nie.

            Moet dit nooit in motors se ruitveërs plaas nie. Ruitveërs is die sensitiefste deel van ‘n voertuig en speel ‘n belangrike rol,. Mens durf dit nie beskadig nie.

            Ons beplan  groter uitbreidings. Ons vra nooit geld nie. Mense gee soos wat die Gees van die HERE hulle lei

Ons versprei ook kos, klere, skoene en Bybels.

            Onthou: Jesus heel die gebroke Harte. “Want so sê die Hoë en Verhewene wat in Ewigheid woon -- Heilig is Sy naam: Ek woon in die hoogte en in die heilige plek, maar Ek woon ook by die verbryselde en nederige van gees -- waarom?

            “Om te laat herlewe die gees van die nederiges en te laat herlewe die hart van die verbryseldes.” -- Jes. 57:15.  –  Sjibbolet.buro@gmail.com  of belindapaar@gmail.com

Sou u 'n donasie wil maak t.o.v Evangelisasie kontak ons vir bankbesonderhede.

Jesus sëen elkeen in Sy Heilige Naam

Weet jy dat jy gered is?

(Romeine 10:9,10) – “Maar wat sê dit? Naby jou is die woord, in jou mond en in jou hart. Dit is die woord van die geloof wat ons verkondig: As jy met jou mond die Here Jesus bely en met jou hart glo dat God Hom uit die dode opgewek het, sal jy gered word; want met die hart glo ons tot geregtigheid en met die mond bely ons tot redding.”

My vraag aan jou vandag is, wéét jy dat jy gered is?

Maak nie saak waar en hoe jy grootgeword het nie, in die kerk, of buite die kerk nie. Want dit is ‘n baie belangrike punt om ‘n antwoord op te hê, aangesien die ewigheid vir ‘n ieder en elkeen van ons wag. En die ewigheid is te lank om ‘n kans te waag dat ek dalk nie die antwoord ken nie.

Kan ons regtig weet dat ons die ewige lewe sal hê? Beslis ja, volgens 1 Johannes 5:13:

“Dit het ek geskrywe aan julle wat glo in die Naam van die Seun van God, sodat julle kan weet dat julle die ewige lewe het en kan glo in die Naam van die Seun van God.”

Dit is dus NIE waar dat ons “nooit werklik kan wéét” of ons die ewige lewe het, soos sommige mense beweer nie. Maar hoe word ek dus gered? Duidelik dus nie deur te glo dat, omdat ek as babatjie gedoop is is ek gered, of omdat my ouma en my ma Christene was, is ek gered, nie. Wat leer die Bybel ons in die bogemelde teksvers?

1. Ek moet met my mond die Here Jesus BELY, wat beteken ek moet daaroor PRAAT dat ek Jesus as Koning in my lewe het, en

2. Ek moet met my hart glo dat God Jesus uit die dode opgewek het.

Dan SAL ek gered word. Maar daar is ‘n verdere vraag wat ons hier moet by vra, naamlik: HOE het God vir Jesus uit die dood opgewek, fisies, metafories, geestelik of simbolies? Want uit die aard van die saak is dit ook bepalend vir my redding, want oor die eeue is daar al baie teologiese debatte gevoer oor die vraag of Jesus fisies of net geestelik of metafories uit die dood opgestaan het.

Kom ons kry die duidelike antwoord uit die Woord, die aand nadat Jesus uit die dood opgestaan het, in Lukas 24:36-43:

“En terwyl hulle hieroor praat, staan Jesus self in hul midde en sê vir hulle: Vrede vir julle! Toe het hulle verskrik en baie bang geword en gemeen dat hulle ‘n gees sien.  En Hy sê vir hulle: Waarom is julle ontsteld en waarom kom daar twyfel in julle hart op? Kyk na my hande en my voete, want dit is Ek self. Voel aan My en kyk; want ‘n gees het nie vlees en bene soos julle sien dat Ek het nie. En terwyl Hy dit sê, wys Hy hulle sy hande en sy voete. En toe hulle van blydskap nog nie kon glo nie en hulle verwonder, sê Hy vir hulle: Het julle hier iets om te eet? Daarop gee hulle Hom ‘n stuk gebraaide vis en ‘n stuk heuningkoek. En Hy het dit geneem en voor hulle oë geëet.”

Hier sien ons dus dat Jesus se dissipels óók gemeen het dat Jesus net geestelik opgestaan het. Maar dan antwoord Jesus die vraag baie duidelik deur vir hulle Sy hande en voete te wys en te sê dat hulle aan Hom moes VOEL, want ‘n gees het nie vlees en bene soos hulle kon sien dat Hy het nie. En verder het Hy vis en heuningkoek geëet, en ons weet dat ‘n gees nie kan eet nie.

Dit beteken dus, dat om werklik gered te word, moet ek die Here Jesus met my mond bely, en ek moet met my hart glo dat God Hom FISIES uit die dood opgewek het. Indien ek DIT nie glo nie, plaas ek inderwaarheid my ewigheid op die spel.

Vriend/vriendin, wéét JY vandag dat JY gered is?

Gebed:

“Vader ek kom bely vandag dat ek ‘n sondaar is en dat ek ‘n Verlosser nodig het, en ek vra U om asseblief al my sondes te vergewe. Here ek bely verder dat ek glo Jesus Christus is self ook God, dat Hy vlees geword het en op aarde kom loop het en aan ‘n kruis gesterf het, ook vir my. Verder weet ek en glo ek vandag dat U vir Jesus fisies uit die dode opgewek het om te kom sit aan U regterhand in die hemele. Daarom bely ek vandag dat ek Jesus Christus aangeneem het, of in hierdie oomblik aanneem as my enigste Koning, Here, Saligmaker en Verlosser. Nou bid ek dat U my sal vervul met U Heilige Gees, en dat U my elke dag op ‘n pad van heiligmaking, geregtigheid en heiligheid sal lei deur U Heilige Gees. Dankie Jesus dat ek U nou ook kan bely met my mond, en U my Koning kan noem, in alle ewigheid. Amen.”

(tiaan gildenhuys - tg@oicb.co.za)
Geplaas met toestemming van Tiaan Gildenhuys

Wat is in jou hart?

1Sam 16:7 Maar die HERE sê vir Samuel: Kyk nie na sy voorkoms en sy hoë gestalte nie, want Ek ag hom te gering. Want nie wat die méns sien, sien God nie; want die mens sien aan wat voor oë is, maar die HERE sien die hart aan.

Terwyl ek stil word by die Here gisteraand, ervaar ek duidelik in my gees hierdie vraag: “wat is in jou hart My kind, wat is die gesindheid en dryf in jou hart waarmee jy na My toe kom of waarmee jy leef in hierdie dae?” Onmiddelik word ek toe herinner daaraan dat Abba na ons harte kyk en dat ons by Hom geen skans kan voorhou soos ons by mense kan doen nie!

Só baie mense sien ons aan as “heilige mense” op grond van dit wat ons sê of die dingetjies wat ons doen, wat só Christelik voorkom. Tog is daar baie keer in ons harte ‘n valsheid of by-motief waarom ons sekere dinge doen of sê. Die vraag is: is dit wat ons doen of sê tot eer van die Here of gaan dit oor “me, myself and I – the unholy trinity”? Is ons werklik op soek na Jesus in hierdie dae wat ons leef of is ons maar net besig om ‘n Christelike bestaan te voer?

Dit is só maklik om met die mond te verklaar dat Jesus se koms baie naby is, maar is ons werklik besig om te lewe asof Hy inderdaad vandag dalk kan kom om Sy bruid te kom haal?

Terwyl ek die afgelope maand die klomp vakansiegangers hier in ons dorp, Mosselbaai, dophou, hoé hulle feesvier en plesiertjies najaag, kom die volgende deel uit die Skrif by my op en sien ek hoé dit daagliks voor my oë manifesteer.

2Tim 3:1 Maar weet dit, dat daar in die laaste dae swaar tye sal kom.

2Tim 3:2 Want die mense sal liefhebbers van hulleself wees, geldgieriges, grootpraters, trotsaards, lasteraars, ongehoorsaam aan hulle ouers, ondankbaar, onheilig,

2Tim 3:3 sonder natuurlike liefde, onversoenlik, kwaadsprekers, bandeloos, wreed, sonder liefde vir die goeie,

2Tim 3:4 verraaiers, roekeloos, verwaand, meer liefhebbers van genot as liefhebbers van God;

2Tim 3:5 mense wat ‘n gedaante van godsaligheid het, maar die krag daarvan verloën het. Keer jou ook van hierdie mense af.

Ek sien hoé dit vir jongmense net gaan oor hoé hulle lyk, aantrek (so min as moontlik in meeste gevalle) en watse “brand name gadgets” hulle saamdra. Vir die ouer garde gaan dit oor: wat ek ry, waar ek bly en wat ek in die lewe vermag het. En dan kom dit by my op dat ‘n groot klomp van die meerderheid mense hier, sal bely dat hulle Jesus as Saligmaker aangeneem het, maar as mens kyk na die vrug wat gedra word dan kan jy nie anders as om te wonder nie!

Die realiteit is dat die dinge waarop jy jou gedagtes fokus, is die dinge wat in jou hart sal wees!

 (ernest phillipson - ecp@oicb.co.za)
Geplaas met toestemming van Tiaan Gildenhuys

Die Skuilplek van die Allerhoogste.

Psalm 91:1 “Hy wat in die skuilplek van die Allerhoogste sit, sal vernag in die skaduwee van die Almagtige.”

As kinders het ons baie speletjies gespeel: Brandbal, Donkie se stert, Simon sê, en vele ander. Een van hulle, Wegkruipertjie, is steeds een van die wêreldwye gunstelinge. Daar is net iets spesiaal daaraan om die perfekte wegkruip plek te vind; ‘n plek waarvandaan jy kan uitkyk maar self nie raakgesien word nie. Die plek waar niemand aan sal dink om te kyk nie. ‘n Plek waar jy altyd as wenner uitstap.

Ons het sô ‘n plek in God.

Dawid sê in Ps 32:7 “U is ‘n skuilplek vir my; U bewaar my vir benoudheid; U omring my met vrolike gesange van bevryding.” Die beeld van hierdie herhalende onderwerp weerspieël in baie van sy skrywes. Op ‘n ander geleentheid sê Dawid, “Want Hy steek my weg in sy hut in die dag van onheil; Hy verberg my in die skuilplek van sy tent; Hy verhef my op ‘n rots.” Ps 27:5. Hy gee ‘n bewysde woord van belofte aan almal wat die Here vrees, wat God vertrou voor die oë van ‘n ongelowige wêreld. Ps 31:21 “U verberg hulle in die skuilplek van u aangesig vir die samesweringe van mense; U steek hulle weg in ‘n hut vir die twis van die tonge.” Dit weet hy uit persoonlike ondervinding toe hy vir sy lewe gevlug het van Saul, en God se teenwoordigheid in ‘n spelonk gekry het. In Ps 57:2 smeek hy, “Wees my genadig, o God, wees my genadig, want by U het my siel geskuil, en in die skaduwee van u vleuels sal ek skuil totdat die onheil verbygegaan het.”

Hier is waar Dawid besef het dat God met hom sal wees en hom sal beskerm. Dit is waarom hy in Ps 23:5 & 6 kon skryf; “U berei die tafel voor my aangesig teenoor my teëstanders; U maak my hoof vet met olie; my beker loop oor. Net goedheid en guns sal my volg al die dae van my lewe; en ek sal in die huis van die HERE bly in lengte van dae.” Dawid, in die teenwoordigheid van koning Saul het God se tafel gevind en aan hierdie tafel het hy God se beskerming ervaar.

In die donkerte van die spelonk, het Dawid die nabyheid van God ontdek. Kan dit wees dat die donkerte wat tans om jou is, die skadu van Sy vleuels is? Dít is die perfekte wegkruip plek!

Waarom maak jy nie vandag die volgende jou verklaring nie – Ps 36:8 “Hoe kosbaar is u goedertierenheid, o God! Daarom skuil die mensekinders onder die skaduwee van u vleuels.” Asook Ps 61:4 & 5 “Want U het ‘n toevlug vir my geword, ‘n sterk toring teen die vyand. Ek wil in u tent vertoef vir ewig, in die skuilplek van u vleuels my verberg.” 

“Here Jesus, ek het nodig om in U skuiplek in te gaan. Ek benodig U goddelike leiding en beskerming. Ek wil by U tafel aansit soos wat Dawid ook aangesit het. Open asseblief my oë om te sien waar U tafel is en om U beskerming en leiding te ontvang. Amen.”

(cobus van heerden - cvh@oicb.co.za)
Geplaas met toestemming van Tiaan Gildenhuys