"En wat noem julle My: Here, HERE! en doen nie wat Ek sê nie?"

Lukas 6:46: "En wat noem julle My: Here, HERE! en doen nie wat Ek sê nie?"

Hierdie is een van die heel eerste teksverse wat die Here Jesus Christus hard op my hart begin druk het toe ek 20 jaar gelede in 'n persoonlike verhouding met Hom begin ingaan het. Ek het op daardie stadium net geglo jy moet die Bybel heeltyd reg "interpreteer", en het beslis niks GEDOEN wat die Bybel sê ons moet doen nie.

Dit het uiteraard daartoe gelei dat ek so besig was om die Bybel te interpreteer en daaroor te redeneer of te argumenteer, dat dit prakties geen effek op my lewe gehad het nie. Ek het vir 36 jaar van my lewe 'n oneffektiewe geloofslewe gelei, selfs al was ek vir jare 'n diaken en selfs 'n ouderling in die kerk.

Eers toe ek Jesus Christus in 1999 persoonlik ontmoet het, en Hy my 'n honger begin gegee het vir Sy Woord, en ek self Sy Skrifte begin lees en ondersoek het, en ek toe begin DOEN het wat die Bybel sê, het die krag van God in my lewe 'n werklikheid geword.


Maar wat moet ons dan doen wat die Bybel sê ons moet? Daar is geen manier dat ek alles wat die Bybel sê ons moet doen, in hierdie klein spasie kan inskryf nie. Daarom word ons in die Bybel opdrag gegee om elke dag ons Skrifte te ondersoek, juis sodat ons kan begin leer watter dele is op elkeen van ons van toepassing.

Want die een gelowige doen dalk nog nie wat die Bybel sê hy moet doen teenoor sy vrou nie, en moet hy die Bybel begin bestudeer om te sien wat verwag God van hom as man in sy huwelik. Iemand anders doen dalk weer nie wat God van haar verwag in haar verhouding met haar ma nie, en moet sy haar Bybel begin bestudeer om te sien wat leer die Bybel haar oor vergifnis.

'n Verdere gelowige doen dalk nog nie wat die Bybel bepaal hy moet doen in sy finanies en in sy besigheid nie, en moet hy die Bybel begin bestudeer om te sien wat God van hom verwag as rentmeester in sy besigheid.

Vra dalk vir die Here in hierdie week wat is daar in JOU lewe wat jy nog nie volgens die Woord doen nie, en begin net om daardie één ding reg te stel en letterlik te DOEN soos wat Hy van ons verwag, en kyk hoe begin Hy stap vir stap vir jou jou deurbrake gee.


GEBED: 

"Here, hierdie week wil ek vra dat U aan my sal uitwys wat is daar in my lewe wat ek nog nie letterlik doen volgens U opdragte in U Woord nie. Gee my asseblief 'n groter honger na U en U Woord.  En help my asseblief daarna om daardie dinge letterlik te begin toepas in my eie lewe, sodat U ook daardeur in my lewe verheerlik kan word. In Jesus Naam vra ek. Amen."

 Geskryf deur: tiaan gildenhuys
(tg@oicb.co.za)

Pyn bly eina!

Pyn is nie lekker nie. Maak nie saak watse pyn dit is nie. Daar bestaan nie iets soos lekker of goeie pyn nie. Pyn is eina!

Daar is so baie soorte pyne in vandag se lewe, met die gevolg dat daar net so baie oplossings of medisyne beskikbaar is vir al daardie verskillende soorte pyne. In die fisiese kan ons ‘n pilletjie vat vir een sort pyn, of ‘n stropie vat vir ‘n ander soort pyn, of dokter toe gaan vir meer ernstige pyne, of hospital toe gaan om groot fisieke pyne reg te maak.

Maar wat van geestelike pyne? Waar gaan ons heen om dit te herstel? Die wêreld skree dadelik almal saam, “Gaan na ‘n sielkundige toe!” maar tog kom daar net nie geestelike genesing nie, hoekom?

Want daar is tog net een antwoord in die geestelike, en dit is Jesus Christus!


Nou wil ek jou iets vertel wat, as jy dit nie geweet het nie, hoop ek dit sink in: Wanneer jy die geestelike pyne genees met die enigste pil wat werk, naamlik die “Gospel ”(die Woord van God), sal dit ook oorswaai en die fisiese pyne in jou lewe genees.

Jesus het reeds aan die kruis vir ons die prys betaal vir fisiese genesing van pyne in ons lewens vandag, deurdat Sy liggaam flenters geslaan was.

Ons moet net die vertroue en geloof daarin hê (soos geskryf in Hebreërs 11:1 Die geloof dan is ‘n vaste vertroue op die dinge wat ons hoop…) dat Hy dit reeds volbring het, selfs vir ons vandag (… ‘n bewys van die dinge wat ons nie sien nie.)

Hoe werk pyn dan? Wanneer ons pyn het, is dit ons fisiese liggaam wat pyn het en ons siel treur daaroor. Job 14:22 Net sy vlees aan hom voel pyn, en sy siel in hom treur.

Maar ons gees moet deur onsself gevoed word deur die Woord van God in te neem sodat dit geen pyn ervaar nie en ons hoef nie geestelike martelaars te wees vir Jesus nie, soos geskryf in Psalm 69:30 Maar ek is ellendig en in pyn: laat u hulp, o God, my beskerm!

En hoe word ons gees gevoed? Deur die Woord van God te lees, te lewe, toe te eien vir onsself, nie net elke Sondag en/of Woensdag aand nie, maar ELKE DAG!

Dink terug daaraan toe jy jou eerste aardse liefde verloor het. Jou hart was stukkend en in baie pyn gewees. Dit is ‘n baie seer pyn wat deur jou hart skeur as die persoon nie meer lief is vir jou en nie meer by jou wil wees nie. Nou dink daaraan hoe Jesus se hart moet voel as Sy kinders nie na Hom wil luister nie, nie doen wat Hy sê nie, en sommer maar net ongehoorsaam is aan Sy Woord. Sekerlik, HARTVERSKEUREND!

Die pyne van die lewe kan oorkom word in die fisiese en geestelike deur net te sê, Jesus, U is my alle! En as ons dan begin DOEN wat Hy sê! Lukas 6:46 En wat noem julle My: Here, Here! En doen nie wat Ek sê nie?

Hy SAL die pyne van die lewe geheel en al wegvat en vir jou verberg in Hom. Die pyne sal wel beslis kom, en kom, en kom, maar Hy is getrou en regverdig en deur Hom is die pyne van die lewe oorwinbaar elke dag. Filippense 4:13 Ek is tot alles in staat deur Christus wat my krag gee.

Gebed
Here Almagtig, neem asseblief vandag al die pyne in my lewe wat ek het op U, en herinner my dat U reeds vir my die prys daarvoor betaal het aan die kruis, en ek dank U daarvoor opreg met my hele hart. Bedek my asseblief met die Bloed van die Lam sodat ek alle pyne sal oorkom deur die leiding van die Heilige Gees in Christus Jesus. Amen.


Geskryf deur: hein henning
(heinh@sunlightfs.co.za)

Wees stil

In die laaste tyd het ek baie mense ontmoet wat almal min of meer dieselfde probleem ondervind in hul geestelike lewe, en dit is dat hul nie weet hoé om stil te word by die Here se voete nie. Die dolle gejaag van vandag se lewe met al sy vereistes, het selfs die kinders van die Here in hierdie hoofstroom van “besig wees” ingetrek en sukkel baie om daai “afsit”- knoppie te vind en net rustig by Vader se voete te kom vrede vind.

Baie word dan ook in “werke” ingetrek deur kerke en organisasies en verloor daardie intimiteit met Vader...terwyl die Woord tog sê:

Psa 62:5 Wees net maar stil tot God, my siel, want van Hom is my verwagting!

Ek ondervind dan ook dat daar by diésulkes werklik 'n verlange is terug na daardie plek van stilwees met Vader, want dit is daar waar ons weer Sy vrede kan vind.

Psa 46:10 Laat staan en weet dat Ek God is; Ek sal hoog wees onder die nasies, hoog op die aarde.

Met ons onlangse besoek aan Israel, het Vader my een oggend net voor 3h00 wakker gemaak en my langs die see van Galilea laat sit vir tenminste 2 ure net in absolute stilte. Ek het aanvanklik gesoek na Vader se stem, maar later besef dat ek dalk net 'n bietjie moet stil wees en wag. Dit het naderhand só stil geword in my ore dat hulle eindlik gesuis het en dit was vir my die wonderlikste ervaring dat Vader alle geluide rondom my net kom afsny het.

Ek dink tog dat Vader somtyds wil hê dat ons net in absolute stilte by Hom moet kom sit sonder ons lysies (aangesien Hy tog weet wat op ons hart is)..en net in Sy vrede moet kom rus. Daarin word ons kragte weer vernuwe en sien ons weer kans vir die klomp Goliats wat ons omring.

Jes 40:31  maar die wat op die HERE wag, kry nuwe krag; hulle vaar op met vleuels soos die arende; hulle hardloop en word nie moeg nie, hulle wandel en word nie mat nie.

Dit is in daardie stilte wat ons baie kere ook onsself weer vind en kan voorraad neem van ons lewe en dan deur die Gees gelei kan word om aanpassings te maak waar nodig. Ek het oor die naweek hierdie raad aan 'n vriendin gegee wie ook met hierdie dinge geworstel het. Sy getuig later dat sy net gaan stil word het en aan Vader net een vraag gevra het, en dit was: “Vader wys my my hart”...en sy het toe ook van Vader die mooiste visioen daaromtrent ontvang.

My liewe boeta en sussa, ek wil jou vandag aanraai en bemoedig...maak 'n doelbewuste keuse om werklik te gaan stil word by Vader en kyk dan wat gebeur!

Jes 30:15  Want so sê die Here HERE, die Heilige van Israel: In terugkeer en rus lê julle heil, in stil wees en vertroue bestaan julle krag; maar julle wou nie

Mag jy reg kies en mag die vrede van die Here saam met jou wees in hierdie komende week!

 Geskryf deur: ernest phillipson
(ecp@oicb.co.za)

Luiste na die lied van Selah - Be still
https://www.youtube.com/watch?v=e1k3ngMZ0ec

Ek wil die Here loof!

Psalm 9:2: " Ek wil die HERE loof met my hele hart; ek wil al u wonders vertel."

Ek het die afgelope aantal jare geleer dat wanneer daar dinge in my gedagtes inkom wat nie van die Here is nie, dink ek of sing ek net die woorde: "Ek wil die Here loof, loof met my hele hart!"

Dit het tot gevolg dat daardie ander gedagtes onmiddellik uit my kop geweer word. En ek sal aanhou om dit te doen totdat ek vrede in my gedagtes het. So het die Here my geleer om my gedagtes gevange te neem tot gehoorsaamheid aan God.

Maar ons moet nie net ons gedagtes gevange neem tot gehoorsaamheid aan Christus deur die Here te loof nie, ons moet ook Sy wonders vertel aan die mense rondom ons. Want ons het geen tekort aan wonders om VAN te praat op 'n daaglikse basis nie.


Watter wonders vra jy dalk? Wel, kom ons kyk na 'n paar wat ons die Here oor kan loof in hierdie komende week:

Wel, eerstens die wonder van die lewe, dat jy en ek vanoggend kon wakker word.

Die wonder van sig, om die son en alles rondom my te kan aanskou.

Die wonder om te kan asemhaal.

Die wonder van familie, en indien ek nie familie om my het nie, die wonder dat God IN my as Sy kind is volgens Galasiërs 2:20. Ek is nooit alleen nie.

Die wonder van voëls wat rondom ons sing en tjirp.

Die wonder van klere aan ons lyf, 'n dak oor ons koppe, kos in ons mae.

Die wonder van 'n loopbaan en 'n werk en dat Hy ons bekwaam maak om ons werk te kan doen.

En die grootste wonder van alles, dat indien ek Jesus Christus in my lewe het, die kosbare wete dat ek vir ewig saam met Hom in die hemel sal wees!

Mag jy in hierdie week ook kies om elke oomblik van elke dag die Here te loof met jou hele hart, en om aan almal rondom jou Sy wonders in jou lewe te vertel.


GEBED:

"Here, hierdie week wil ek elke dag leer om U te loof met my hele hart, en om U wonders in die alledaagse dinge rondom my raak te sien en aan andere te vertel. Vader, gee my asseblief hierdie week U bekwaamheid om dit wat ek in hierdie week moet hanteer, te kan doen tot die beste van my vermoë sodat U ook daardeur verheerlik sal word. In Jesus Naam vra ek. Amen."

 Geskryf deur: tiaan gildenhuys
(tg@oicb.co.za)

Mag ons mekaar reghelp?

Vermaning...

“Moenie so aan my karring nie! Ek sal self by die Here hoor wanneer ek moet ophou met my sonde!”

As jy regtig omgee vir die mense om jou, hetsy of dit jou familie, jou vriende of selfs jou vyande is, het jy al seker ‘n paar keer hierdie, of 'n soortgelyke  argument gehoor. Ek wil vir jou noem waarmee ek dit dan altyd weerlê, “Die Here het klaar gepraat, lees sy Woord!”

In vandag se tydperk van menseregte, word ons vinnig uitgekryt dat ons in iemand se “karakter inklim" as ons hom of haar vermaan, veral as ons dit regtig doen volgens die Woord van God.

God se Woord beveel ons egter in Hebreërs 3:13 Maar vermaan mekaar elke dag so lank as dit vandag genoem word, sodat niemand van julle deur die verleiding van die sonde verhard word nie.

So ja, daar het jy dit, sommer so uit die mond van die Almagtige, ELKE DAG. Met ander woorde, sonder ophou, want die sonde gaan nie ophou indring (of ‘n vakansie vat) in ons lewens nie, so die vermaning moet sonder ophou geskied om ons (en ander) te help op ons pad van heiligmaking en om te streef na die wandel wat God van ons verlang in Christus Jesus, onder leiding van die Heilige Gees.

Nou vermaan ons links en regs alles wat beweeg, en die mense word kwaad en suur vir jou, want jy is mos nou weer TE veel van ‘n Christen, en jy hoor die woorde “Jy moet my nie oordeel nie! God is lief vir my net soos ek is, met my sonde en al, en Hy het klaar aan die kruis gesterf selfs vir dit ook.”

Ja, die Woord sê vir ons in Matthéüs 7:1Moenie oordeel nie, sodat julle nie geoordeel word nie.

Wanneer ek as “TE” bestempel word en mense so links en regs - volgens hulle -  “oordeel”, doen ek dit nie om hulle te irriteer, of om teen die Woord van God te gaan nie, ek doen dit om die eenvoudige rede dat ja, God het jou lief net soos jy is, maar Hy is te lief vir jou om jou te los soos jy is. Maak dus klaar met jou sonde, draai terug na Hom toe!

“Ag Hein, dit was net so ‘n ou klein sondetjie gewees, ‘n wit leuentjie!”

Nee, sonde is sonde in God se oë en ons moet streef daarna om af te wyk van ALLE sonde af sodat ons nie vermaan HOEF te word nie. Dit stel tog voor ‘n lewe van heiligmaking, doen dit nie?

Maar ek sê vir jou nou, hou aan vermaan elke dag soos die Woord van God ons beveel om te doen. Hoekom? Juis omdat ons lief is vir mekaar!

Doen dit wel in laaaaaaaaaankmoedigheid soos genoem in 2 Timótheüs 4:2 …weerlê, bestraf, vermaan in alle lankmoedigheid en lering, want anders sal dit net lei tot dit waarteen ons gewaarsku word in Spreuke 15:1 ‘n Sagte antwoord keer die grimmigheid af, maar ‘n krenkende woord laat die toorn opkom.

So as ons volgens die Woord vermaan, onthou ook tog net dat jy moet oplet waaroor jy iemand vermaan. As jy die person vermaan en karring en stoei oor ‘n betrokke aspek in sy/haar lewe, maar daardie aspek beïnvloed nie sy saligheid nie, en die persoon wil na verskeie vermanings  nie hoor of luister nie, sal jy wel (ook volgens die Woord van God) op ‘n punt kom waar jy sal moet terugstaan en die persoon uitlos en ophou vermaan. In daardie geval bid jy slegs verder dat die Heilige Gees hom of haar sal oortuig volgens Johannes 16:8.

As die persoon Jesus aanvaar het as sy/haar persoonlike verlosser, weet dan met ‘n geruste hart dat hy/sy hemel toe sal gaan en dat jou vermaning slegs help om te keer dat hy/sy nie ‘n ploeteraars Christen wandel hier op aarde hoef te beleef nie.

As ons nie bereid is om te luister na die vermaning van 'n broer of suster in Christus nie, moet ons dan nie kla as dinge sleg gaan met ons nie.

Gebed
Hemelse Vader, ek kniel voor U troon en bely dat ek as sondaar vermaning nodig het elke liewe dag van my lewe en ook vermaning moet uitdeel aan my naaste soos ek beveel is in U Woord. Gee my asseblief die lankmoedigheid om diegene om my te vermaan volgens U Woord en slegs onder leiding van die Heilige Gees. En Jesus plaas asseblief ‘n wag voor my mond in tye van vermaning sodat ek net sal spreek wat U van my verlang om te sê.
Amen

Geskryf deur: hein henning
(heinh@sunlightfs.co.za)

n Pad na Jesus!

Hoeveel keer het ons nie al die verskoning by mense gehoor dat hulle eers hierdie of daardie ding moet aflê of oorwin, voordat hulle Jesus kan aanneem as Saligmaker of voordat hulle weer na Jesus kan terugkeer in verhouding met Hom nie? Baie keer is dit slegs verskonings wat mense aanvoer juis om nie die keuse vir Jesus te maak nie en ander kere is dit bloot omdat hulle dink dat Jesus hul nooit vir daai sonde sal vergewe nie.

Jesus het egter self op 'n keer gesê dat dit nie die mense wie gesond is wat die dokter nodig het nie, maar juis die wie siek is.

Mar 2:16  En toe die skrifgeleerdes en die Fariseërs Hom saam met die tollenaars en sondaars sien eet, sê hulle vir sy dissipels: Wat is dit dat Hy saam met die tollenaars en sondaars eet en drink?
Mar 2:17  En toe Jesus dit hoor, sê Hy vir hulle: Die wat gesond is, het die geneesheer nie nodig nie, maar die wat ongesteld is. Ek het nie gekom om regverdiges te roep nie, maar sondaars tot bekering.

Daar is 'n paar baie goeie voorbeelde in die Bybel wat duidelik daarop wys dat dit juis mens se onreinheid is, wat vir jou 'n pad oopmaak reguit na Jesus toe. Ek dink onder ander aan die verlore seun wat teruggekeer het huistoe nadat hy sy onreinheid besef het en bereid was om dit te bely...en dan ook aan Maria Magdalena wie 'n vrou met slegte sedes was en bereid was om haar voor Jesus te kom verneder en verootmoedig en van wie Jesus ook gesê het dat sy baie sondes gehad het waarvoor sy vergeef is.

Ek wil egter met hierdie weekstuk fokus op die vrou wat aan bloedvloeiing gely het vir twaalf jaar en al haar geld op dokters spandeer het en nogsteeds nie genees was nie. Sy het egter gehoor dat Jesus daar verby gekom het en het besluit om vas te hou aan die Skrif in Mal 4:2 wat sê dat daar genesing onder Sy vleuels sal wees (corner of a garment or peace of clothing).

Daar was egter 'n wet in daardie tyd wat bepaal het dat enige vorm van bloedverlies uit die mens se liggaam, hom of haar onrein gemaak het en dan moes die persoon waar hy of sy ookal beweeg het, hardop bekend maak dat  hulle onrein is, sodat iemand anders nie ook besoedel word wanneer hulle aan daardie persoon of sy kleed sou raak nie. Hierdie vrou was deeglik bewus van hierdie wet en ook welbekend dat sy onrein was en daarom sou sy verseker dit bekend gemaak het oppad na Jesus toe. Verder sou sy in haar toestand baie swak gewees het en sou sy verseker nie die krag gehad het om deur 'n skare mense te beur om by die Meester uit te kom nie.

Dit was dus juis haar onreinheid wat sy verklaar het wat vir haar 'n pad reguit na Jesus toe oopgemaak het, aangesien niemand bereid sou wees om deur haar besoedel te word nie. Verder het Jesus ook onmiddelik geweet dat krag uit Hom gegaan het toe sy Hom aangeraak het, want dit was die geloof wat sy gehad het in die Woord, wat die krag van God ontsluit het vir haar genesing.

Luk 8:43  En ‘n vrou wat twaalf jaar lank aan bloedvloeiing gely het, en wat haar hele vermoë aan geneeshere uitgegee het en deur niemand gesond gemaak kon word nie,
Luk 8:44  het van agter af gekom en die soom van sy kleed aangeraak, en haar bloedvloeiing het onmiddellik opgehou.
Luk 8:45  Daarop sê Jesus: Wie is dit wat My aangeraak het? En toe almal dit ontken, sê Petrus en die wat by hom was: Meester, die skare druk en verdring U, en U sê: Wie is dit wat My aangeraak het?
Luk 8:46  Maar Jesus antwoord: Iemand het My aangeraak, want Ek het gemerk dat krag van My uitgegaan het.

Netsó is Jesus se krag vandag nog tot ons beskikking as ons bereid is om in geloof te staan op Sy woord!

Ek wil jou dus vandag uitnooi...bring jou onreinheid na Jesus, want dit is juis dit wat vir jou 'n pad oopmaak tot Sy genesing vir jou gees, siel en liggaam!


GEBED: 

Here Jesus, baie dankie dat U nie net vir ons sondes gesterf het nie, maar dat daar deur U wonde en kneusings aan die kruis, vir ons volkome genesing gekom het in gees, siel en liggaam. Dankie dat U nie met ons handel na ons ongeregtigheid nie, maar dat dit juis ons onreinheid is, wat vir ons 'n pad oopmaak reguit na U toe...amen!

 Geskryf deur: ernest phillipson
(ecp@oicb.co.za)