Lig in jou donkerste dag

 
Psalm 139:11 & 12: “En as ek sê: Mag tog net die duisternis my oorval en die lig nag wees tot my beskutting, dan is selfs die duisternis vir U nie donker nie, en die nag gee lig soos die dag, die duisternis is soos die lig.”

Daar is twee dinge wat almal van ons in gemeen het. Een, God het ons lief, en, twee, die duiwel haat ons. God wil net die goeie vir ons hê; die duiwel, net die slegte. God wil ons opbou en seën; die duiwel wil ons afbreek en vernietig. God bring lig in ons wêreld; die duiwel, duisternis.

Maar hierdie is nie ‘n toutrek kompetisie tussen God en Satan nie; nie eers naby nie! In Sy groot liefde, neem God tot die erge en bose dinge wat die duiwel doen, en draai dit tot ons voordeel. In Genesis 50:20, nadat Josef met sy familie herenig is, sê hy aan hulle: “Want júlle het wel kwaad teen my bedink, maar God het dit ten goede gedink om te doen soos dit vandag is, om ‘n groot volk in die lewe te hou.” In Romeine 8:28 en Efesiërs 1:11 verseker Paulus ons dat God alle dinge tot ons voordeel laat saamwerk.

Rom 8:28 “En ons weet dat vir hulle wat God liefhet, alles ten goede meewerk, vir hulle wat na sy voorneme geroep is.”

Efes 1:11 “in Hom in wie ons ook ‘n erfdeel ontvang het nadat ons vantevore daartoe verordineer is ooreenkomstig die voorneme van Hom wat alles werk volgens die raad van sy wil,”

Met God aan ons kant kan ons nie verloor nie. Hy gee lig selfs in ons donkerste dag.

Dawid sing in Psalm 18:28 & 29: “Want U laat my lamp skyn; die HERE my God laat my duisternis opklaar. Want met U loop ek ‘n bende storm, en met my God spring ek oor ‘n muur.” Of in ander woorde “die Here sal vir my, in my duisternis,  ‘n openbaring van Sy liefde gee.”  Met dit in gedagte, kom ons kyk weer na die openingsteks hierbo: “En as ek sê: Mag tog net die duisternis my oorval en die lig nag wees tot my beskutting, dan is selfs die duisternis vir U nie donker nie, en die nag gee lig soos die dag, die duisternis is soos die lig.”

Hoe wonderlik is dit nie dat God alle dinge neem, ook die slegte wat Satan beplan, en dit omdraai in ons guns nie?

Die profeet Miga het dít geweet. Hoor hoe hy in geloof spreek bo die vernietigende  beskuldigings teen hom – Miga 7:8 “Wees nie bly oor my nie, o my vyandin! Al het ek geval, ek staan weer op; al sit ek in duisternis, die HERE is ‘n lig vir my.” ‘n Liedjieskrywer het eens geskryf; “Liefde lig my op!” Sô sal ons, ook in ons donkerste dag, wanneer die liefde van God deurskyn, dieselfde sê.

God het jóu lief, altyd. Ook in jou donkerste dae. Hy werk altyd om dinge vir jou ten goede te laat meewerk. Sy doel hiermee – om jou meer soos JESUS te maak ... die Lig vir die wêreld!

Gebed:

“Abba Vader, dankie dat U altyd in beheer is. Dankie dat U alles ten goede vir my wil laat meewerk. Help my asseblief deur U Heilige Gees, om ten volle aan U oor te gee. Verander my asseblief tot die mate van die volle grootte van U seun, JESUS CHRISTUS. Amen.”

(cobus van heerden - cvh@oicb.co.za)
Geplaas met toestemming van Tiaan Gildenhuys

Is jy ‘n advertensie vir God?

 Toe die sonstrale vanoggend deurbreek en die voeltjies begin sing, kyk die Here na jou naam in Sy Hand, en se "Ek het jou liewer as enige iets op die aarde" Mag die Liefde van Jesus vandag vir jou tasbaar geopenbaar word, want jy is spesiaal!!

Ons is almal geroep vir die aarde, ons leef nie op aarde sodat ons eendag kan hemel toe gaan nie,  nee, ons het ‘n opdrag op die aarde, God sê in Gen 1:28 En God het hulle geseën, en God het vir hulle gesê: Wees vrugbaar en vermeerder en vul die aarde, onderwerp dit en heers oor die visse van die see en die voëls van die hemel en oor al die diere wat op die aarde kruip.

Hoekom sou ons opdrag wees om te vermeerder? Omdat God uit die huwelik goddelike kinders wou voorbring! Hoekom? Sodat hulle weer die Evangelie kon gaan verkondig soos ons opdrag is deur Jesus!

Mark 16:15  En Hy het vir hulle gesê: Gaan die hele wêreld in en verkondig die evangelie aan die ganse mensdom. 16  Hy wat glo en hom laat doop, sal gered word; maar hy wat nie glo nie, sal veroordeel word.

Matt 28:19  Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees; en leer hulle om alles te onderhou wat Ek julle beveel het.

Hoekom sou dit ons opdra wees in die Woord van God? Want daar sal ‘n tyd kom, en dit is nou as ons kyk na al die nuwe vertalings wat verdraai word, asook hoe godsdiens verban word uit skole en werksplekke, en hoe Christelike vakansie dae verander word, hoe die Woord van God verdraai word en ons nie meer mag praat oor homoseksueliteite nie, dat ons nie meer die Woord van God gaan kan verkondig sonder om vervolg te word nie!

2 Tim 4:2-5 “Verkondig die Woord; (let op) hou aan tydig en ontydig; weerlê, bestraf, vermaan in alle lankmoedigheid en lering (hoekom?) want daar sal 'n tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle 'n menigte leraars sal versamel volgens hulle eie begeerlikhede, en die oor sal afkeer van die waarheid en hulle sal wend tot fabels.

“Maar wees jy in alles nugter; ly verdrukking; doen die werk van 'n evangelis; vervul jou bediening.” 

Matt 5:10  Salig is die wat vervolg word ter wille van die geregtigheid, want aan hulle behoort die koninkryk van die hemele.

2 Tim 3:12  En almal wat ook godvrugtig wil lewe in Christus Jesus, sal vervolg word. 13  Maar goddelose mense en bedrieërs sal voortgaan van kwaad tot erger, hulle wat verlei en verlei word. 14  Maar bly jy in wat jy geleer het en waarvan jy verseker is, omdat jy weet van wie jy dit geleer het, 15  en dat jy van kleins af die heilige Skrifte ken wat jou wys kan maak tot saligheid deur die geloof in Christus Jesus. 16  Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid.

2 Pet 2:1  Maar daar was ook valse profete onder die volk, net soos daar onder julle valse leraars sal wees wat verderflike ketterye heimlik sal invoer, en ook die Here wat hulle gekoop het, verloën en 'n vinnige verderf oor hulleself bring;  2  en baie sal hulle verderflikhede navolg, en om hulle ontwil sal die weg van die waarheid gelaster word;

2 Pet 1:21  want geen profesie is ooit deur die wil van 'n mens voortgebring nie, maar, deur die Heilige Gees gedrywe, het die heilige mense van God gespreek.

Gebed:

Dankie Vader dat ons nog U vrylik kan aanbid en U Woord mag lees in ons land en dankie dat ons Jesus nog kan aanroep wat in ander lande onwettig is. Laat ons dit met oorgawe doen voor die klippe dit begin doen soos U Woord sê. Ons land het U seker meer nodig as enige ander land in hierdie tyd. Laat ons altyd onthou ons hulp kom van U en nie van mense of ons regering nie.

In Jesus Naam Amen!
Sëenwense
Belinda

Hoekom het ek nie maar net nie?

Hoekom het ek nie maar net….geluister nie, gehelp nie, stilgebly nie, weggestap nie, meer gepraat nie, aangehou nie, meer gaan kuier nie, harder probeer nie, vergewe nie, meer liefde gegee nie, onverskoning gevra nie,by die huis gebly nie, by die Here gehoor nie….

Die lys van vrae kan aangaan tot in ewigheid, iewers in ons lewens het ons al die vraag gevra “Hoekom het ek nie maar net….”

Die lewe is te kort om te sit en top oor dit wat jy “maar net” nie gedoen het nie, maar in sommige omstandighede is dit nog nie te laat om te gaan sê “vergewe my asb” of “luister asb wat ek vir jou wil sê ”nie! As jy die kans het om dit  nog te kan doen, gaan doen dit vandag nog want more is nie verseker nie!

In die geval waar dit te laat is en die persoon nie meer met ons is nie, maak vrede daarmee, vra God om jou te vergewe en vergewe jouself, dit is baie belangrik dat ons onsself moet vergewe! As God ons vergewe het dink Hy nie meer daaraan nie, waarom moet jy?

Heb 8:12  Want Ek sal barmhartig wees oor hulle ongeregtighede en aan hulle sondes en hulle oortredinge nooit meer dink nie.

Rom 4:7 & 8 Welgeluksalig is hulle wie se ongeregtighede vergewe en wie se sondes bedek is. Welgeluksalig is die man aan wie die Here die sonde nie toereken nie.

Dit is menslik om spyt te wees oor iets wat jy gedoen of nie gedoen het nie, maar dit is nie God se wil dat jy heeldag daaroor moet top en jouself moet laat verval in ‘n toestand dat jy jouself haat oor iets wat jy nie gedoen het, of nie gedoen het nie, en as dit iets is wat met jou gebeur het omdat jy voel jy moes eder by die huis gebly het, vertrou op God om jou die krag te gee om daardeur te kom. God wil jou genees van alles in jou lewe, of dit in jou siel, gees of liggaam is, God het jou bitter baie lief, vergeet en vergewe nadat jy Sy vergifnis gevra en ontvang het. Jesus sê self Hy het gekom sodat jy in oorvloed kan lewe, dit is in oorvloed in elke dimensie van jou lewe (Joh 10:10)

1 Kor 10:13  Geen versoeking het julle aangegryp behalwe 'n menslike nie; maar God is getrou, wat nie sal toelaat dat julle bo julle kragte versoek word nie; maar Hy sal saam met die versoeking ook die uitkoms gee, sodat julle dit sal kan verdra.

Wees gesëend in Jesus Naam
Sëenwense
Belinda

Die hart, die saailand!

Tydens my onlangse besoek aan die besigheid op Upington, het Vader hierdie woord in my gees kom lê terwyl ek besig was om Hom te loof vir die goeie reën wat geval het in daardie deel van die Karoo waardeur ons besig was om te ry. Verlede maand toe ons daar verby is, kon mens duidelik sien dat daar toé alreeds goeie reën geval het, want die jong doringboompies en bosse was alreeds lowergroen. Tog was die grond tussenin baie kaal en was daar feitlik geen grasbedekking nie.

Hierdie keer het daar egter baie gras al gegroei op die kolle wat voorheen kaal was en het dit omtrent alreeds 20cm hoog gestaan. Dit is met hierdie gesig wat Vader toe vir my kom sê in my gees, dat die saad reeds lankal onder daardie harde kors  van die grond gelê en wag het vir die lewegewende water van Bó. Hy deel toe met my dat ons harte net soos daardie harde kors grond is en dat Sy woord alreeds daarin gesaai is en net wag vir die water van geloof om dit te laat ontkiem!

Ek het toe onmiddelik aan die volgende Skrif gedink:

Heb 8:10  Want dit is die verbond wat Ek ná dié dae sal sluit met die huis van Israel, spreek die Here: Ek sal my wette in hulle verstand gee en dit op hulle hart skrywe; en Ek sal vir hulle ‘n God wees, en hulle sal vir My ‘n volk wees.

Heb 8:11  En hulle sal nie meer elkeen sy naaste en elkeen sy broer leer en sê: Ken die Here nie; want almal sal My ken, klein en groot onder hulle.

Die dag wat ons Jesus aangeneem het as Redder en Verlosser, het Vader reeds Sy hele wetboek op die tafels van ons hart geskryf en het Hy ons die Heilige Gees gegee om ons daarin te onderrig. Paulus skryf dan ook dat geloof tot stand kom by die aanhoor van God se woord.

Rom 10:17  Die geloof is dus uit die gehoor, en die gehoor is deur die woord van God.

Vader het my toe ook verder herinner aan die gelykenis van die saaier wat Jesus vertel het en dat die saaier die Woord gesaai het op verskillende plekke. Slegs 'n deel van daardie saad het goeie vrug gedra, maar die kwaliteit van die saad wat gesaai is op al die plekke, was presies dieselfde. Ons lees dan ook dat die Woord van God onverganklik is of “incorruptable” soos dit in Engels gestel word.

1Pet 1:23  want julle is wedergebore nie uit verganklike saad nie, maar uit onverganklike, deur die lewende woord van God wat tot in ewigheid bly.

Die probleem lê dus nie by God se woord nie, maar by ons gebrek aan kennis en geloof daarin!

Mat 22:29  Toe antwoord Jesus en sê vir hulle: Julle dwaal, omdat julle die Skrifte nie ken nie en ook nie die krag van God nie.

In Johannes 1 lees ons duidelik dat Jesus die Woord is wat vlees geword het en onder ons kom woon het. Hy is ook die Één wie aan die begin die hele skepping geskape het met die spreek van 'n woord. Dit is ook die rede hoekom Hy Satan teengestaan het deur vir hom die Woord van God aan te haal en nie nodig gehad het om 'n nuwe woord uit te dink om van Satan ontslae te raak nie.

Mat 4:4  Maar Hy antwoord en sê: Daar is geskrywe: Die mens sal nie van brood alleen lewe nie, maar van elke woord wat deur die mond van God uitgaan.

Die probleem is dus by die mens wié nie kies om te glo nie, omdat ons nog te vas is aan die dinge wat ons kan sien, hoor, voel of proe. Selfs in Jesus se tyd was Hy vir Sy eie dissipels nie genoeg nie, ten spyte van alles wat hulle aanskou en gehoor het.

In Johannes 14 lees ons waar Jesus aan die dissipels vertel dat Hy na die Vader gaan en dat hulle die weg ken. Toe Jesus egter sê dat hulle die Vader ook ken en Hom gesien het, is Fillipus die een wie gesê het dat Jesus hulle die Vader moet toon...let op Jesus se antwoord:

Joh 14:4  En waar Ek heengaan, weet julle en die weg ken julle.

Joh 14:5  Thomas sê vir Hom: Here, ons weet nie waar U gaan nie, en hoe kan ons die weg ken?

Joh 14:6  Jesus antwoord hom: Ek is die weg en die waarheid en die lewe; niemand kom na die Vader behalwe deur My nie.

Joh 14:7  As julle My geken het, sou julle my Vader ook geken het, en van nou af ken julle Hom en het julle Hom gesien.

Joh 14:8  Filippus sê vir Hom: Here, toon ons die Vader, en dit is vir ons genoeg.

Joh 14:9  Jesus sê vir hom: Ek is so lankal by julle, en het jy My nie geken nie, Filippus? Hy wat My gesien het, het die Vader gesien. En hoe sê jy: Toon ons die Vader?

Joh 14:10  Glo jy nie dat Ek in die Vader is en die Vader in My nie? Die woorde wat Ek tot julle spreek, spreek Ek nie uit Myself nie; maar die Vader wat in My bly, Hy doen die werke.

Joh 14:11  Glo My dat Ek in die Vader is, en die Vader in My; of anders, glo My ter wille van die werke self.

Joh 14:12  Voorwaar, voorwaar Ek sê vir julle, wie in My glo—die werke wat Ek doen, sal hy ook doen; en hy sal groter werke doen as dit, omdat Ek na my Vader gaan.

Filippus wou meer gesien het as dit wat hy in Jesus gesien het en het nie besef dat Jesus deel is van die Drie-enige God nie en dat die volheid van die Vader ook in Hom is nie.

Die vraag is dus nou vir jou en my: “wie is Jesus vir jou...en is Hy vir jou genoeg? Wat sal jy antwoord as Hy aan jou moet vra: “wie sê JY is Ek?”

Het jy die “guts” om te staan op Sy woord teen die aanslae van die vyand of is jou mond te vol van die wêreld se woord of die woord van mense?

Rom 12:2  En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is.

GEBED:  Vader, vergewe ons dat ons só kleingelowig is en só maklik die woord van mense bó die Woord van God stel. Help ons om te kan staan op U woord in alle omstandighede, omdat dit die onverganklike en onfeilbare woord is van die Lewende God...amen!

 (ernest phillipson - ecp@oicb.co.za)
Gepaas met toestemming van Tiaan Gildenhuys

Moet ons onbekende mense help?

Die omie kom gebukkend, skuifelend die pad afgestap, sy
verkreukelde hoed styf in sy hand vasgeklem. Die plooie trek
donker dongas oor sy gesig, en sy oë is dof en blou.
Sy klere hang soos ʼn meelsak om hom, sy skoene het al
beter dae gesien. Sy hare wapper in drie slierte om sy
voorkop, sonverbrand.
"Boetie! Boetie!" roep hy na my.
Ek gee hom een kyk en kyk dan anderpad.
Net nog 'n boemelaar, net nog 'n bedelaar.
"Boetie! Boetie!" roep hy weer.
Ek draai my rug op hom en sluit die motordeur oop.
"Boetie, boetie! Wag, ek wil met jou praat." Sy stem is skor.
"Seker van al die drank," dink ek, klim in die motor en sluit
die deur
Hy struikel van die sypaadjie af, kom krom, oud en
verwaarloos na my aangestap.
Ek skakel die motor aan, kry trurat en verlaat hom, eensaam
en alleen.
"Kry vir jou werk. Maak soos ek maak, dit bring geld, dan
kan jy suip tot jy omval," gaan deur my gedagtes. Ek kry
eerste rat, wikkel die petrolpedaal en laat hom in ʼn stofwolk
agter. Ek sien in die truspieël hy beduie, hande omhoog. "Ja,
joune ook," sê ek hardop, "net soos jou soort is - as jy nie
iets kry nie, is ek altyd die skuldige."
By die huis vertel ek vir Vroulief van die voorbarige
bedelaar, wat ek gesien het.
Vroulief is dadelik Moeder Hen : "Waar slaap die arme man
vanaand? Dit lyk asof dit gaan reën."
"Moenie oor hom worrie nie, sy soort het altyd 'n plan, hy
wurm hom met 'n sak wyn iewers in 'n kombers toe en
verdrink die dag van môre. Plaas dat hy karre oppas, dit sal
daai drankgeldjies meer kosbaar maak."
"Swerwer, jy is ʼn harde man. Wat daarvan as hy drink? Hy is
ook net ʼn mens, net soos jy," berispe Vroulief.
"Wat, 'n man soos ek? As hy ʼn man was, het hy 'n manier
gesoek om 'n geldjie te verdien vir sy lustigheid. Nou wil hy
my geld bedel, dit waarvoor ek gewerk het, met my sweet,
my arbeid ... Se dinges, vrou! Kom ons vergeet nou die
episode, ek is klaar spyt ek het jou vertel."
Vroulief stap kop onderstebo kombuis toe, ek maak my
gemaklik op die stoep, bier in die hand.
" Kan ook nie jou mond hou nie," mompel ek.
My hond kom lê onder die stoel en ek voer hom ʼn stukkie
biltong. Hy lek my hand dankbaar.
Eensklaps staan vrou in die deur.
"Swerwer, ek het vir die man 'n pakkie kos gepak, ons vat dit
nóú vir hom. Een van die kinders se komberse is ook oor die
muur, ons vat dit ook."
Ek ken die stemtoon, onverbiddelik.
"Vrou, is jy gek? Die man is seker lankal weg. Gaan skep op,
ek is honger," probeer ek walgooi.
"Swerwerrrrrr ... as jy nie wil ry nie....... sal ek," druk sy dit
uit..
Ek weet teëpraat gaan nie help nie, my mooi van môre se
dag hang hiervan af.
Ek staan op, vat die motorsleutels, en draai half vermakerig
na haar: "Nou kom, as jy hom wil kos gee, doen dit self."
Ons ry in stilte, met slegs die geruis van bande. Vroulief klou
die pakkie op haar skoot vas. Voor die koöperasie stop ek
op dieselfde plek. In die lig van die voertuig sien ek hom op
die sypaadjie sit, sy kop op sy knieë, hande wat hang tot op
die grond.
"Sien jy, wat het ek jou gesê? Klaar dronk."
Vrou ignoreer my, maak die deur oop en skud die omie aan
sy skouers. Stadig lig hy sy kop; trane stroom oor sy wange.
"Nog dronkverdriet ook", dink ek.
"Omie, ek het ietsie gebring om te eet", praat Vroulief sag en
vat sy hande in hare.
Die omie se lyf begin ruk, hy huil nou openlik, trane stroom
deur die plooi-dongas.
"Nooientjie, dis nie ek nie. Die tannie by die huis het in die
bad geval. Sy kan nie opstaan nie. Ons foon werk al twee
weke nie meer nie. Ek het asma, ek kon nie verder nie. Ek
het ʼn kêrel probeer stop, maar hy het weggejaag ... sonder
om te
luister. Al wat ek kon doen, was om te bid. God het vir my 'n
engel gestuur. Asseblief, gaan help die tannie ... asseblief,
gaan help haar."
Ek sit met ʼn knop in my keel, trane wil oor die walle stroom,
die hartseer is diep en skerp.
My gemoed is stukkend, my siel in opstand. Waar en
wanneer gaan ons besef: "Ek is my broer se herder"?
Raak iemand se lewe vandag aan
Lukas 6:31 Behandel ander mense soos julle self behandel
wil word.
“Moet . . . nie vergeet om goed te doen en mededeelsaam te
wees nie, want sulke offerandes is vir God welbehaaglik.”—
Hebreërs 13:16

Skrywer onbekend!

In daardie uur....

“En ook voor goewerneurs en konings sal julle gebring word om My ontwil tot ‘n getuienis vir hulle en vir die heidene. Maar wanneer hulle jul oorlewer, moenie julle kwel oor hoe of wat julle sal spreek nie, want dit sal julle in daardie uur gegee word wat julle moet spreek; want dit is nie julle wat spreek nie, maar die Gees van julle Vader wat in julle spreek.” (Mattheus 10:18-20)

Hierdie week wil ek jou bemoedig met die bogemelde teksverse. Want dalk lê hierdie komende week soos ‘n berg voor jou.

Dalk moet jy die week ‘n dissiplinêre verhoor by jou werk bywoon, en jy weet nie wat jy gaan, of moet sê nie. Dalk moet jy vir die eerste keer ‘n groep kliënte toespreek oor die produkte wat julle bemark, en jy is op jou senuwees oor wat om te sê.

Dalk moet jy vir die eerste keer ‘n groep kinders of studente toespreek oor hulle toekoms en jy is onseker watter punte jy alles moet aanraak. Dalk moet jy die week iemand in jou familie gaan sien om ‘n ongelukkige situasie te probeer beredder, en jy het net geen idee wat jy moet sê om dit reg te maak nie.

Dalk moet jy die week in ‘n hof gaan staan om te getuig in ‘n saak waar een of ander onreg teen jou begaan is, en jy is baie bang oor wat jy gaan sê en oor die uitkoms van die saak.

Lees weer die tekverse. Maak nie saak voor wie jy moet verskyn nie, as jy ‘n kind van God is, sal die Here deur Sy Heilige Gees vir jou IN DAARDIE UUR gee wat jy moet spreek. VRA Hom net vir Sy wysheid, en Hy sal dit vir jou gee.

“En as iemand van julle wysheid kortkom, laat hom dit van God bid, wat aan almal eenvoudig gee sonder om te verwyt, en dit sal aan hom gegee word.” (Jakobus 1:5)

Gebed:

“Vader, ek kom vandag na U in Jesus Naam. Here U weet watter situasie ek hierdie week moet hanteer, en ek bid dat U deur U Heilige Gees vir my in daardie uur sal gee wat ek moet spreek, en dat U selfs in en deur my sal spreek. Ek bid en vra vir U wysheid in hierdie situasie Here, en dankie dat ek weet U gee dit vir my sonder verwyt. Dankie Here dat U my sal help. Amen.”

  (tiaan gildenhuys - tg@oicb.co.za)
Geplaas met toestemming van Tiaan Gildenhuys

Wat sê die Woord oor grondhervorming?

WAT SÊ DIE BYBEL OOR GRONDHERVORMING?

Alhoewel die Bybel lank terug reeds geskryf is, het God geweet wat in die toekoms van die wêreld gaan gebeur. Ons is vinnig om vandag te vrees wat die dag van môre sal inhou, maar ons vergeet soms dat God reeds daar is. Hy is vandag met Sy kinders en sal ook môre met Sy kinders wees.

Ons het nie nodig om te vrees wat die toekoms vir Suid-Afrika inhou nie, want Suid-Afrika se toekoms is ook in God se hande!

Kom ons kyk wat sê die Bybel oor grondhervorming wat tans groot kommer regoor Suid-Afrika veroorsaak.

MIGA 2:1-3 (1953 Vertaling)

"Wee die wat onreg uitdink en kwaad smee op hulle bedde; by die môrelig voer hulle dit uit, want dit is in die mag van hulle hand.  Ja, hulle begeer velde en roof dit; ook huise en neem dit. So pleeg hulle dan geweld teenoor die man en sy huis, teenoor die mens en sy erfdeel.  Daarom, so sê die Here : Kyk, Ek bedink onheil teen hierdie geslag, waar julle jul nekke nie sal kan uittrek nie, en waarby julle nie regop sal kan loop nie; want dit sal ’n tyd van onheil wees!"

MIGA 2:1-3 (1983 Vertaling)

"Ellende wag vir julle wat rampe teen ander beplan, wat op die bed lê en dink aan kwaad om te doen, wat dit vroeg in die môre gaan uitvoer omdat hulle die mag in die hande het.  Hulle begeer 'n stuk grond en vat dit, huise, en lê beslag daarop. Hulle kul 'n man uit sy huis uit, 'n mens uit sy besitting uit.  Daarom, so sê die Here: Ek beplan 'n ramp teen hierdie mense, hulle sal dit nie kan ontwyk nie. Hulle sal nie meer regop kan loop nie, want dit sal 'n tyd van swaarkry wees."

ONS AS GELOWIGES SE HOOP IN HIERDIE TYD.

Ons moet ook in ag neem dat ons reeds in die eindtyd leef. Lees die volgende vers noukeurig deur...

MATTHÉÜS 24:7‭-‬8 (1953 Vertaling)

"Want die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke. Maar al hierdie dinge is ’n begin van die smarte."

Kyk jy deesdae die nuus? Besef jy wat nie net in Suid-Afrika nie, maar regoor die wêreld aangaan?

DIE EEN NASIE SAL TEEN DIE ANDER OPSTAAN...
Dit gebeur tans in Suid-Afrika.

DAAR SAL PESSIEKTES WEES...
Listeria het onlangs uitgebreek in Suid-Afrika. Dit merk die grootste uitbraak van hierdie siekte in die wêreld tot op hede.

MAAR AL HIERDIE DINGE IS 'N BEGIN VAN DIE SMARTE...
Die 1983 Vertaling van die Bybel lees "HIERDIE IS GEBOORTEPYNE VAN DIE NUWE TYD..."

Al leef ons in hierdie tyd voor Jesus se koms, beteken dit nie dat ons bekommerd hoef te wees nie.

ROMEINE 8:22 (1983 Vertaling)

"Ons weet dat die hele skepping tot nou toe sug in die pyne van verwagting."

WAT IS JOU VERWAGTING IN HIERDIE TYD VAN "PYNE"?

HEBREËRS 10:23 (1953 Vertaling)

"Laat ons die belydenis van die hoop onwankelbaar vashou, want Hy wat dit beloof het, is getrou;"

Kom ons versterk ons geloof in hierdie tyd waarin ons leef. God is getrou aan Sy beloftes en Hy sal ingryp op sy tyd. Laat ons eerder bid vir 'n Goddelike ingryping in Suid-Afrika - nie ter wille van onsself nie, maar sodat ONS HERE DIE EER DAARVOOR SAL KRY en die wat nog verlore is SY GROOTHEID SAL AANSKOU EN DIE HEILIGE GEES HULLE SAL OORTUIG OM HULLE HOOP OP JESUS ONS ROTS TE PLAAS!

Bid vir Suid-Afrika, want in hierdie tye waarin ons leef sal God Sy Gees opnuut uitstort en wonderwerke sal plaasvind soos wat die wêreld nog nooit aanskou het nie

Skrywer onbekend.

Almal het gesondig

 

Rom 3:23  want almal het gesondig en dit ontbreek hulle aan die heerlikheid van God,

Een van die grootste spoke in die kerk vandag, is die een van geestelike hoogmoed wat mense laat dink dat hulle beter of groter Christene is as ander of wat altyd net wil kritiseer of oordeel en veroordeel. En tog is bogenoemde vers baie duidelik dat ons maar almal gesondig het en dat ons almal aan die heerlikheid van God skade ly. Wat het jy dan nou ook meer as die ander, wat jy nie van Bo ontvang het nie? Die Bybel waarsku ons ook dan baie duidelik teen daardie vorm van hoogmoed:

1Kor 10:12  Daarom, wie meen dat hy staan, moet oppas dat hy nie val nie.

Vir die mense wat só 'n ingesteldheid het om altyd te let op wat ander verkeerd doen, is die volgende gedeelte, beslis van toepassing:

Mat 7:3  En waarom sien jy die splinter in die oog van jou broeder, maar die balk in jou eie oog merk jy nie op nie?

Mat 7:4  Of hoe sal jy vir jou broeder sê: Laat my toe om die splinter uit jou oog uit te haal, en kyk, in jou eie oog is die balk!

Mat 7:5  Geveinsde, haal eers die balk uit jou oog uit, en dan sal jy goed sien om die splinter uit die oog van jou broeder uit te haal.

Ek het ook al baie gehoor dat mense dit met sóveel selfversekerheid beweer dat hulle definitief die bruid van Christus is en weggeraap sal word. Tog as jy kyk na die vrug van hul lewens en die woorde van hul mond, dan is ek nie só seker daarvan nie. Ek glo persoonlik dat die dag wanneer die wegraping plaasvind, sal aanwys wie het gegaan en wie het gebly, omdat hulle toe nie gereed was nie.

Mat 7:16  Aan hulle vrugte sal julle hulle ken. ‘n Mens pluk tog nie druiwe van dorings of vye van distels nie!

Mat 3:8  Dra dan vrugte wat by die bekering pas.

Dus is dit des te meer belangrik dat ons eerder op ons eie lewens en handelinge let, as die van ander. Ek glo ons is definitief in die laaste van die laaste dae en dat dit nou, nog meer as voorheen, tyd is om heilig te lewe. Nie net ter wille van die bruidskap nie, maar ook ter wille van sóveel mense wat nog verlore is, juis omdat hulle geen vrug sien by die kinders van die Here nie.

Fil 2:12  Daarom, my geliefdes, soos julle altyd gehoorsaam gewees het, nie in my teenwoordigheid alleen nie, maar baie meer nou in my afwesigheid, werk julle eie heil uit met vrees en bewing;

Fil 2:13  want dit is God wat in julle werk om te wil sowel as om te werk na sy welbehae.

Instede daarvan dan dat ons alewig krities is oor ander kinders van die Here, leer die Bybel ons baie duidelik om eerder hul hand te vat en hul te help om weer op te staan. Nie een van ons is gevrywaar teen die aanslae van die duiwel nie en sommiges is 'n bietjie sterker as ander.

Rom 15:1  En op ons wat sterk is, rus die verpligting om die swakhede te dra van die wat nie sterk is nie, en nie onsself te behaag nie.

Rom 15:2  Want elkeen van ons moet die naaste behaag met die oog op wat goed is tot stigting.

Rom 15:3  Want ook Christus het Homself nie behaag nie, maar soos geskrywe is: Die smaadhede van die wat U smaad, het op My geval.

Jak 3:2  Want ons almal struikel dikwels. As iemand in woorde nie struikel nie, is hy ‘n volmaakte man, in staat om ook die hele liggaam in toom te hou.

Kom ons begin dus om deur hierdie nuwe jaar ons denke te verander deur ook ander te kan sien soos Abba ons sien...skoongewas deur die bloed van Jesus Christus! Kom ons help eerder ons boetas en sussas wanneer hulle sukkel, want op 'n ander keer het ons hulle weer nodig!

Rom 12:2  En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is.

Rom 12:3  Want deur die genade wat aan my gegee is, sê ek vir elkeen wat onder julle is, dat hy nie van homself meer moet dink as wat ‘n mens behoort te dink nie; maar dat hy daaraan moet dink om besadig te wees na die maat van geloof soos God dit aan elkeen toebedeel het.

Rom 12:4  Want soos ons in een liggaam baie lede het en die lede nie almal dieselfde werking het nie,

Gebed: 

Onse Vader wat in die hemel is, laat U Naam geheilig word en laat U koninkryk kom hier op aarde, net soos wat dit in die hemel is. Help ons om eerder ons naaste lief te hê soos U hulle het en om op te hou om op hul te trap wanneer hulle struikel. Gee ons die krag om eerder te let op onsself en om ware vrug vir U te dra, sodat ander tot inkeer kan kom..in Jesus Naam, amen!

(ernest phillipson - ecp@oicb.co.za)
Geplaas met toestemming van Tiaan Gildenhuys