Hy het ernstig versoek: ‘Moenie my hart oorplant nie, ek het dit vir Jesus gegee’

 Sowat drie jaar gelede het die bekende Christelike Berader, Belinda Paar, vir Johan Strydom telefonies ontmoet deur ‘n gebedsversoek. Hy was in ‘n Pretoriase hospitaal vir ‘n moontlike hartoorplanting. Dit het baie sleg met hom gegaan en sy moes vir hom bid. Voordat sy kon bid het sy hom gevra of hy glo dat Jesus hom kan genees, waarop hy ja geantwoord het, sy het gevra of hy Jesus al aangeneem het, waarop sy antwoord was...ja jare gelede in ‘n kerkdiens, maar ek wil graag weer. Ek het hom gelei  en hy het Jesus aangeneem.

            Belinda vertel: Hy is toe later oorgeplaas na Groote Schuur in Kaapstad. Hy het sy plaas verkoop om die mediese onkoste te dek. Hy had sy 4e hartoperasie daar... nie oorplanting nie...dit is 'n lang storie... maar nie die punt wat ek wil bereik nie.

Groote Schuur waar die 4e hartoperasie op Strydom uitgevoer is.

Hy het daarna geestelik ontplof! Hy is regtig 'n pragtige mens vandat hy Jesus ontmoet het.

            Die 4e hartoperasie was  suksesvol, maar later in die dag toe gaan staan sy niere, en sy bloeddruk val na 71/41 en geen medikasie werk nie, en dokters kom op punt wat hul laat weet die familie moet kom groet, want hy is baie swak en geen verdere operasie kan help nie.

            Sy vriend Herman was in trane... snik soos hy huil… Johan het hom gevra om na sy kinders te kyk, ook gesê sy gees is sterk maar sy liggaam is moeg, gesê hy gaan na beter plek en Herman moenie huil nie.

            Herman was ontsettend hartseer, gesê hy verstaan dat Johan na ‘n beter plek gaan maar hy het so geglo dat Johan gaan gesond word en sy droom uitleef om vir die HERE te werk... ek het net geluister hoe Herman snik en aangaan en die volgende oomblik toe se ek kom ons bid! Daar is asem... so daar is lewe... en ons bid vir genesing... die einde is nog nie hier nie!

            Die Heilige Gees vat my deur daai gebed, dat ek so ‘n salwing kry dat ek nie eens wil ophou bid nie! Terwyl ek bid besef ek dat Herman baie kalm is aan die anderkant. Na die gebed, sê hy Amen, ek staan in geloof! God verander sake.

 Johan Strydom, slaghuiseienaar op Tzaneen. Sy slaghuis is ook verkoop.

Hierdie was ongeveer so 8uur in die aand, teen ongeveer 9.30 kom die boodskap, Johan se bloeddruk het gestyg, dit gaan  beter met hom.

Die volgende dag hoor ons niks, nie tot so 7uur die aand. Johan laat weet dit gaan goed met hom hy voel 'n nuwe mens, hy prys Jesus daarvoor!

         Hoe groot is die HERE se genade nie vir ons nie, weereens besef mens die krag van gebed! Ons is so vinnig om na ander te luister! Wie weet as ons nie gebid het nie was sy kinders dalk vaderloos! 

        Hulle wou hartoorplanting op hom gedoen het. Johan het vir die dr gevra, as dit enigsins moontlik is om sy hart te hou, wil hy graag want dit is die hart wat hy vir Jesus gegee het! Hoe mooi is dit? Hy haf ook geen vrees vir die dood nie. Wat ‘n heerlike plek om te wees!

Ons is so dankbaar teenoor Jesus! Al die lof en glorie aan Hom, mag Johan 100% genees en 'n getuienis vir Jesus wees!

Johan Strydom en sy vrou Mariëtte. Hulle woon deesdae in Brackenfell waar hy weer ‘n slaghuis het. 

Dit gaan baie,baie goed met hom en sy gesin. Mens kan eintlik sê, dat toe hy ‘n hartoorplanting moes kry, het die HERE dit self gedoen.

          Bid vir mekaar en dra mekaar se laste. – Wekroep

Rus in vrede

Die bogenoemde opskrif, is iets wat ons baie kere op grafstene geskrywe vind, asof dit moet impliseer dat almal na ons afsterwe, in vrede sal wees. Tog is die Bybel baie duidelik dat daar geen vrede vir die goddelose sal wees nie en dat die vuur in die hel nooit sal geblus word nie:

Jes48:22  Geen vrede, sê die HERE, vir die goddelose nie!

Mar 9:44  waar hulle wurm nie sterf en die vuur nie uitgeblus word nie.

Tog is die Bybel ook baie duidelik dat daar vir ons 'n rus wag waarin ons kan gaan en het ek self ook al baie gewonder oor of dit werklik verwys na die ewige lewe hierná en of dit dalk moontlik is dat ons nou alreeds die rus van God kan binnegaan, soos dit in Hebreërs 4 genoem word.

 Heb 4:1  Laat ons dan vrees dat, terwyl die belofte om in sy rus in te gaan nog standhou, dit nie miskien sal blyk dat iemand van julle agtergebly het nie.

Hiérdie gedeelte verwys dan ook na die Israeliete in die woestyn wié nie God se rus kon ingaan nie, omdat hulle nie wou glo nie. Die deel gaan dan verder en praat van 'n sabbatsrus en ook dat dié wie Sy rus ingaan, ook sal rus van hulle werke. Nou aanvanklik maak dit nie sin dat ons moet rus van ons werke nie, juis omdat ons gered is sodat ons die evangelie kan verkondig en dissipels gaan maak...en dan moet die siekes nog genees word, die dooies opgewek word en die demone uitgedryf word...wel, dit klink vir my na werk! Só, hoé moet ons dan rus?

Heb 4:10  want wie in sy rus ingegaan het, rus ook self van sy werke soos God van syne.

 As ons egter na hiérdie deel gaan kyk uit die hoek van die wette versus genade, dan begin dit dalk 'n klein bietjie meer sin maak as daar verwys word na: “rus van sy werke”. Een van die beste maniere om dit dalk meer duidelik te maak, is om terug te gaan na die tabernakel / tempel toe.

Die Hoëpriester was die enigste persoon wie eenmaal per jaar by die Allerheiligste kon ingaan om versoening te doen vir die volk. Hy moes homself behoorlik heilig voordat hy daar kon ingaan en het ook klokkies aan die onderkant van sy kleed gehad, sodat die ander priesters wié net tot in die Heilige deel kon kom, hom kon hoor beweeg. Hy het ook 'n tou aan sy voet gehad sodat hulle hom kon uitsleep as hy dalk om een of ander rede deur God neergevel sou word, terwyl hy die versoeningsoffer bring.

Verder was daar ook geen stoel in die Allerheiligste waarop hy kon gaan sit nie, want sy werk was nooit volkome afgehandel nie. Met Jesus se kruisiging, was daar ook geen “mercy seat” aan Sy kruishout nie en kon Hy ook nooit “rus” van God se werk waarvoor Hy aarde toe gestuur is nie. Dit was eers nadat Hy opgevaar het en gaan sit het aan die regterhand van die Vader, dat Hy kon rus van Sy werke.

Jesus is dan die Hoëpriester wat voor God se troon verskyn het en finaal die mens weer met God versoen het en daarna het Hy gaan sit op Sy troon en aan ons die belofte gegee het dat ons ook nou alreeds deel aan Sy rus kan hê. En daardie rus verkry ons wanneer ons Hom aanneem as Redder en Saligmaker en ons rug keer op die dooie werke wat deur die wette gekom het. 

Heb 4:6  Terwyl dit dan so is dat sommige daar ingaan, en diegene aan wie die evangelie eers verkondig is, deur ongehoorsaamheid nie ingegaan het nie,

Heb 4:7  bepaal Hy weer ‘n sekere dag, naamlik vandag, as Hy soveel later deur Dawid spreek, soos gesê is: Vandag as julle sy stem hoor, verhard julle harte nie.

 Heb 4:9  Daar bly dus ‘n sabbatsrus oor vir die volk van God;

Heb 4:10  want wie in sy rus ingegaan het, rus ook self van sy werke soos God van syne.

Heb 4:11  Laat ons ons dan beywer om in te gaan in dié rus, sodat niemand in dieselfde voorbeeld van ongehoorsaamheid mag val nie.

Dit is egter hartseer dat sóveel kinders van die Here in vandag se tyd, wil terugkeer na die werke van die wet, wat voorgeskryf word deur menigte dwaalleringe wat só 100 persent korrek klink. Terwyl Paulus (deur die Gees) dit baie duidelik stel dat sulkes van die genade verval en hulself losmaak van Christus af.

Gal 5:3  En ek betuig dit weer aan elke mens wat hom laat besny, dat hy onder verpligting is om die hele wet te onderhou.

Gal 5:4  Julle wat geregverdig wil wees deur die wet, is losgemaak van Christus; julle het van die genade verval.

Gal 5:5  Want óns verwag deur die Gees uit die geloof die geregtigheid waarop ons hoop.

Rom 3:20  aangesien uit die werke van die wet geen vlees voor Hom geregverdig sal word nie, want deur die wet is die kennis van sonde. 

Onthou altyd, dit wat ons uit die geloof vir Jesus doen, is OMDAT ons gered is, en nie SODAT ons daardeur gered kan word nie!

GEBED: 

Here Jesus, baie dankie dat ek kan weet dat U die werk van Vader op aarde voltooi het en dat U ook nou rus van U werk. Dankie dat U ook aan my deel gegee het aan hiérdie rus en my verlos het van dooie werke deur die wette toe U my aangeneem het as U kind, omdat ek U aangeneem het as my Redder en Saligmaker....amen!

Geskryf deur: ernest phillipson

(ecp@oicb.co.za)

Ek is in diep waters!

Die spreekwoord... "ek is in diep waters" is nie onbekend by enige van ons nie... ons almal was al daar..., tot Dawid wat n man so na God se hart was, die oogappel van God, n man in wie God welbehae gehad het, en Dawid roep uit! "Red my, o God, want die water het tot by my keel gekom" (Ps 69:2).

As jy die Ps lees sien jy hy was vals beskuldig van diefstal, mense het hom sonder rede gehaat, bespot, verkleineer en beledig, beskinder, sy eie familie het hom verwerp en hy het nie die nodige lewensbehoeftes gehad nie, hy was vol pyn!

Ons sien dat sy swaarkry eindeloos aangehou het, want hy sê "Ek het my moeg geroep om hulp, my keel is hees geroep".

Klink dit vir jou bekend? Was jy ook al daar?

Wat het Dawid gedoen terwyl dit so met hom gegaan het?

Hy het aanhou bid! Dawid was n geloofsoorwinnaar!

Daar is n verskil tussen n mens wat "opstaan" en n mens wat oorwin! Mense wat opstaan bly negatief, spreek negatief, en verwag nog meer negatief! Geloof-oorwinnaars is mense met hoop! Hulle weet nog meer slegte dinge kan moontlik op hul pad kom maar hulle hoop is op God gevestig vir deurbrake...hulle vertrou dat sou nog iets gebeur, dat God se hulp en gebed onafskeidsbaar is!

Ek wil jou vandag bemoedig met die woorde...terwyl jy bid vir jou situasie is jy alreeds n geloofsoorwinnaar, want Hy na wie jy uitroep is Magtiger as enige van jou probleme! Hy is meer getrou as enige vriend of familie-lid! En Hy is altyd gereed om te help!

Soms vat God bietjie lank met n deurbraak, want Hy weet hoe om jou desperaat te maak vir Hom... sou Hy dadelik help, het jy Hom nie meer nodig nie! So bou Hy jou geloof en jou verhouding met Hom tot n sterk onafskeidbare band!

Hou vas aan God.. jou deurbraak is oppad, jou geloof verseker dit!

Mooi oorwinningsdag vir jou.

(Geskry deur Belinda: belindapaar@gmail.com)

Besluite met wysheid!

 Besluite en keuses...daar kom n dag in jou lewe wat jy n besluit moet maak oor wat die beste is vir jou! Soms is dit nie n besluit wat ander mee saam stem nie, maar jy weet dat dit n besluit is wat jou beskerm, jou vrede gaan gee, jou geestelik gaan laat groei!

Soms is dit nie n lekker besluit om te neem nie, nie n maklike een nie, soms is dit n besluit wat vir n hele ruk eers gaan seermaak voor dit beter gaan word... en soms gaan dit ander om jou ook seermaak... maar op die einde is dit n beter besluit om te neem...die regte keuse om te maak, nie net vir jou nie maar ook vir ander... soms help jou besluit ook ander om ook makliker besluite en lewensrigting in hulle lewens te maak, of te kry.

Voor jy enige ernstige besluite neem in jou lewe, bid vir wysheid! En moet nooit n besluit neem as jy emosioneel is nie!

Mag die Heilige Gees jou altyd lei in elke besluit wat jy moet neem.

Vrede van God en wysheid van die Heilige Gees is my gebed vir jou vandag.

Ps 27:14 Wag op die Here! Wees sterk en laat jou hart sterk wees! Ja, wag op die HERE!

(Geskryf deur Belinda: belindapaar@g.mail.com)

Het jy nie gesag ontvang deur Jesus nie?

Om so te kla en kerm oor wat aangaan om ons is vir God pynlik omdat Hy vir ons al die mag en Sy Seun gegee het om elke stryd te kan wen hoekom kla, moun en vrees jy so?

Hoe oorwin ons wat aangaan in ons land? Die onregverdigheid, die kleurvoorkeur, die bedrog en verdrukking die moorde, verkragtings, diefstal en nou kinderdiefstal?

Hoeveel keer hoor jy "die aanslae teen my is geweldig....die duiwel is lustig...dit gaan swaar met my...ons land is in sy dinges ... die regering is klomp skelms, diewe, rasiste....die dinge moet gebeur want ons staan in die eindtyd".

Hoekom aanvaar ons die gemors wat ons kant toe kom? Die groot verdrukking kom EERS NA die wegraping! Die rooikappie brigade is presies dit... rooikappie-verhaal AS jy die Woord van God ken!

Want ons worstelstryd is nie teen vlees en bloed nie... maar teen die bose magte! En Wie het die bose alreeds oorwin? Waar lê jou Mag? Wie het aan jou mag gegee om op skerpioene en slange te kan trap? Om duiwels uit te dryf? Wie het oorwinning vir jou alreeds op Golgota gegee?

Rooikappie regeer met vrees.. net soos Hitler... en wat doen ons wat oorwinning gekry het in Jesus? Ons vrees!!

Ons almal belei Jesus met ons mond... sonder geloof!!

Jy hoor so baie die wit man kan nie saam staan nie! Jy is 100% reg!! Nie eens in gebed nie!!

O en die "vyand kom in massas"! Dit is waar! Lafaards doen! God sê Ek sal My engele opdrag gee aangaande jou! Almal ken Ps 91...maar niemand glo wat hy/sy lees nie! Hoeveel engele het Hy? n Legioen!! Wie kom in massas as jy net vra?

Ps 91:11 want Hy sal Sy engele aangaande jou bevel gee om jou te bewaar op al jou wee

Ons belei...Jesus het ons vrygemaak.. maar ons leef in tronke en in verdrukking en met siektes!! Sonder vryheid! Want ons het GEEN geloof in wat ons sê nie!

Maar ons is vinnig om te vra waar is God? Ek sal jou sê waar is God! Hy is in die Hemel! En Hy gaan daar bly TOTDAT jy en ek Hom roep!

Sag. 4:6 “Nie deur krag of deur geweld nie, maar deur my Gees, sê die HERE van die leërskare.”

(Geskryf deur Belinda: belindapaar@gmail.com)

Vertrou op die Woord!

 

Psalm 119:41-48: "En laat u goedertierenhede oor my kom, o HERE, u heil volgens u belofte, sodat ek my smader iets kan antwoord, want ek vertrou op u woord. En onttrek die woord van waarheid nie geheel en al aan my mond nie, want op u verordeninge wag ek. Dan wil ek u wet altyddeur onderhou, vir ewig en altyd, en in die ruimte wandel, want ek soek u bevele. Ook wil ek voor konings van u getuienisse spreek en my nie skaam nie. En ek wil my verlustig in u gebooie wat ek liefhet, en my hande ophef na u gebooie wat ek liefhet, en u insettinge oordink."

Hoe nader ons beweeg aan Jesus se koms, hoe meer is daar mense wat ons as Christene wat vasstaan op die woord "smaad" m.a.w, ons spot omdat ons nie soos die wêreld glo nie. Maar dit is juis as ons onwrikbaar vasstaan op Sy Woord, dat die Here Sy goedertierenhede en Sy heil oor ons sal laat kom. En dit lei daartoe dat ons 'n getuienis het teenoor hulle wat ons so wil spot, en dis juis omdat ons vertrou op die Woord van die Here.

Hoe meer ons op die Woord vertrou, en doen wat die Here van ons verlang, hoe minder sal die woord van waarheid uit ons mond onttrek. Ons sal dus nie anders kan as om te alle tye die woord van waarheid te spreek nie. Dit sal verder daartoe lei dat ek Sy wet sal onderhou vir ewig en altyd, want dit wat ek spreek, is dit wat ek doen, want die Bybel sê immers wat die hart  van vol is, loop die mond van oor.

En na die mate wat Hy Sy goedertierenhede en heil oor my uitstort, en ek in Sy verordeninge lewe, gaan ek nie anders kan as om met vrymoedigheid te getuig teenoor diegene rondom my van wat Hy in my lewe doen nie. En ek sal daardie vrymoedigheid hê, ongeag wie die mense rondom my is, of dit familie of vriende of hooggeplaaste mense is.

Daar is mos 'n gesegde wat lui: "A man on his knees before God, can stand before any man."

En weet jy, al hierdie dinge lei net verder daartoe dat ek my al hoe meer verlustig in Sy gebooie, dit begin geniet in my lewe, en dit daagliks oordink en toepas. Dit is wat die Woord van die Here so 'n wonderlike lewende Woord maak, dat mens dit op jou eie kan geniet, dit saam met ons Hemelse Vader kan geniet, en dit teenoor andere rondom ons kan wys.

Mag hierdie week jou al hoe nader bring aan hierdie wonderlike God wat ons dien en aanbid, ongeag jou omstandighede, of voor wie jy staan.

GEBED: 

"Vader, dankie ek kan vertrou op U onveranderlike Woord. Leer my asseblief elke dag net meer van U verordeninge en insettinge deur U Heilige Gees, sodat ek kan getuig van U grootheid en goedertierenheid en heil in my lewe, maak nie saak voor wie ek staan nie. In Jesus Naam. Amen."

 Geskryf deur: tiaan gildenhuys

(tg@oicb.co.za)

My reg?

Wanneer jy groot geword het en geskool was in 'n geestelike gemeenskap van 'outoriteit-neem-oor-die-vyand-en-al-sy-boosheid' en ook heers oor alles, wat aan jou toevertrou word as goeie rentmeesters [Lukas 10:19 en Genesis 1:28], dan loop die 'koninlike-DNA' sommer sterk deur jou are. Jy voel jy kan berge versit, prinse onttroon en sommer planete skuif!

Ongelukkig kan hierdie ook 'n baie gevaarlike geloofs-ingesteldheid wees, wanneer jy nie 'n baie suiwer Skriftuurlike en gebalanseerde dissipelskap ontvang het nie. [Matthèüs 28:19] Wanneer jou leermeesters nagelaat het om jou te leer, dat Christus NIE net die magtige 'Leeu van Juda' was nie; maar vir 'n baie kort seisoen in Sy lewe, moes Hy ook die 'Lam van God' wees. Iemand wat gewillig moes opstap na die slagpale toe. Om GESLAG te word. Nou nie meer so 'n 'koninlike' gedagte nie, of hoe?

Die ongeleë gevaar van die baie vleeslike 'ek-is-geregtig-tot-dit-en-ek-is-geregtig-tot-dat', kan onverwags so vinnig inkruip en jou weer verenig met die trotse-en selfregverdigende troon van 'EK.' Die Engels noem dit 'ENTITLEMENT'.

En dan; gebeur die lewe. En ook selektiewe goed, wat buite jou beheer is. Dit mors ewe skielik met jou geleerde teologie. Dit het geen genade vir joú oortuigings nie en soveel, as wat jy dit geestelik probeer 'hanteer', word dit net erger. Leë antwoorde en geïrriteerde frustrasie. Hoe kán hierdie dinge met my gebeur, vra jy jouself? En hoekom met mý? [Asof jy gevrywaar word van alle lewens-storms.]

Jou gemodeleerde 'formules' werk nou nie meer so mooi nie en jy trek dit persoonlik aan: 'Ek moet sekerlik iets verkeerd doen, of my geloof is nie genoeg, soos 'Pastor Bill' sin in Amerika nie.'

STOP. Kan jy net stilword vir 'n oomblik, asseblief Christen? Hersien net gou weer Jesus se afhanklike woorde in Johannes 5:19: 'Waarmee is My Vader nou besig in My lewe? En hoe werk Ek SAAM met Hom? [My eie verwerking]

Die fokus hiér, lê op 'SAAM'.

Die enigste dissipline, wat jou in volle ritme kan hou met God, is daaglikse, intieme dialoog. Net soos, wat Jesus moes doen met Sy Vader. Dit gaan jou dwing, om uit die 'formule-bootjie' uit te klim en Hom blindelings te kan vertrou vir iets heeltemal nuuts, wat elke dag op die water gaan aankom. Hy 'BLY' skeppend en Hy 'IS' nog steeds die Skepper. Hy sal verseker, en elke keer, iets nuuts na vore bring.

Hoe weet ek dit, vra jy miskien? [TERUG-IN-TYD-VANDAG] Wel, dit was nog net laas week, waar Jesus afgebuk en begin modder speel het met Sy spoeg, 'n handvol daarvan op jou blinde oupa se oë geplak het en nadat die 'putty' afgewas was, kon oupa toe helder sien! [Johannes 9:6] Gister weer, het Hy jou geliefde skoonma gevra, om haar bed op te tel en te begin loop, na 'n 38 jaar se bedlêende tronk. En sy het! Met groot vreugde. [Johannes 5:8]

Gisteraand om die kampvuur, toe ons 'choppies' en braai-broodjies geeët het, wou jou pa niks eet nie. Vir die derde dag nou al. Finansiële spanning glo. Ons weet ook van die SARS verrassing, wat laas week in die pos gekom het. Die keiser soek alwéér, wat hom toekom. In jou pa se erge bekommernis, vra Jesus hom toe, om gou 'n vis te gaan vang en wanneer hy dit uitgetrek het, sal daar 'n groot rôl oranje note in die bek van die vis wees. 'Betaal daarmee jou skuld, Johan. Kom dan terug en eet saam met ons 'n skilpadjie', was die Wonderwerker se woorde. [My eie verwerking] En dit het ook presies, net so afgespeel! Jou pa is 'n ander mens vandag, nie waar nie? Méér gelowig, as jy my sou vra. [Matthéüs 17:27]

Môre vra die Meester jou weer, om jouself sewe keer te gaan afwas in die Oranjerivier, net Noord van Prieska. Met verbasing, gaan jy sien, dat jou melaatsheid heeltemal weg is! En wag, daar is meer: Jou vel gaan so nuut wees, soos 'n jong kind s'n! Nie eers soos 'n volwasse soldaat se vel nie. [2 Konings 5:1-14]

God werk buite standaard formules. Nog meer - buite mensgemaakte formules. Hy kan nié in 'n vuurhoutjie-boksie gedruk word nie. Elke keer is anders.

Net só werk dit ook met jou lewens-storms, wat nie altyd met joú teologie gaan klop nie. Ja, ek glo ook; ons IS koninlik en konings-kinders daarby, maar ons is OOK Sy gesante, mede-werkers in die koninkryk en Sy EIENDOM. Ons behoort nie aan onsself nie. Hy kan met ons maak, nét wat Hy wil. En vir AL Sy eie doeleindes. Nie ons s'n nie.

Al beteken dit, dat jy met tye, in uitdagende omstandighede moet beland, wat jou gemaksone geweldig baie gaan bedreig en wat ook nie altyd te lekker is vir jou vlees nie, sodat God jou kan gebruik, om die ateïs wat oor jou pad kom, te kan bedien tot 'n besluit vir die ewige lewe. Wat is nou belangriker hiér: 'n Ongeredde man se siel, wat gered word en die ewigheid in God se boesem lê; of jou eie 'Christen reg', om as gelowige geen storms te hê nie? Wat leef nou weer verewig: Liggaam of gees? [Let wel: Diskresie oor die tipe storms is nodig. Ons het ook 'n opportunistiese vyand, wat baie kreatief kan wees! Johannes 10:10]

Indien dit vir jou moeilik is, om hierdie stelling te omhels, wil ek graag vir al die Nuwe Testamentiese apostels/dissipels van Christus in die getuiebank vra, hoe hulle elkeen, in die fleur van hulle lewens en ook toe later, dood is? Nog meer, hoe was hulle fisiese lewens-kwaliteit gewees, voor hulle dood?

Gun my om te sê, dat hierdie 'n baie omstrede en uitdagende stelling vir die 'voorspoed-teologie' gemeenskap is. Dit sal egter ook wees, want hulle is ook maar net nóg 'n 'formule' gedrewe beweging. Weekliks moet ek bybelse antwoorde en leiding verskaf aan verwarde lede, wat ook 'ge-name, ge-frame en ge-claim' het en absoluut niks in oorvloed ontvang het nie. 'Te min geloof?', vra hulle my klokslag. Of heel moontlik ook 'entitlement', wat God nooit sal behaag nie?

Hierdie is 'n uitspraak, wat aanvanklik lyk of dit 'n teenstrydigheid bevat, want God wil tog hê, dat dit met ons goed moet gaan en dat ons in oorwinning moet lewe [Johannes 10:10 en Jeremia 29:11], nie waar nie, maar by nader beskouing, is bostaande tog onverwags betekenisvol en waar. Dit is onvermydelik, dat kinders van God ook moeilike uitdagings in hul lewens gaan beleef. Ja, lewens-storms buite hulle beheer. Magteloos. Tye wanneer jy ook nie alles bymekaar gaan hê nie. Wat dan?

Waartoe, en waarop is ek as koninlike gelowige, geregtig?

Antwoord: God se teenwoordigheid. Sy intieme leiding. Deurbraak. Bemoediging. Die muur van vuur om my. 'n Verskansing van beskerming oor my. My Skild en my Pantser in die oorlog. 'n Hoëpriester. Die Herder wat intens omgee en sorg. En laastens, 'n baie kort tydjie op aarde, waar jy SAAM met God, Sy koninkryk kan uitbrei en bevorder - op Sy termes, en in Sy tyd, en in Sy vermoëns - of dit in die vuur is, soos met Daniël of op Jesus se bors, soos Johannes. Want Hy BESIT jou. Jy het geen eienaarskap meer oor jou nie. [Galásiërs 2:20] Hy het die regte. Hy is Heer.

In slot, JY is ook geregtig op die baie salige en verwelkomende woorde van ons Koning, eendag in die hiernamaals, wat sê: 'Mooi so, goeie en getroue dienskneg. Oor weinig was jy getrou, oor veel sal Ek jou aanstel. Gaan in, in die vreugde van jou Heer.' [Matthèüs 25:23]

GEBED:

'Vader God, gee my die genade, om aan die einde van MYSELF te kom. En hóú my daar, Heer. My begeerte is, dat wanneer U na my kyk, U net vir Christus sal raaksien. In die Naam van Jesus Christus, van Nasaret. Amen.'

Geskryf deur: hennie van der westhuizen

(info@paragonlife.co.za)

Gooi aan die ander kant

In albei gevalle waar Jesus vir die dissipels gesê het om weer die nette te laat sak, was dit nadat hulle die hele nag op die water spandeer het en niks gevang het nie. Hulle was dus reeds besig met die dinge wat hulle moes doen en gewoond was om te doen en tog het dit geen resultate opgelewer nie.

Tog die oomblik toe Jesus in die prentjie kom, toe is die voorsiening oorvloedig. 

Luk 5:4  En toe Hy ophou met spreek, sê Hy vir Simon: Vaar uit na die diep water en laat julle nette sak om te vang.

Luk 5:5  En Simon antwoord en sê vir Hom: Meester, ons het die hele nag deur hard gewerk en niks gevang nie; maar op u woord sal ek die net laat sak.

Luk 5:6  En toe hulle dit gedoen het, het hulle ‘n groot menigte visse ingesluit; en hulle net wou skeur.

In bogenoemde deel, sien ons dat nadat Petrus geluister het na die preek wat Jesus uit die boot gedoen het, hy tog besluit het dat hy op Jesus se woord sou reageer omdat hy gehoor het dat Jesus met gesag gespreek het.

Jesus se woord is vandag nogsteeds net só kragtig asof Hy dit in hiérdie oomblikke tot ons spreek...die vraag is: “na wié se woorde luister ons in tye van beproewing?” Selfs nou terwyl die “lockdown”-periode verleng is en dit nog 'n veel groter impak op mense se finansies tot gevolg het en ook nog meer vrees by mense aanwakker, na wié se stem gaan jy as kind van God kies om te luister? 

Ons lees dan ook heel aan die begin nadat sonde in hiérdie aarde gekom het en die mens skielik besef het dat hy naak is, dat God ook aan die mens die vraag stel: “wié het jou dit te kenne gegee?” 

Gen 3:10  En hy antwoord: Ek het u geruis gehoor in die tuin en gevrees, want ek is naak; daarom het ek my verberg.

Gen 3:11  En Hy sê: Wie het jou te kenne gegee dat jy naak is? Het jy geëet van die boom waarvan Ek jou beveel het om nie te eet nie?

Dit is só maklik om God se woord aan te haal in tye wat dit goed gaan of wanneer ons omstandighede gemaklik is en dinge normaal voortgaan...woorde soos: “Hy sal jou nooit verlaat of in die steek laat nie, God is gister, vandag en tot alle ewigheid dieselfde en niks is by God onmoontlik nie”...maar is dit waaraan jy vashou as jou hele lewe binne een dag omgekeer word?

In die tweede geval waar Jesus die dissipels weer vra of hulle iets gevang het, sien ons dat Hy hulle beveel om op presies dieselfde plek weer die nette in te gooi. Baie dikwels wil ons só graag uit ons omstandighede kom of wil ons hê dat die Here dit verander, maar dan lê ons antwoord eintlik reeds binne ons huidige omgewing of situasie.

Dié antwoord of oplossing lê egter in die antwoord wat Jesus gee: “gooi aan die anderkant”...somtyds verg dit net bloot 'n doelbewuste keuse om anders na 'n situasie te kyk of selfs ons ingesteldheid daaromtrent te verander, wat dan die deurbraak bring.

Joh 21:6  En Hy sê vir hulle: Gooi die net aan die regterkant van die skuit, en julle sal kry. Hulle het toe gegooi en deur die menigte van visse was hulle nie meer in staat om dit te trek nie. 

Ken van die groot sleutels tot deurbraak in mense se lewens is dankbaarheid en om vergenoegd te wees met jou omstandighede! 

Fil 4:11  Nie dat ek dit uit gebrek sê nie, want ek het geleer om vergenoeg te wees met die omstandighede waarin ek is.

Fil 4:12  Ek weet om verneder te word, ek weet ook om oorvloed te hê; in elke opsig en in alle dinge is ek onderrig: om versadig te word sowel as om honger te ly, om oorvloed te hê sowel as om gebrek te ly.

1Tim 6:6  Maar die godsaligheid saam met vergenoegdheid is ‘n groot wins.

1Tim 6:7  Want ons het niks in die wêreld ingebring nie; dit is duidelik dat ons ook niks daaruit kan wegdra nie.

1Tim 6:8  Maar as ons voedsel en klere het, moet ons daarmee vergenoeg wees.

 Daar is baie dinge in ons lewens, soos die “lockdown”, wat ons niks aan kan doen om te verander nie, maar die wyse waarop ons daarna kyk of dit hanteer, gaan bepaal of dit ons paniekbevange laat en of ons meer as oorwinnaars daardeur sal kom!

 GEBED:

Onse Vader wat in die hemel is, laat U naam geheilig word en laat U koninkryk kom...in die hemel en netso ook op die aarde, gee ons vandag ons dag se brood en laat ons nie in die versoeking kom nie. Pappa, help ons dat ons na U stem sal luister en nie na die geraas van die wêreld nie, juis omdat ons weet dat U woord waarheid is en dat U ons nooit in die steek sal laat nie...amen!

 Geskryf deur: ernest phillipson

(ecp@oicb.co.za)

Leer my die weg!

Psalm 119:33-40: "HERE, leer my die weg van u insettinge, sodat ek dit tot die einde toe kan bewaar. Gee my verstand, dat ek u wet kan bewaar, ja, dit kan onderhou van ganser harte. Laat my wandel op die pad van u gebooie, want daarin het ek ‘n behae. Neig my hart tot u getuienisse en nie tot winsbejag nie. Wend my oë af, dat hulle geen nietigheid sien nie; maak my lewend in u weë. Vervul aan u kneg u belofte wat pas by u vrees. Wend my smaadheid af wat ek vrees, want u verordeninge is goed. Gewis, ek het ‘n begeerte tot u bevele; maak my lewend deur u geregtigheid."

In die tyd waarin ons ons tans bevind, hier kort voor die koms van ons Here Jesus Christus, is dit belangriker as OOIT vantevore in die geskiedenis dat ons die Here sal vra om ons die weg van Sy insettinge te leer, juis sodat ons dit in ons lewens kan bewaar tot die einde toe.

En om die Here se insettinge, Sy voorskrifte, Sy gebooie te kan bewaar tot die einde toe, het ons verstand nodig, geestelike insig wat net Hy ons kan gee deur Sy Heilige Gees. En ons moet Hom juis vra vir daardie insig en verstand, want deur dit sal ons weet HOE om Sy insettinge te onderhou en te doen.

As ons die Here verder vra om ons te laat wandel op die pad van Sy gebooie, sal Hy dit doen deur ons deur Sy Heilige Gees leiding te gee, volgens Romeine 8:14. Want op hierdie pad vind ons volgens 1 Johannes 5:3 dan uit dat Sy gebooie nie swaar is nie, en word dit iets waarin ons ons satisfaksie en plesier kan vind om 'n goeie lewe te lei.

En as die Here my so deur Sy gees lei, gaan die Here se getuienisse in Sy Woord, en Sy weë, vir my baie belangriker raak as enige winsbejag of die begeerte na fisiese wêreldse dinge, en sal my oë nie "rondkyk" na nietige dinge wat geen geestelike waarde vir my het nie.

Verder lees ons in die Woord dat die vrees van die Here die beginsel van alle wysheid is (Psalm 11:10), en kan ons dus ook die Here vra om aan ons die belofte van die vrees van die Here in ons lewens te vervul, dat ons ook daagliks daardie wysheid salhê. Dit sal tot gevolg hê dat ons sal afwyk van die kwaad en sal haat wat sleg is.

En as ons lewend gemaak word na God se weë, dan sal die skandes van ons sondes (smaadhede) ook van ons afgewend en weggevat word, juis omdat die Here se verordeninge net goed is.

As ons leer om self 'n opregte begeerte te hê tot die Here se bevele, sal Hy ons ook lewend maak na Sy geregtigheid. Vir 'n verduideliking van waaroor God se geregtigheid werklik gaan, kyk gerus na hierdie YouTube video van my: https://youtu.be/-BPar29HzDo

Mag ons dus elkeen in hierdie week kies om die Here te vra om ons lewend te maak na Sy weë en na Sy geregtigheid, want ons Jesus se koms is BAIE naby!

GEBED: 

"Vader, leer my asseblief elke dag deur U Heilige Gees U weë en U insettinge, en maak my lewend na U Woord en U geregtigheid, in Jesus Naam. Amen."

 

 Geskryf deur: tiaan gildenhuys

(tg@oicb.co.za)

Tweespalt in die Liggaam

Galasiërs 4:28-29:  "Maar ons, broeders, is soos Isak, kinders van die belofte; maar soos destyds hy wat na die vlees gebore is, hom wat na die Gees was, vervolg het, so is dit nou ook."

Wanneer ek so om my heen kyk na die hedendaagse kerkgangers, maak dit my baie hartseer om die groot kloof tussen gelowiges te sien. Omdat ek in ‘n  ateïstiese ouerhuis groot geword het, het ek self belewe dat die Christelike waardes baie aantreklike waardes is en dit het my in staat gestel om te verstaan wat aan die gang is. Maar nie alleen dit nie, dit het my ook help verstaan waaroor die eienaardige tweespalt wat daar tussen ons bestaan eintlik gaan.

Aan die een kant is daar die wat met hart en siel glo dat die Bybel presies bedoel wat dit sê, en daarom glo ons in die bekering van gees, siel en ligaam, d.w.s. ons glo steeds in die genesing van alle siektes, die uitdryf van demone en die verwydering van vloeke in en deur die naam van Jesus Christus en ons Hemelse Vader. Maar daar is ook ’n ander groep wat ’n soort "intellektuele geloof" beoefen waarin hulle getrou is aan ingewikelde teologieë waardeur hulle na ’n heilige uiterlike voorkoms streef, maar hulle verwerp die geestelike pad van heiligmaking, of die gawes van die Heilige Gees, of die bediening van genesing, of bly so ver weg daarvan as moontlik.

Hulle aanvaar enige boek met die titel “Bybel” as die Woord van God en sal selfs soek tot hulle ’n vertaling vind wat by hulle teologie pas om hul punt te staaf. Dit is dan ook vir my ’n hartseer saak om te sien hoe die twee groepe met mekaar vassit en hewig argumenteer totdat hulle selfs begin twyfel aan die ander se bekering. Alhoewel dit op die oog af lyk of die twee groepe vanuit dieselfde oortuigings hulle leefwyses bepaal, is dit egter net in die fisiese die geval.

Net so was Abraham die pa van Ismael en Isak en dus was hulle in die fisiese broers, maar Isak was ’n kind van die belofte en Ismael was ’n kind van die vlees en so is dit ook met die kerkgangers van ons tyd. Party is mense uit die vlees gebore en hulle het ’n intellektuele verhouding met die Evangelie van Jesus Christus en laat hul intellek toe om hul gedrag te beheer op ’n wyse wat so na as moontlik lyk aan dit wat in hul gekose Bybel vertaling aangedui word en pas by hulle sosiale, ekonomiese en politieke oortuiging.

Hierdie is dan ook die oorsaak van hulle twyfel in die gawes van die Heilige Gees, wat insluit die genesings bediening wat geestelik van aard is, en om tekens en wonders en kragtige dade te laat geskied vir die eer van Jesus Christus. Hierteenoor is daar die Isak groep, die kinders van die belofte, bekeer en deur die waterdoop en belyding van die geloof dat Jesus Christus ons Saligmaker en Verlosser is en daarom die geskenk van die Heilige gees onvang het.

Johannes 3:3:  "Jesus antwoord en sê vir hom: Voorwaar, voorwaar Ek sê vir jou, as iemand nie weer gebore word nie, kan hy die koninkryk van God nie sien nie."

In die praktyk glo beide die bogenoemde groepe heelhartig dat hulle “hemel toe sal gaan” en dit is hier waar die bron van oortuiging belangrik word. Die Ismael groep se vertroue berus op hulle teologieë, doktrines, tradisies en hulle laat hul intellek toe om die oortuiging te bring (ek noem dit sommer “slim praatjies”), en hulle verhoog daardie intellektuele dinge tot die status van die Bybel. Daardie aksie word streng verbied (Openbaring 22:18  Want ek betuig aan elkeen wat die woorde van die profesie van hierdie boek hoor: As iemand by hierdie dinge byvoeg, dan sal God oor hom die plae byvoeg waarvan in hierdie boek geskrywe is) en dit wys ons dan ook dat dit korrek is om hulle as Ismael se volgelinge te beskryf, want hulle wil die dinge van die Gees vanuit die vlees doen, en vervolg die kinders van die belofte wat die dinge van die Gees navolg.

Wat egter van groter belang is, is hoe ons onself as kinders van die belofte kan beskryf en wat dan ook vir ons dit duidelik maak dat ons nie aleen “hemel toe” sal gaan nie maar dat ons inderdaad met die wegraping al by Jesus sal wees. Die rede hiervoor is dat ten tye van die waterdoop en ons geloofsbelydenis begin die Here met die vernuwing van ons gees EN gee hy ons die beloofde geskenk van die Heilige Gees en so word ons dan weergebore.

Dit is juis hierdie gebeurtenis wat die volle verduideliking is van die fundamentele verskil tussen die twee groepe en waarom ons sonder moeite kan glo in wonderwerke, genesing van siektes, die uitdryf van demone en die breek van vloeke in ons lewens.

Dit alles verduidelik nog steeds nie waarom die twee groepe dan so met mekaar haaks is nie. Die rede waarom die “Ismael groep” daarin behae vind om die wedergeborenes af te takel is uiteindelik maar dieselfde rede waarom Ismael sy jonger broer so bespot het. Die oorsprong daarvan lê o.a. in die vloeke wat hulle op hulself bring deur die byvoegings tot die Bybel, en die vloeke gee satan plek om in hulle die gees van jaloesie en die gees van godsdiens te vestig, wat dan die bespotting en vervolginge veroorsaak.

Let egter versigtig op waar ons as wedergeborenes in die stryd staan, en die gevaar waaran ons blootgestel word. Die satan hou nie van ons nie en gaan sy uiterste bes doen om ons teen Jesus te draai. Hy doen dit deur gedagtes in ons te plaas dat ons eintlik baie beter is as die Ismael groep en tensy ons elke gedagte gevange neem tot die gehoorsaamheid aan Christus (2 Korinthiërs 10:5) kan satan veroorsaak dat ons ook ons saligheid kan verloor.

Is daar dan geen oplossing vir die tweepalt nie?

Galasiërs 4:30:  "Maar wat sê die Skrif? Werp die slavin en haar seun uit, want nooit mag die seun van die slavin saam met die seun van die vrye erwe nie."

Daar is wel ’n oplosing en dit begin by Paulus se woorde in Galasiërs 4:30. Die kinders van die vlees wat ons kan uitken deur wat hierbo beskryf is, soos hul ongeloof in die gawes van die Gees en die bediening van genesing, is nie erfgename en broers en susters van Jesus of van ons nie maar is in werklikheid in ’n swakker plek as die ongelowiges.

Hulle is ook geen werklike bedreiging vir ons nie, net soos Ismael nie werklik ’n bedreiging vir Isak was nie. MAAR, maar hulle het ons broodnodig en dit is ons plig om uit te hou deur die liefde wat aan ons gegee is en ons plig in die uitvoer van ons Groot Kommissie, om hulle ook ware dissipels van Jesus te maak.

Broeders en susters in Jesus, ons kan die dringendheid aanvoel om hulle te lei tot bekering omdat ons terdeë besef dat die wegraping naby is en dit is goed so. Ons moet egter ook onthou dat ons net die instrument van die Heilige Gees aan die ongelowiges is maar dat dit hulle gees is wat die Heilige Gees se oortuiging moet aanvaar of verwerp. Ons opdrag is om hulle die liefde van Jesus in ons te laat sien, terwyl ons onthou dat hulle gespot en beledigings ons niks kan aandoen nie en dat hulle in werklikheid betreurenswaardig is sonder Jesus Christus.

Johannes 13:35: "Hieraan sal almal weet dat julle my dissipels is, as julle liefde onder mekaar het."

GEBED:

"Hemelse Vader U is die enigste Almagtige, ewige en alomteenwoordige God en ek loof U magtige Naam. Vader ek vra om vergifnis vir al my frustrasies, argumente en trots teenoor die kinders van die vlees. Ek smeek U Vader, reinig my deeglik van al my sonde en ek smeek U vir ’n nuwe invulling van die Heilige Gees en vir gehoorsaamheid aan die opdragte van U Heilige Gees om alle verlore siele te lei na U troon van genade en verlossing. In alle nederiheid vra ek hierdie in die Naam van Jesus Christus my Here en Redder. Amen."

Geskryf deur: sybrand van kwawegen
(sybrand191@gmail.com)

Waarna soek jy?

Mat 6:33  Maar soek eers die koninkryk van God en sy geregtigheid, en al hierdie dinge sal vir julle bygevoeg word.

Hierdié is sekerlik een van die mees gekwoteerde skrifgedeeltes uit die Bybel en die klem word meestal op twee dele daarvan geplaas...”soek die koninkryk” en “alle dinge sal bygevoeg word”. Die woordjie “koninkryk” het dan ook vir baie mense 'n verskillende betekenis in lyn met hul afsonderlike openbaring daaroor.

Een ding wat dit verseker nie beteken nie, is dat dit verwys na die hemel, aangesien die Griekse woord wat hier gebruik word, die woord: “basilea” is, wat in eenvoudige taal beteken om te heers soos 'n koning in sy koninkryk. In kort beteken dit vir my dat mens jou identiteit in Christus moet vind, want dan sal jy dinge uit 'n posisie van heerskappy benader!

Dié deel wat egter meestal nie na verwys word nie, is om ook God se geregtigheid te soek en dit verwys daarna dat ons Sy manier van dinge doen, moet navolg...want dit is die tweede vereiste vir alles wat dan sal volg.

Joh 8:32  En julle sal die waarheid ken, en die waarheid sal julle vrymaak.

Wanneer iets vir jou oopbreek en dit 'n openbaring word, dan word dit vir jou waarheid en het dit die potensiaal om jou vry te maak van wat dit ookal is wat jou gebind het. Daarom wanneer jy die waarheid van jou identiteit en outoriteit in Christus besef, dan is daar reeds 'n paar leuengeeste wat die pad vat.

Omdat ons in Christus is en Hy in ons en Hy ook nou aan die regterhand van Abba sit, beteken dit dat ek ook alreeds in hemelse plekke sit en dat my posisie van outoriteit is soos wat dit in die hemel is. Daarom leer Jesus ons ook om te bid dat die koninkryk hiér op aarde moet kom net soos wat dit in die hemel is. Ons is daardié gesante van God wat hiérdie outoriteit op aarde moet laat manifesteer deur die Heilige Gees wat in en deur ons werk!

2Kor 5:17  Daarom, as iemand in Christus is, is hy ‘n nuwe skepsel; die ou dinge het verbygegaan, kyk, dit het alles nuut geword.
2Kor 5:18  En dit alles is uit God wat ons met Homself versoen het deur Jesus Christus en ons die bediening van die versoening gegee het,
2Kor 5:19  naamlik dat God in Christus die wêreld met Homself versoen het deur hulle hul misdade nie toe te reken nie en die woord van die versoening aan ons toe te vertrou.
2Kor 5:20  Ons tree dan op as gesante om Christus wil, asof God deur ons vermaan. Ons bid julle om Christus wil: Laat julle met God versoen.

As ons Mattheus 6 vanaf vers 25 lees, dan sien ons dat om besorgd te wees oor die wêreldse dinge, dat dit die dinge is waarna heidene soek en oor besorgd is. Ons hemelse Pappa weet egter wat ons nodig het en wannéér...en Hy belowe dat Hy ons nooit in die steek sal laat nie...veral ook in hiérdie onseker tye van Covid-19 waarin ons leef en al die finansiële implikasies wat dit tot gevolg het.

Dié vraag bly dus:...”Waarná is jy op soek in hiérdie laaste dae waarin ons leef?


GEBED:

Hemelse Vader, help ons deur U Heilige Gees om die dinge te soek wat daar bó by U is en om ons identiteit en outoriteit in Christus te besef en te vind, sodat ons in volle heerskappy kan leef en waardige gesante vir U kan wees vir die werk wat U deur ons wil doen om ook U koninkryk hiér op aarde te laat kom...amen!

Geskryf deur: ernest phillipson
(ecp@oicb.co.za)

God se belofte maak lewend

Psalm 119:49-56: "Gedenk die woord aan u kneg, omdat U my laat hoop het. Dit is my troos in my ellende, dat u belofte my lewend maak. Vermeteles het baie met my gespot; van u wet het ek nie afgewyk nie. Ek het gedink, o HERE, aan u oordele van ouds, en ek het my getroos. Toorngloed het my aangegryp vanweë die goddelose wat u wet verlaat. U insettinge was gesange vir my in die huis van my vreemdelingskap. HERE, in die nag het ek gedink aan u Naam, en ek het u wet onderhou. Dit het my deel geword, omdat ek u bevele bewaar het."

Soos ons die pad saam met die Here loop, leer ons om God se beloftes in die Woord ons eie te maak. En wanneer mens werklik begin raaklees wat daardie beloftes is, en wat dit in ons lewens beteken, dan gee dit ons hoop in die slegste van tye, ongeag wat rondom ons gebeur. En wanneer ons werklik sien wat daardie beloftes vir ons beteken, gee dit ons sommer nuwe lewe en nuwe hoop vir wat ons alles moet doen in ons omstandighede.

Maar, soos ons herhaaldelik in die Skrif lees, sien ons ook hier dat Dawid bevestig dat wanneer jy wel so vasklou aan God se Woord en Sy beloftes, mense rondom jou jou sal begin spot oor jou geloof, of oor jou vashou aan God se Woord. En dan het ons die keuse of ons gaan toelaat dat daardie tipe vervolginge wat ons verduur, ons gaan wegtrek van die Here af, en of ons steeds gaan vasstaan op God se Woord en ons troos daardeur gaan ontvang.

En ons sien dat Dawid sê hy het kwaad geword vir die goddeloses rondom hom wat God se wet verlaat het, en nie wou doen wat die Woord sê nie. Net so word ons ook maar van tyd tot tyd kwaad vir die spotters en goddeloses rondom ons wat nie wil hoor nie, of wat ons spot omdat ons vasklou aan God en Sy Woord, maar ons het steeds die keuse om anders op te tree in sulke omstandighede.

As ek werklik lief is vir God en Sy Woord, sal dit ook soos "gesange" wees vir my gees, wat my persoonlik opbou, en krag en vrede gee, al voel ek soms soos 'n "vreemdeling" tussen diegene rondom my.

En hoe meer ek Sy Woord en Sy beloftes en opdragte bedink, in die dag en selfs in die nag as ek op my bed lê, hoe makliker word dit om die Here se bevele te onderhou. God se Woord en Sy insettinge en bevele word dan ook deel van my lewe, dit word onlosmaaklik deel van my en wil en gaan ek dit begin toepas in elke klein area van my lewe, hetsy in my huis, my huwelik, my verhoudig met my kinders, tussen my kollegas, ens.

Mag God se beloftes in hierdie week al hoe meer jou deel word, en mag jy na die mate wat jy Sy Woord en Sy bevele oordink, al hoe meer lewend gemaak word na Sy Woord, sodat jy ook troos kan ontvang, ongeag jou daaglikse fisiese omstandighede.

GEBED: 

"Vader, dankie vir die beloftes in U Woord wat my troos en my lewend maak. Leer my om dit elke dag al hoe meer deel te maak van my lewe, sodat ek nie moeg of moedeloos woord wanneer mense rondom my my sou spot of nie wil luister as ek met hulle praat oor U Woord nie. In Jesus Naam. Amen."

 Geskryf deur: tiaan gildenhuys
(tg@oicb.co.za)

Berei die weg

'Elke dal moet opgevul word en elke berg en heuwel moet wegsak; en die krom draaie, sal 'n reguit pad word en die skurwe plekke, gelyke weë. En alle vlees sal die heil van God sien.'
[Lukas 3:5-6]

Naas die tien maagde-gelykenis, raak hierdie gedeelte van die evangelie-dokter, my nog die meeste. Hy skryf oor Johannes die doper, wat bedien en die saligheids weg 'marineer' vir die koms van die Messias. Hy was Jesus se VOORLOPER. Dit was sy grootste mandaat. Ongelukkig moes sy kop rôl daarvoor, maar sy verbasende toewyding, was een vir die boeke.

Johannes was 'n voorloper vir die eerste koms van die Messias. Vandag is EK en JY, Johannes-voorlopers vir Sy tweede koms. Ons moet ook daagliks profeteer: 'Berei die weg van die Here voor en maak Sy paaie gelyk. Hy is oppad!'

Wanneer 'n koning in die bybelse tyd, 'n sekere landstreek of 'n stad besoek het, dan het hy 'n voorloper met sy span voor hom uitgestuur, om die paaie, wat lei na die beplande bestemming toe, te gaan skoonmaak en te beveilig vir die koning se veilige aankoms. Die weg moes voorberei word. Niks moes in die pad gekom het, wat die koning se besoek sou belemmer nie.

Johannes gebruik hiér in Lukas, dieselfde parallel, sodat die mense hulle harte moet voorberei en oopmaak vir die lang-verwagte Verlosser en Sy boodskap. Die Messias-Koning is oppad vir Sy besoek en bediening op aarde en die doper spreek vier teikengroepe aan in vers 5. Hy bevestig eers die Ou Testamentiese skadubeeld van Jesaja 40:3-4, om sy aflewering net 'n bietjie meer 'wettig' te maak vir sy bystaande fariseër-gehoor. [Die addergeslag mos.]

Dieselfde opdrag van Johannes is egter nog steeds toepaslik vir elke siel vandag nog.

1. Lukas 3:5.. 'Elke dal moet opgevul word..'

Hier praat Johannes met dié, wat as gevolg van hul sonde-las, nie WAARDIG genoeg voel, om deur 'n Koning of Sy boodskap ontvang te word nie. Onwaardigheid of minderwaardigheid is egter nog steeds 'n vorm van hoogmoed en sonde, aangesien jy nog steeds 'n intense fokus op jouself het en nie die kosbare waarde omhels, waarmee Christus jou ten duurste, aan die kruis gekoop het nie. Dit was 'n duur transaksie, geliefdes.

Gun my ook om te sé, dat daar nie 'introverte' bestaan in die koninkryk van God nie. Daardie dal van 'not-worthy-enough', moet opgevul en gelyk gemaak word met 'n oorwinnings-en waarde identiteit in Christus, sodat jy die Messias kan ontmoet, wanneer Hy weer kom. Lig jou hoopvolle verwagting in Hom, BO jou aardse hindernisse van onwaardigheid.

2. Lukas 3:5.. 'en elke berg en heuwel moet wegsak..'

Hiér spreek Johannes die wetgeleerdes en fariseërs van sy dag aan, wat nou weer op hulle beurt, openlik MEERDERWAARDIG gevoel het bo hulle naaste met die gereëlde op-die-neus-afkyk, Skrif geleerdheid en subtiele beheer.

'Geestelike hoogmoed' is die groot boosheid, wat sommer vinnig 'n Vrystaat heuweltjie of 'n Kaapstad berg kan word in jou hart. Altwee is ewe gevaarlik. Met hierdie hindernis in jou hart, gaan jy nooit die ware Messias kan raaksien of ontmoet, wanneer Hy hier is nie. MAAK DAARDIE HOOGMOED GELYK, is die opdrag. Opregte bekering met belydenis van meerderwaardigheid en hoogmoed, is natuurlik 'n goeie begin vir jou tot oorwinning; en dra dan die vrug, wat by jou bekering pas. [Lukas 3:8]

Dit sluit ook eie-geregtigheid in, geliefde. Kom ek spel hom vir jou uit: Eie-geregtigheid is wanneer jy heeltemal op jou eie insigte, vermoëns, kragte en hulpbronne staat maak en nie Christus jou ENIGSTE toevlug en vertroue maak nie. Hy sny bitter fyn. Ondersoek maar gerus jou hart.


3. Lukas 3:5.. 'en die krom draaie, sal 'n reguit pad word..'

Johannes sonder ook nie die tollenaars van sy dag uit nie. Hy spreek hulle sterk aan en maak dit duidelik, dat hierdie wit kraag skelms, hulle 'krom draaie' van korrupsie, diefstal en oneerlikheid moet laat staan en hulle paaie gelyk maak, as hulle wil hê, die Messias moet hulle ontvang. Volg gerus ons eie Matthéüs se radikale voorbeeld. Hy was mos ook 'n tollenaar. Dit is baie kommerwekkend vir my, hoe sekere kinders van God nog steeds skelm kan bly en nie wegdraai van hulle wêreldse weë nie!

Ek ken Christen miljoenêrs, wat geen geheim daarvan maak, dat hy éérs 'n besigheidsman is en dan 'n Christen. Ek sien dit elke dag in my besigheid. Hy praat 'Christianese' baie vlot, tot ons by die besigheid kom. Jy het nog nie eers die transaksie mooi deurgetrap nie, dan het hy al klaar die fynskrif verander, toe jy jou rug draai.

Of meer; dit is net hoegenaamd nie binne hulle vermoë, om 'n belofte te kan hou nie. 'Kom ons hou Christus uit hierdie transaksie uit, broer, want kyk, ons is mos nog IN hierdie wêreld en dit is eintlik die bedryf, wat die status quo bepaal - nie die Bybel nie.' Ek is nogal nuuskierig, oor wát presies jou verweer gaan wees, wanneer jy eendag voor die troon van God moet staan?

4. Lukas 3:5.. 'en die skurwe plekke, gelyke weë.'

Hiér het hy met die Romeinse soldate gepraat, wat gereëld die publiek met rowwe humeure en geweld gehanteer het, met die doelgerigte poging, om gesag af te dwing. En, hulle was nogal suksesvol daarin. Hy sê vir hulle, dat hulle 'skurf' geword het in hul benadering tot die samelewing. Dit is hoegenaamd nie naaste-liefde nie. Jy kan 'n soldaat én 'n Christen wees, sonder om terug te graviteer na die barbaarse-en rowwe taktieke van Rome.

Só is daar vandag nog mans en vrouens, wat dieselfde doen met hul geliefdes en naaste. Narsiste en bullies, noem ons hulle. Die opdrag is baie duidelik, om daardie skurwe humeur te laat vaar; dit gelyk en glad te maak, soos skuurpapier oor 'n growwe stuk hout. Bely daardie woede, as sonde voor God en dra dan die vrug van jou bekering. [Lukas 3:8] En stop dit dan. Dit vernietig mense, broer! En suster. En indien jy nie vinnig daarmee gaan deel nie, gaan jy ook nie die Messias-Koning kan ontmoet nie. As jy nie regkom met oorwinning nie, soek bevryding, asb. Kontak ons gerus.

Lukas 3:6.. 'En alle vlees sal die heil van God sien.'

Johannes bring alles saam in 'n wonderlike belofte. Wanneer jy alle hindernisse hierbo genoem, aangespreek het in jou lewe en die pad gelyk maak vir jou Koning, gaan jy ook binnekort die 'heil van God' sien - jou Bruidegom, Jesus Christus! Maranata!

GEBED:

Vader, openbaar aan my, as daar nog enige hindernisse in my hart is, wat keer dat ek die volheid van wie U is, kan insien, asseblief. En gee my die bevryding, om dit te laat vaar. In die Naam van Christus Jesus van Nasaret. Amen.


 Geskryf deur: hennie van der westhuizen
(info@paragonlife.co.za)

Verantwoordelikheid teenoor skuld

Fakture tyd

Hier is ons in die "lock-down" by nog ‘n maand einde. Dinge was moeilik en ons kon nie almal werk nie. So pluk menige hulle faktuurboeke uit en begin dink wie skuld hulle nog iets, vir wie het hulle iets gedoen of verkoop wat nog nie betaal het nie? Dit is nou ‘n goeie tyd om daardie agterstallige skuld te betaal sodat jy ook jou verpligtinge kan nakom. Dis mos hoe dit werk? Een hand was die ander.

Andere probeer nou ook om alle oortollige goed te verkoop wat darem iets werd is sodat hulle ook ‘n faktuur kan uitskryf. Sien my werk kan my nie betaal nie of my besigheid staan stil, maar iemand moet my net iets skuld sodat ek my begroting kan uitwerk.

Sommige wil selfs tot vir God ‘n faktuur of twee skryf want Sy Woord leer ons mos ‘n paar dinge soos:

Mal 3:10  Bring die hele tiende na die skathuis, sodat daar spys in my huis kan wees; en beproef My tog hierin, sê die HERE van die leërskare, of Ek vir julle nie die vensters van die hemel sal oopmaak en op julle ‘n oorvloedige seën sal uitstort nie.

Inskrywing 1 – ek gee gereeld my tiende so U skuld my.......

Gal 6:7 Moenie dwaal nie; God laat Hom nie bespot nie; want net wat die mens saai, dit sal hy ook maai.

Inskrywing 2 – ek het in goeie tye goed gesaai so U skuld my ‘n goeie oes...

En so kan ons aangaan met ek het dit gedoen so ek verdien dat. Ons moet vandag een ding besef en dit is dat God ons niks skuld nie. Elke faktuur wat jy vir Hom wil uitskryf is reeds betaal. Dit is volbring.

Hy sou vandag ‘n hele boek fakture vir my kon skryf want ek skuld Hom my lewe. Jesus het duur betaal vir my. Hy het Sy lewe gegee vir my. Tog is daar geen hemelse faktuurboek nie, maar ‘n Bybel vol beloftes van wat alles myne kan wees.

Ek gaan net een psalm neem en uitwys hoeveel Hy vir ons kan en wil doen. Dit vra net een ding. Erken Hom as jou Herder.

Psa 23:1 ‘n Psalm van Dawid. Die HERE is my herder; niks sal my ontbreek nie.
·         Die Herder lei sy skape na plekke waar hulle kan eet en drink en rus en veilig is.
Psa 23:2 Hy laat my neerlê in groen weivelde; na waters waar rus is, lei Hy my heen.
·         As jy nie by groen weivelde en waters waar rus is, is nie, is jy nie waar Hy jou gelei het nie.
Psa 23:3 Hy verkwik my siel; Hy lei my in die spore van geregtigheid, om sy Naam ontwil.
·         Jou siel sal vars gedagtes van vrede kry sodat ook jy ‘n hoopvolle toekoms sal hê.
·         Hy leer ons Sy manier van dinge doen in elke situasie en as ons dit so doen soos Hy leer sal dinge werk want Sy Naam is daarby geteken.
Psa 23:4 Al gaan ek ook in ‘n dal van doodskaduwee, ek sal geen onheil vrees nie; want U is met my: u stok en u staf dié vertroos my.
·         Al gaan dinge soms moelik en lyk alles om ons donker en gevaarlik, as ons agter Hom bly en net volg waar Hy lei en Hom vertrou sal Hy die gevaar hanteer, Hy sal ons beskerm en vertroos.
Psa 23:5 U berei die tafel voor my aangesig teenoor my teëstanders; U maak my hoof vet met olie; my beker loop oor.
·         Hy gaan ons nie wegneem van die wat teen ons is nie, Hy gaan ons toerus met soveel dat Sy salwing ander ook sal bereik.
Psa 23:6 Net goedheid en guns sal my volg al die dae van my lewe; en ek sal in die huis van die HERE bly in lengte van dae.
·         As ek oor my skouers kyk sal ek net goedheid en guns agter my sien aankom as ek agter Hom is waar Hy lei. As ek in Sy Huis bly is dit soos ‘n Pa wat vir Sy kinders sorg en hulle beskerm. Hy neem die verantwoordelikheid.

Ons probleem is dat ons nie wil wag om te sien waar Hy ons lei nie. Ons wil verby die Herder hardloop en google, ander media en mense vertrou om te sien watter pad en plek en manier die veiligste lyk en ons eie pad soontoe uitwerk met ons faktuurboeke.

Dan vat jy ook jou eie verantwoordelikheid en moet maar op ‘n stadium wakker skrik en sien jy het die groen weivelde en waters waar rus is gemis omdat jy jou eie voetpad gekies het. Jy het nie agter die Herder aangeloop nie want jy het gesien Hy gaan deur moelike plekke loop.

Ons moet besef ons is in hierdie wereld en dus gaan sy probleme gebeur. Ons kan nie verby alles wil gaan nie. Ons moet net agter ons Herder bly dan sal ons veilig daardeur gaan. Soms sal daar dood en trane en gevare wees maar ons sal veilig anderkant uitkom.

Maak toe jou faktuurboek en gee oor. Volg jou goeie Herder.

Exo 14:14 Die HERE sal vir julle stry, en julle moet stil wees.

Gebed:

"Here Jesus, vergewe my dat ek U verantwoordelik gehou het vir enigiets en gedink het U skuld my iets terwyl ek nie eers is waar U my lei nie. Ek kies van vandag af om rustig agter U aan te loop tree vir tree en U te vertrou vir alles en met alles. Dankie vir U Vrede wat alle verstand te bowe gaan.
In Jesus Naam.
Amen."
 
 Geskryf deur: rene short
(grs@oicb.co.za)

Mure

Nehemia 1:3-4: "En hulle het vir my gesê: Die oorgeblewenes wat vrygekom het uit die gevangenskap daar in die provinsie, verkeer in groot ellende en in smaad, en die muur van Jerusalem lê stukkend en sy poorte is met vuur verbrand. En toe ek hierdie woorde hoor, het ek gesit en ween, en ek het dae lank getreur; en ek het gevas en gebid voor die aangesig van die God van die hemel..."

Spreuke 18:10: "Die Naam van die HERE is ‘n sterk toring; die regverdige hardloop daarin en word beskut."

Gedurende Nehemiah se tyd het stadsmure beskerming gebied vir sowel fisiese as geestelike gesondheid. Stewige mure het beskerming gebied teen vyandige aanvalle. Vir die Jode het die mure ook beskerming gebied teen die invoer van vreemde gewoontes wat hul harte en siele kon besoedel. Dit wat buitestaanders mag beskou het as beperking of 'n tipe gevangenisskap was vir hulle vrede en sekuriteit.

Nehemiah het besef dat die oorblywendes in Jerusalem   dringend bereik moes word om hulle tot redding en algehele verlossing te lei. (Nehemiah 1:1-7). Daarby het Hy ook besef dat die herbou van die stadsmure en nuwe hekke in die poorte van uiterste belang was sodat hulle veilig sou wees teen die aanslae van die vyande en weer gehoorsaam kon word aan God.

Ons leef vandag ook in soortgelyke omstandighede as waarin die agtergeblewe groep in Jerusalem hulself in Nehemiah se tyd bevind het. Ons mense is  in net so ’n bedenklike toestand as wat die bondgenote van Nehemia was. Ons broeders en susters benodig net so dringend verlossing van vloeke en siektes en benodig net so ernstig mure en hekke teen die aanvalle van die magte, teen die wêreldheersers van die duisternis.

Waarmee is ons broeders en susters besig, om mure te bou? Inderdaad ja, behuisingskomplekse, aftree oorde, elektriese heinings, “beams en sensors’ en alarms gekoppel aan sekuriteitsmaatskappye en hekke word herstel en versterk. Voeg daarby mediese versekering,, gimnasium kontrakte, aftree annuiteite, lewensversekering... maar wat dan van bekering en geestelike verlossing? Ja ook die is ons mee "besig", mega kerke, gemaks evangelie, die beloftes van die Here onse God, “my” sielkundige, “my” spesialis, “my” persoonlike afrigter...


Klink dit alles nogal bekend? Aangesien ons dit dan alles so goed onder beheer het kom ons vra onsself die volgende: Hoeveel kans het ons op herstel van kanker? Wat is die persentasie van sterftes as gevolg van selfdood? Hoeveel is gevangenes van Alzheimers - en onthou om die nabye familie hierby in te sluit? Hoeveel is verslaaf aan sogenaamde voorgeskrewe medisyne? Wat is ons egskeidings-statistieke? Is dit nodig om nog voorbeelde te noem?

Dit wil vir my lyk of ons gemeenskap net so min soos die Farieërs in 33 nC besef dat die Here onse God nie meer in die Jerusalem tempel te vinde is nie en dat die mure en hekke van ons redding nie van klippe en mortier en hout gemaak word nie, of nie bestaan uit behuisingskomplekse en sekerheidsmaatreëls en versekeringe nie.

Ons moderne gemeenskappe het die weg blykbaar net so byster geraak (Johannes 14:6) as Israel toe hulle die Vader verwerp het. Ons is net so ongehoorsaam aan Jesus as wat hulle aan die Vader ongehoorsaam was en die gevolg is dat ons harte net so beskadig is en net sulke stortingsterreine van afval geword het dat daar in ons harte ook nie meer plek vir die Heilige Gees is nie. Net soos daar in Jerusalem ook min was wat besef het hoe nodig hulle ’n Nehemia gehad het so ook  leef ons mense geblinddoek.

Waar sal ons Nehemia vandaan kom? Vanuit enkele mediese dokters wat die waarheid ken? Enkele opregte genesingsbedieninge wie se stigters nou reeds by Jesus vertoef? Enkelinge met 'n opregte begeerte na die egte Woord van God wat glo net in dit wat in die Bybel staan en die outoriteit van die hemel, en wonderwerke en tekens tot eer van Jesus Christus alleen?

Waar staan ek en jy in terme van ons Nehemia roeping? Nehemia se trane het in dade verander wat ’n hele stad genees het. Wanneer gaan ons dade diegene rondom ons na gees, siel en liggame tot volkome genesing lei - veral in hierdie eindtye waarin ons ons bevind?

GEBED:

"Onse Vader met alle ootmoed en berou en met hart en siel kniel ek voor u Almagtige outoriteit oor ons hele wese. Hier is ek Here, stuur my. Laat ek hoor waar ek in u plan vir die mensdom inpas en ek is gewillig. In Jesus se Naam. Amen."

Geskryf deur: sybrand van kwawegen
(sybrand191@gmail.com)

Sosiale distansiëring

In 'n onlangse gesprek met 'n vriend van my tydens die verpligte “lockdown”-status in ons land, maak hy melding van sy oudste seun, 'n tiener van 16 jr, se besorgdheid oor die verpligte spasiëring tussen mense as een van die reëls van die “lockdown”. Aangesien hy nou in daardie tyd van sy lewe is waar sy belangstelling verder strek as sport en vriende, wou hy toe weet hoé gaan hy die situasie moet hanteer tussen hom en 'n meisie wanneer die skole weer heropen.

Nadat ek en my vriend lekker giggel het oor sy seun se penarie en oor die feit dat hy maar gaan moet soentjies blaas, begin die Gees met my praat oor die feit dat baie kinders van die Here ook vir God op dieselfde wyse hanteer het in die afgelope tye en só af en toe ook maar net soentjies na Hom toe geblaas het. Hy gee my toe ook die volgende vers waar Jesus self die profete aangehaal het:

Mat 15:8  Hierdie volk nader My met hulle mond en eer My met die lippe, maar hulle hart is ver van My af.

Jes 29:13  En die Here het gesê: Omdat hierdie volk nader kom met hulle mond en My eer met hulle lippe, terwyl hulle hul hart ver van My hou, sodat hulle vrees vir My ‘n aangeleerde mensegebod is,

Abba begin toe met my deel dat Sy kinders verval het in godsdienstige rituele wat Hom op 'n afstand gehou het en gebrekkig was aan intimiteit met Hom. Baie het in werke verval en wou Sy aandag trek deur dinge wat hulle doen en ander het weer hulle goeie werke op sosiale media en ander bronne uitgesaai om die eer van mense te soek.

Joh 12:43  Want hulle het die eer van die mense meer liefgehad as die eer van God.

..terwyl God dit uitdruklik stel dat Hy sy eer met niemand deel nie!

Ek het ook toe verder ervaar dat Vader sê dat Hy hierdie tyd van “lockdown” gebruik om harte weer na Hom te laat terugkeer en ook vir ons om te moet besef dat ons dinge begin toelaat het in ons lewens wat belangriker geword het as intimiteit met Hom....en dit sluit die afgod van “te besig wees”, in. Tog het die Bybel dit al baie jare gelede voorspel dat mense in die laaste dae gaan afvallig word, omdat ander dinge te belangrik word vir die mens.

1Tim 4:1  Maar die Gees sê uitdruklik dat in die laaste tye sommige van die geloof afvallig sal word en verleidende geeste en leringe van duiwels sal aanhang
1Tim 4:2  deur die geveinsdheid van leuenaars wat gebrandmerk is in hulle eie gewete,
1Tim 4:3  wat verbied om te trou en gebied dat die mense hulle moet onthou van voedsel wat God geskape het om met danksegging gebruik te word deur die gelowiges en die wat die waarheid ken.

Ons sien dan hiérdie dinge in ons tyd afspeel waar die godsdienstige instellings begin om God se Woord kragteloos te maak deur leerstellings van duiwels aan te neem en, o.a., selfde geslag huwelike toe te laat en selfs te bekragtig en predikers wié hiérdie dinge goedkeur en selfs doen, toe te laat om as herders van die gemeentes te dien...en dan praat ek nie eers van ander dinge soos saamslaap buite die huwelike en drankmisbruik deur die leiers van die gemeentes  nie, ens. Tog is dit ook alreeds jare terug voorspel.


2Tim 3:1  Maar weet dit, dat daar in die laaste dae swaar tye sal kom.
2Tim 3:2  Want die mense sal liefhebbers van hulleself wees, geldgieriges, grootpraters, trotsaards, lasteraars, ongehoorsaam aan hulle ouers, ondankbaar, onheilig,
2Tim 3:3  sonder natuurlike liefde, onversoenlik, kwaadsprekers, bandeloos, wreed, sonder liefde vir die goeie,
2Tim 3:4  verraaiers, roekeloos, verwaand, meer liefhebbers van genot as liefhebbers van God;
2Tim 3:5  mense wat ‘n gedaante van godsaligheid het, maar die krag daarvan verloën het. Keer jou ook van hierdie mense af.

Vader herinner my ook egter daaraan dat hy weer 'n honger in mense gaan wakker maak vir die ware woord van God en glo ek dat Vader juis hiérdie tyd gebruik om mense weer soekend te maak vir die waarheid van Sy woord.

Amo 8:11  Kyk, daar kom dae, spreek die Here HERE, dat Ek ‘n honger in die land stuur, nie ‘n honger na brood nie en nie ‘n dors na water nie, maar om die woorde van die HERE te hoor.

Wanneer ons dan sien wat rondom ons aan die gebeur is, weet ek verseker dat ons verlossing naby is en wil ek ook elkeen bemoedig met hiérdie woorde: “Jesus Christus van Nasaret lewe en Hy kom verseker weer!”

Laat ons daarom waaksaam en nugter wees en onsself voorberei vir sy koms, sodat ons nie dalk onverhoeds betrap word nie!

1Thes 5:4  Maar julle, broeders, is nie in duisternis, dat die dag julle soos ‘n dief sou oorval nie.
1Thes 5:5  Julle is almal kinders van die lig en kinders van die dag; ons is nie van die nag of die duisternis nie.
1Thes 5:6  Laat ons dan nie slaap soos die ander nie, maar laat ons waak en nugter wees.

Mar 14:38  Waak en bid, dat julle nie in versoeking kom nie. Die gees is wel gewillig, maar die vlees is swak.

Luk 21:34  Maar pas op vir julleself, dat julle harte nie miskien beswaar word deur swelgery en dronkenskap en sorge van die lewe nie, en dié dag julle nie skielik oorval nie.
Luk 21:35  Want soos ‘n strik sal hy kom oor almal wat op die hele aarde woon.
Luk 21:36  Waak dan en bid altyddeur, sodat julle waardig geag mag word om al hierdie dinge wat kom, te ontvlug en voor die Seun van die mens te staan.

GEBED: 
Ons Hemelse Vader, ek wil vandag elkeen van ons voor U troon neersit en vra dat U ons sal leer om te waak en bid dat ons nie in die versoeking kom nie en dat U weer 'n honger in ons harte gee vir die ware woord van God. Moenie U Gees van ons verhinder nie en Heilige Gees help ons dat ons kan terugkeer na ons Koning toe met ons hele hart, krag en verstand...amen!

Geskryf deur: ernest phillipson
(ecp@oicb.co.za)

Vertrou op die Woord!

Psalm 119:41-48: "En laat u goedertierenhede oor my kom, o HERE, u heil volgens u belofte, sodat ek my smader iets kan antwoord, want ek vertrou op u woord. En onttrek die woord van waarheid nie geheel en al aan my mond nie, want op u verordeninge wag ek. Dan wil ek u wet altyddeur onderhou, vir ewig en altyd, en in die ruimte wandel, want ek soek u bevele. Ook wil ek voor konings van u getuienisse spreek en my nie skaam nie. En ek wil my verlustig in u gebooie wat ek liefhet, en my hande ophef na u gebooie wat ek liefhet, en u insettinge oordink."

Hoe nader ons beweeg aan Jesus se koms, hoe meer is daar mense wat ons as Christene wat vasstaan op die woord "smaad" m.a.w, ons spot omdat ons nie soos die wêreld glo nie. Maar dit is juis as ons onwrikbaar vasstaan op Sy Woord, dat die Here Sy goedertierenhede en Sy heil oor ons sal laat kom. En dit lei daartoe dat ons 'n getuienis het teenoor hulle wat ons so wil spot, en dis juis omdat ons vertrou op die Woord van die Here.

Hoe meer ons op die Woord vertrou, en doen wat die Here van ons verlang, hoe minder sal die woord van waarheid uit ons mond onttrek. Ons sal dus nie anders kan as om te alle tye die woord van waarheid te spreek nie. Dit sal verder daartoe lei dat ek Sy wet sal onderhou vir ewig en altyd, want dit wat ek spreek, is dit wat ek doen, want die Bybel sê immers wat die hart  van vol is, loop die mond van oor.


En na die mate wat Hy Sy goedertierenhede en heil oor my uitstort, en ek in Sy verordeninge lewe, gaan ek nie anders kan as om met vrymoedigheid te getuig teenoor diegene rondom my van wat Hy in my lewe doen nie. En ek sal daardie vrymoedigheid hê, ongeag wie die mense rondom my is, of dit familie of vriende of hooggeplaaste mense is.

Daar is mos 'n gesegde wat lui: "A man on his knees before God, can stand before any man."

En weet jy, al hierdie dinge lei net verder daartoe dat ek my al hoe meer verlustig in Sy gebooie, dit begin geniet in my lewe, en dit daagliks oordink en toepas. Dit is wat die Woord van die Here so 'n wonderlike lewende Woord maak, dat mens dit op jou eie kan geniet, dit saam met ons Hemelse Vader kan geniet, en dit teenoor andere rondom ons kan wys.

Mag hierdie week jou al hoe nader bring aan hierdie wonderlike God wat ons dien en aanbid, ongeag jou omstandighede, of voor wie jy staan.

GEBED:

"Vader, dankie ek kan vertrou op U onveranderlike Woord. Leer my asseblief elke dag net meer van U verordeninge en insettinge deur U Heilige Gees, sodat ek kan getuig van U grootheid en goedertierenheid en heil in my lewe, maak nie saak voor wie ek staan nie. In Jesus Naam. Amen."

 Geskryf deur: tiaan gildenhuys
(tg@oicb.co.za)

My reg?

Wanneer jy groot geword het en geskool was in 'n geestelike gemeenskap van 'outoriteit-neem-oor-die-vyand-en-al-sy-boosheid' en ook heers oor alles, wat aan jou toevertrou word as goeie rentmeesters [Lukas 10:19 en Genesis 1:28], dan loop die 'koninlike-DNA' sommer sterk deur jou are. Jy voel jy kan berge versit, prinse onttroon en sommer planete skuif!

Ongelukkig kan hierdie ook 'n baie gevaarlike geloofs-ingesteldheid wees, wanneer jy nie 'n baie suiwer Skriftuurlike en gebalanseerde dissipelskap ontvang het nie. [Matthèüs 28:19] Wanneer jou leermeesters nagelaat het om jou te leer, dat Christus NIE net die magtige 'Leeu van Juda' was nie; maar vir 'n baie kort seisoen in Sy lewe, moes Hy ook die 'Lam van God' wees. Iemand wat gewillig moes opstap na die slagpale toe. Om GESLAG te word. Nou nie meer so 'n 'koninlike' gedagte nie, of hoe?

Die ongeleë gevaar van die baie vleeslike 'ek-is-geregtig-tot-dit-en-ek-is-geregtig-tot-dat', kan onverwags so vinnig inkruip en jou weer verenig met die trotse-en selfregverdigende troon van 'EK.' Die Engels noem dit 'ENTITLEMENT'.

En dan; gebeur die lewe. En ook selektiewe goed, wat buite jou beheer is. Dit mors ewe skielik met jou geleerde teologie. Dit het geen genade vir joú oortuigings nie en soveel, as wat jy dit geestelik probeer 'hanteer', word dit net erger. Leë antwoorde en geïrriteerde frustrasie. Hoe kán hierdie dinge met my gebeur, vra jy jouself? En hoekom met mý? [Asof jy gevrywaar word van alle lewens-storms.]

Jou gemodeleerde 'formules' werk nou nie meer so mooi nie en jy trek dit persoonlik aan: 'Ek moet sekerlik iets verkeerd doen, of my geloof is nie genoeg, soos 'Pastor Bill' sin in Amerika nie.'

STOP. Kan jy net stilword vir 'n oomblik, asseblief Christen? Hersien net gou weer Jesus se afhanklike woorde in Johannes 5:19: 'Waarmee is My Vader nou besig in My lewe? En hoe werk Ek SAAM met Hom? [My eie verwerking]

Die fokus hiér, lê op 'SAAM'.

Die enigste dissipline, wat jou in volle ritme kan hou met God, is daaglikse, intieme dialoog. Net soos, wat Jesus moes doen met Sy Vader. Dit gaan jou dwing, om uit die 'formule-bootjie' uit te klim en Hom blindelings te kan vertrou vir iets heeltemal nuuts, wat elke dag op die water gaan aankom. Hy 'BLY' skeppend en Hy 'IS' nog steeds die Skepper. Hy sal verseker, en elke keer, iets nuuts na vore bring.

Hoe weet ek dit, vra jy miskien? [
Gisteraand om die kampvuur, toe ons 'choppies' en braai-broodjies geeët het, wou jou pa niks eet nie. Vir die derde dag nou al. Finansiële spanning glo. Ons weet ook van die SARS verrassing, wat laas week in die pos gekom het. Die keiser soek alwéér, wat hom toekom. In jou pa se erge bekommernis, vra Jesus hom toe, om gou 'n vis te gaan vang en wanneer hy dit uitgetrek het, sal daar 'n groot rôl oranje note in die bek van die vis wees. 'Betaal daarmee jou skuld, Johan. Kom dan terug en eet saam met ons 'n skilpadjie', was die Wonderwerker se woorde. [My eie verwerking] En dit het ook presies, net so afgespeel! Jou pa is 'n ander mens vandag, nie waar nie? Méér gelowig, as jy my sou vra. [Matthéüs 17:27]


Môre vra die Meester jou weer, om jouself sewe keer te gaan afwas in die Oranjerivier, net Noord van Prieska. Met verbasing, gaan jy sien, dat jou melaatsheid heeltemal weg is! En wag, daar is meer: Jou vel gaan so nuut wees, soos 'n jong kind s'n! Nie eers soos 'n volwasse soldaat se vel nie. [2 Konings 5:1-14]

God werk buite standaard formules. Nog meer - buite mensgemaakte formules. Hy kan nié in 'n vuurhoutjie-boksie gedruk word nie. Elke keer is anders.

Net só werk dit ook met jou lewens-storms, wat nie altyd met joú teologie gaan klop nie. Ja, ek glo ook; ons IS koninlik en konings-kinders daarby, maar ons is OOK Sy gesante, mede-werkers in die koninkryk en Sy EIENDOM. Ons behoort nie aan onsself nie. Hy kan met ons maak, nét wat Hy wil. En vir AL Sy eie doeleindes. Nie ons s'n nie.

Al beteken dit, dat jy met tye, in uitdagende omstandighede moet beland, wat jou gemaksone geweldig baie gaan bedreig en wat ook nie altyd te lekker is vir jou vlees nie, sodat God jou kan gebruik, om die ateïs wat oor jou pad kom, te kan bedien tot 'n besluit vir die ewige lewe. Wat is nou belangriker hiér: 'n Ongeredde man se siel, wat gered word en die ewigheid in God se boesem lê; of jou eie 'Christen reg', om as gelowige geen storms te hê nie? Wat leef nou weer verewig: Liggaam of gees? [Let wel: Diskresie oor die tipe storms is nodig. Ons het ook 'n opportunistiese vyand, wat baie kreatief kan wees! Johannes 10:10]

Indien dit vir jou moeilik is, om hierdie stelling te omhels, wil ek graag vir al die Nuwe Testamentiese apostels/dissipels van Christus in die getuiebank vra, hoe hulle elkeen, in die fleur van hulle lewens en ook toe later, dood is? Nog meer, hoe was hulle fisiese lewens-kwaliteit gewees, voor hulle dood?

Gun my om te sê, dat hierdie 'n baie omstrede en uitdagende stelling vir die 'voorspoed-teologie' gemeenskap is. Dit sal egter ook wees, want hulle is ook maar net nóg 'n 'formule' gedrewe beweging. Weekliks moet ek bybelse antwoorde en leiding verskaf aan verwarde lede, wat ook 'ge-name, ge-frame en ge-claim' het en absoluut niks in oorvloed ontvang het nie. 'Te min geloof?', vra hulle my klokslag. Of heel moontlik ook 'entitlement', wat God nooit sal behaag nie?

Hierdie is 'n uitspraak, wat aanvanklik lyk of dit 'n teenstrydigheid bevat, want God wil tog hê, dat dit met ons goed moet gaan en dat ons in oorwinning moet lewe [Johannes 10:10 en Jeremia 29:11], nie waar nie, maar by nader beskouing, is bostaande tog onverwags betekenisvol en waar. Dit is onvermydelik, dat kinders van God ook moeilike uitdagings in hul lewens gaan beleef. Ja, lewens-storms buite hulle beheer. Magteloos. Tye wanneer jy ook nie alles bymekaar gaan hê nie. Wat dan?

Waartoe, en waarop is ek as koninlike gelowige, geregtig?

Antwoord: God se teenwoordigheid. Sy intieme leiding. Deurbraak. Bemoediging. Die muur van vuur om my. 'n Verskansing van beskerming oor my. My Skild en my Pantser in die oorlog. 'n Hoëpriester. Die Herder wat intens omgee en sorg. En laastens, 'n baie kort tydjie op aarde, waar jy SAAM met God, Sy koninkryk kan uitbrei en bevorder - op Sy termes, en in Sy tyd, en in Sy vermoëns - of dit in die vuur is, soos met Daniël of op Jesus se bors, soos Johannes. Want Hy BESIT jou. Jy het geen eienaarskap meer oor jou nie. [Galásiërs 2:20] Hy het die regte. Hy is Heer.

In slot, JY is ook geregtig op die baie salige en verwelkomende woorde van ons Koning, eendag in die hiernamaals, wat sê: 'Mooi so, goeie en getroue dienskneg. Oor weinig was jy getrou, oor veel sal Ek jou aanstel. Gaan in, in die vreugde van jou Heer.' [Matthèüs 25:23]

GEBED:

'Vader God, gee my die genade, om aan die einde van MYSELF te kom. En hóú my daar, Heer. My begeerte is, dat wanneer U na my kyk, U net vir Christus sal raaksien. In die Naam van Jesus Christus, van Nasaret. Amen.'


 Geskryf deur: hennie van der westhuizen
(info@paragonlife.c

Wat laat jy na?

Onlangs word ek een nag wakker met ‘n lied in my gees.

Elke keer as ek wakker word is dit dieselfde lied. Later begin ek bid oor die lied en wat ek moet hoor.

“I don’t want to leave a legacy....”

Die vraag wat ontstaan het is : “wat laat ons na?”.

Bou ons ‘n nalatenskap? En watse soort nalatenskap?

Mat 6:19 – 20:  Moenie vir julle skatte bymekaarmaak op die aarde, waar mot en roes verniel en waar diewe inbreek en steel nie; maar maak vir julle skatte bymekaar in die hemel, waar geen mot of roes verniel nie en waar diewe nie inbreek en steel nie;

Is ons so besig met werke om goed bymekaar te maak dat ons verhoudings mis?

·         Wat help dit jou kinders erf eendag ‘n klomp goed van iemand wat hulle nie geken het nie?

·         Hulle gaan alles verkwis omdat dit vir hulle geen waarde het nie.

Pred 1:17 – 18:  Maar toe ek my hart daarop gerig het om wysheid en kennis, onverstandigheid en dwaasheid te leer ken, het ek ingesien dat dit ook ‘n gejaag na wind is. Want by baie wysheid is baie verdriet, en wie kennis vermeerder, vermeerder smart.

Is ons so besig om kennis bymekaar te maak wat ons nooit toepas nie?

·         Wat help dit jou om elke moontlike kursus by te woon, elke boek te bestudeer, elke preek te kyk en selfs jou Bybel goed te ken maar jy help niemand daardeur nie?

Luk 1:51  Hy het deur sy arm kragtige dade gedoen. Hoogmoediges in die gedagtes van hulle hart het Hy verstrooi.

As jy vandag sou sterf, wat gaan mense van jou onthou?

·         Wat help dit as mense jou onthou vir wat jy gedoen het en nie vir wie jy is nie?

·         Gaan hulle jou  gunsies en gawes meer mis as jou gebede?

Ps 121:2  My hulp is van die HERE wat hemel en aarde gemaak het.

Wat gaan van die mense word wat jy geestelik bedien het?

·         Gaan hulle benoud wees oor hulle geestelike kruk nie meer daar is nie

·         Hulle gaan gou na ‘n nuwe kruk soek

As ons nie besig is om Jesus te leef en Sy saad te saai nie, is jy besig met ‘n gejaag na wind. Sien as jy die dag nie meer daar is nie, moet mense kan aangaan omdat jy hulle aan Jesus vasgemaak het en geleer het om op Hom te fokus en op Hom alleen te vertrou. Hulle moet die Jesus in jou onthou en nie vir jou as persoon nie.

Ons het almal tyd om te werk aan ons eie voorbereiding vir Sy terugkeer. Laat ons nie besig wees met nuttelose dinge wat niks beteken nie.

Moenie hierdie tyd gebruik om aan ‘n wêreldse nalatenskap te bou nie. Dis tydelik en vergaan.

Bou aan iets wat ewigheids waarde het. Fokus op Jesus en nie op jouself en jou behoeftes en planne nie.

Jy hoef nie op te hou leef en heeldag Bybel te lees nie, maar maak seker jy is gereed vir ‘n ewigheid saam met ons Koning Jesus en maak seker jy saai al die saad wat Hy jou gee in goeie grond sodat Sy Koningkryk kan groei en weer vrug dra vir ander.

Mat 12:33  Julle moet òf die boom goed maak en sy vrugte goed, òf julle moet die boom sleg maak en sy vrugte sleg; want aan die vrugte word die boom geken.
 
 Geskryf deur: rene short
(grs@oicb.co.za)

Watter kant toe?

Gooi aan die ander kant

In albei gevalle waar Jesus vir die dissipels gesê het om weer die nette te laat sak, was dit nadat hulle die hele nag op die water spandeer het en niks gevang het nie. Hulle was dus reeds besig met die dinge wat hulle moes doen en gewoond was om te doen en tog het dit geen resultate opgelewer nie.

Tog die oomblik toe Jesus in die prentjie kom, toe is die voorsiening oorvloedig.

Luk 5:4  En toe Hy ophou met spreek, sê Hy vir Simon: Vaar uit na die diep water en laat julle nette sak om te vang.
Luk 5:5  En Simon antwoord en sê vir Hom: Meester, ons het die hele nag deur hard gewerk en niks gevang nie; maar op u woord sal ek die net laat sak.
Luk 5:6  En toe hulle dit gedoen het, het hulle ‘n groot menigte visse ingesluit; en hulle net wou skeur.

In bogenoemde deel, sien ons dat nadat Petrus geluister het na die preek wat Jesus uit die boot gedoen het, hy tog besluit het dat hy op Jesus se woord sou reageer omdat hy gehoor het dat Jesus met gesag gespreek het.

Jesus se woord is vandag nogsteeds net só kragtig asof Hy dit in hiérdie oomblikke tot ons spreek...die vraag is: “na wié se woorde luister ons in tye van beproewing?” Selfs nou terwyl die “lockdown”-periode verleng is en dit nog 'n veel groter impak op mense se finansies tot gevolg het en ook nog meer vrees by mense aanwakker, na wié se stem gaan jy as kind van God kies om te luister?

Ons lees dan ook heel aan die begin nadat sonde in hiérdie aarde gekom het en die mens skielik besef het dat hy naak is, dat God ook aan die mens die vraag stel: “wié het jou dit te kenne gegee?”

Gen 3:10  En hy antwoord: Ek het u geruis gehoor in die tuin en gevrees, want ek is naak; daarom het ek my verberg.
Gen 3:11  En Hy sê: Wie het jou te kenne gegee dat jy naak is? Het jy geëet van die boom waarvan Ek jou beveel het om nie te eet nie?

Dit is só maklik om God se woord aan te haal in tye wat dit goed gaan of wanneer ons omstandighede gemaklik is en dinge normaal voortgaan...woorde soos: “Hy sal jou nooit verlaat of in die steek laat nie, God is gister, vandag en tot alle ewigheid dieselfde en niks is by God onmoontlik nie”...maar is dit waaraan jy vashou as jou hele lewe binne een dag omgekeer word?

In die tweede geval waar Jesus die dissipels weer vra of hulle iets gevang het, sien ons dat Hy hulle beveel om op presies dieselfde plek weer die nette in te gooi. Baie dikwels wil ons só graag uit ons omstandighede kom of wil ons hê dat die Here dit verander, maar dan lê ons antwoord eintlik reeds binne ons huidige omgewing of situasie.

Dié antwoord of oplossing lê egter in die antwoord wat Jesus gee: “gooi aan die anderkant”...somtyds verg dit net bloot 'n doelbewuste keuse om anders na 'n situasie te kyk of selfs ons ingesteldheid daaromtrent te verander, wat dan die deurbraak bring.

Joh 21:6  En Hy sê vir hulle: Gooi die net aan die regterkant van die skuit, en julle sal kry. Hulle het toe gegooi en deur die menigte van visse was hulle nie meer in staat om dit te trek nie.

Een van die groot sleutels tot deurbraak in mense se lewens is dankbaarheid en om vergenoegd te wees met jou omstandighede!

Fil 4:11  Nie dat ek dit uit gebrek sê nie, want ek het geleer om vergenoeg te wees met die omstandighede waarin ek is.
Fil 4:12  Ek weet om verneder te word, ek weet ook om oorvloed te hê; in elke opsig en in alle dinge is ek onderrig: om versadig te word sowel as om honger te ly, om oorvloed te hê sowel as om gebrek te ly.

1Tim 6:6  Maar die godsaligheid saam met vergenoegdheid is ‘n groot wins.
1Tim 6:7  Want ons het niks in die wêreld ingebring nie; dit is duidelik dat ons ook niks daaruit kan wegdra nie.
1Tim 6:8  Maar as ons voedsel en klere het, moet ons daarmee vergenoeg wees.

Daar is baie dinge in ons lewens, soos die “lockdown”, wat ons niks aan kan doen om te verander nie, maar die wyse waarop ons daarna kyk of dit hanteer, gaan bepaal of dit ons paniekbevange laat en of ons meer as oorwinnaars daardeur sal kom!


GEBED:
Onse Vader wat in die hemel is, laat U naam geheilig word en laat U koninkryk kom...in die hemel en netso ook op die aarde, gee ons vandag ons dag se brood en laat ons nie in die versoeking kom nie. Pappa, help ons dat ons na U stem sal luister en nie na die geraas van die wêreld nie, juis omdat ons weet dat U woord waarheid is en dat U ons nooit in die steek sal laat nie...amen!

Geskryf deur: ernest phillipson
(ecp@oicb.co.za)