Jammer Here, nie nou nie!

Hoeveel keer het die Here nie na jou en my geroep om ons te gebruik om diensbaar te wees vir ander, of om ons miskien te stuur met ‘n spesifieke opdrag of boodskap nie en dan het ons die antwoord gehad van: “ek kan nie nou nie”? En dit omdat daar altyd iets “belangriker” is wat eers aandag moet kry of ons dalk nie bekwaam voel nie!

Ek lees die volgende gelykenis wat deur Jesus self voorgehou word:

Luk 14:16 Maar Hy antwoord hom: ‘n Sekere man het ‘n groot maaltyd gegee en baie mense uitgenooi.
Luk 14:17 En op die uur van die maaltyd het hy sy dienskneg uitgestuur om vir die genooides te sê: Kom, want alles is nou gereed.
Luk 14:18 En hulle het hul almal eenparig begin verontskuldig. Die eerste het vir hom gesê: Ek het ‘n stuk grond gekoop en ek moet noodsaaklik uitgaan om daarna te kyk. Ek vra u, verskoon my tog.
Luk 14:19 En ‘n ander een het gesê: Ek het vyf paar osse gekoop en gaan hulle probeer. Ek vra u, verskoon my tog.
Luk 14:20 En ‘n ander een het gesê: Ek het ‘n vrou getrou en daarom kan ek nie kom nie.

In Gen 24 lees ons dat Abraham sy dienskneg stuur om vir Isak 'n vrou te gaan by sy familie en hy laat hom belowe om nie na ander nasies te gaan nie. Oppad na Mesopotamië, vra die dienskneg God se hulp en hy vra vir sekere tekens, sodat hy sal weet dat dit die regte vrou is. Nadat die dienskneg vir Rebekka ontmoet het en sy opdrag aan haar familie oorgedra het, wou hy onmiddelik die volgende oggend vertrek, maar Rebekka se familie wou haar nog terughou. Abraham se dienskneg het sy opdrag só ernstig opgeneem dat hy aangedring het om te gaan. Hulle het toe vir Rebekka gevra of sy wou saamgaan en sy het onmiddelik “ja” geantwoord...en sy het gegaan saam met 'n man wat sy skaars ken om die vrou te word van iemand wat sy glad nie ken nie! En só het sy ook dan deel gekry aan God se beloftes aan Abraham.

Toe die Here besluit om Sy volk uit die hand van die Egiptenare te verlos, roep Hy vir Moses in die woestyn om hom te stuur as segsman by die Farao en om die volk uit Egipte te lei. Onmiddellik begin Moses met ‘n klomp verskonings en hy minag homself as geskik te wees vir diens in die hand van die Here.

Eks 3:11 Maar Moses het tot God gespreek: Wie is ek, dat ek na Farao sou gaan en dat ek die kinders van Israel uit Egipte sou lei?
Eks 3:12 En Hy antwoord: Ek sal met jou wees, en dit sal vir jou ‘n teken wees dat Ek jou gestuur het: As jy die volk uit Egipte gelei het, sal julle op hierdie berg God dien.

Soveel kere weet ons met sekerheid dat die Here aan ons ‘n sekere opdrag gegee het, maar dan is ons vol verskonigs omdat ons dink dat ons nie bekwaam of goed genoeg is om dit te gaan doen nie. Terwyl Hy uitdruklik in Sy woord sê dat ons nie uit eie krag moet probeer om dinge te doen nie of na ons eie vermoëns moet kyk nie, want Hy maak ons sterk en Hy maak ons geskik vir die taak!

Sag 4:6 Toe antwoord hy en sê vir my: Dit is die woord van die HERE aan Serubbábel, naamlik: Nie deur krag of deur geweld nie, maar deur my Gees, sê die HERE van die leërskare.

Ons almal weet en besef dat die tye besig is om bitter vinnig uit te loop, maar nogtans rus ons op ons louere en vergaan daar ‘n magdom mense rondom ons, omdat ons nie die vrugte van die bekering dra nie of bereid is om te gaan as die Here ons wil stuur nie!

Rom 13:11 En dit te meer, omdat ons die tydsomstandighede ken, dat die uur vir ons reeds daar is om uit die slaap wakker te word; want die saligheid is nou nader by ons as toe ons gelowig geword het.

Die realiteit is dat God deur mense, met mense werk en dat ek en jy nie gered is net vir onsself nie, maar ook sodat God ander mense se lewens kan aanraak! Tereg sê die Woord dat ons nie deur werke alleen die ewige lewe sal beërwe nie, maar óók dat as jou geloof nie in werke omsit nie, dan is jou geloof dood!!! (Jak 2: 17-18)

Baie kere beteken dit om maar net jou getuienis van die dinge wat jy deurgemaak het, met ander te deel. Selfs die getuienis oor jou diepste seer behoort nie aan jou nie, maar aan Jesus! Die wyse waarop jy vertroosting gevind het, help dalk net iemand anders om vrede te vind oor een of ander traumatiese gebeurtenis in hulle lewe!

2Kor 1:3 Geseënd is die God en Vader van onse Here Jesus Christus, die Vader van ontferminge en die God van alle vertroosting,
2Kor 1:4 wat ons troos in al ons verdrukking, sodat ons die wat in allerhande verdrukking is, kan troos deur die vertroosting waarmee ons self deur God getroos word.
2Kor 1:5 Want soos die lyde van Christus oorvloedig is in ons, so is ons troos ook oorvloedig deur Christus.

Liewe kind van God, wie is daar naby of rondom jou wat vandag God se aanraking en liefde nodig het? ...waag dit bietjie om toe te laat dat Vader jou onbekwaamheid gebruik om “Jesus” vir iemand te wees vandag!

Gebed:  Abba, dankie dat U die een is wie ons bekwaam maak vir elke taak en dat U juis die “afvlerk” kinders gebruik om instrumente in U hand te wees vir ander. Dankie dat U die een is wie ons reeds vertroos het, sodat ons ander na dieselfde mate kan vertroos..amen.

Vrede en seën in Christus Jesus!

(ernest phillipson - ecp@oicb.co.za)

Hoe bly ek kalm onder druk?

Hierdie is ‘n onderwerp waaroor daar baie boeke geskryf is. Baie deur groot en erkende sielkundiges en geleerdes. Ek self het baie van hierdie boeke gelees en dit het baie kennis bevat wat ek nie verstaan het nie en daar is ook nie gesê hoe ek dit prakties kon toepas nie. Ek as persoon is baie meer geneig om te luister na die raad of wenke van iemand wat sukses behaal het in die gebied waarin hy my van raad bedien. Dít wat hy vir my sê om te doen het in sy lewe gewerk en hy het sukses daarin behaal. Dit is nie maar net ‘n klomp woorde en saamgeflansde opinies nie.

Die Bybel sê vir ons in 2 Timotheus 1:7 “Want God het ons nie ‘n gees van vreesagtigheid gegee nie, maar van krag en liefde en selfbeheersing.” Hierdie teks gebruik ons so baie maar hoe maak ek dit prakties? Wanneer ekself of iemand anders in desperate omstandighede is gaan woorde alleen nie help nie. Ek gló dat God sê dat ek nie ‘n gees van vreesagtigheid het nie, ek gló en weet dat God sê dat ek nie moet vrees nie maar hoe oorwin ek die verlammende vrees en bekommernis as ek in moeilike omstandighede is?

Ek het onlangs ‘n artikel hieroor raakgelees. Die opskrif was: “Hoe om kalm te bly onder druk – Drie geheime deur ‘n bom onskadelikmaking ekspert”. Ek het onmiddelik besef dat hier iets is waarna ek kan luister, hier praat iemand wat in verskeie situasies was waar hy spanning, druk, vrees moes hanteer of sy lewe verloor het. Die artikel is geskryf deur Eric Barker.

Hier is ‘n onderhoud gevoer met iemand wat in ‘n leiers posisie was in die vloot se afdeling wat uiter gevaarlike toestelle onskadelik stel. Toestelle soos lewendige torpedo’s onderwater, biologiese wapens, chemiese en selfs kernwapens. Iemand wat ontplooi was is gevaarlike oorlogsones waar daar nie baie tyd beskikbaar was waarin die toestelle onskadelik gestel kon word nie. Iemand wat vrees moes hanteer!

Hierdie persoon het drie belangrike dinge genoem:

Eerstens: Vermy die “gat” en doen ‘n bedreiging evaluasie.

Iets gaan verkeerd. Jy raak bekommerd en jou gedagtes begin rond hardloop. Jou ou “vriend” vrees en paniek begin ‘n houvas kry en beheer oorneem. Jou brein begin vra, “Wat as dít gebeur?, Wat as dát gebeur?, Hoe gaan ek uit hierdie situasie uitkom? Wat as? Wat as? Wat as?

Ons vriend verwys hierna as die “gat” Indien jy in díe gat val gaan dinge baie vining baie sleg raak. Hy sê: “Met enige toestel wat aangepas of verander is praat ons van “die gat” Jy kan in die “gat” ingaan deur te dink, Wat as hulle dít ingesit het? Wat as hulle ‘n ander skakelaar ingesit het? Wat as hulle só ’n tipe sneller ingesit het? Die opsies van versteekte meganismes is menigvuldig en almal kan geldige argumente wees.

Jy moet hierdie “gat” vermy en ‘n bedreigings evaluasie doen. Dit beteken om objektief na die situasie te kyk en te vra: “Wat se problem is dié? Dink aan ‘n vorige soortgelyke situasie waarin jy was. Hoe het ek dit hanteer? Wat het gewerk? Miskien was jy nog nooit van tevore in só ’n situasie nie maar dit is ook reg. Veralgemeen. Jy het moontlik al gedeel met iets wat naastenby soos hierdie situasie lyk of het gesien hoe iemand ander ‘n soortgelyke situasie hanteer. Daarom sê die Here in 2 Kor 10:5  “terwyl ons planne verbreek en elke skans wat opgewerp word teen die kennis van God, en elke gedagte gevange neem tot die gehoorsaamheid aan Christus,”

Om die beskikbare kennis en ondervinding te benut is wat hierdie manne in staat stel om kalm te bly en ‘n uiters gevaarlike situasie op te som. Wat se ingesteldheid het ek nodig om kalm en gefokus te bly voordat ek optree of die rooi draad knip?

Tweedens: Benadruk die positiewe en fokus of dit wat jy kan beheer.

Ons vriend se bevelvoerder het hom vertel van ‘n situasie waar hy ‘n onderwater myn moes onskadelik stel en besef het dat hy verstrengel geraak het in die drade en kabels. Hy was so vasgedraai dat hy nie sy hande of voete kon beweeg nie. Wat was die eerste gedagte in sy kop? “Ek haal nog asem, so dit is goed! Wat is daar nog wat in my guns tel?” Dit is om na die positiewe kant te kyk. Daar is vele onderhoude gevoer met mense wat uiterste omstandighede en situasies oorleef het. Almal het een ding in gemeen – OPTIMISME!!

Deur met die positiewe te begin, realisties na die feite te kyk het die bevelvoerder in staat gestel om kalm  en gefokus te bly op dit wat hy kon beheer. So kon hy stappe neem om uit die situasie te kom. So kan ek beheer neem deur klein positiewe stappe te neem. Ek fokus op die positiewe en vermy die “gat” van negawiteit. Is die situasie nog ‘n krisis? Ja dit is maar dit is net ‘n krisis as ek nie ‘n oplossing vind nie.

Indien ek fokus op dit waaroor ek beheer het is daar ‘n oplossing. Stap vir stap word die krisis afgeweer.

Dit is vreesaanjaend om teen 120 km/h op ‘n beton muur af te peil!! Maar as daardie beton muur ‘n skeiding, op ‘n draai,  tussen twee bane op die snelweg is en ek die stuurwiel net effe na links kan draai, sal ek nie vrees nie. Ons doen dit in elk geval daagliks as ons bestuur. Nie ‘n krisis nie.

Nou moet ek die bul by die horings pak en optree.


Derdens: Weet wat die volgende stap is.

Ons almal is tot ‘n mate bang vir die onbekende. Want dit is daar waar jy begin spekuleer en bekommerd raak. Daar waar ons so maklik is die “gat” val. Die geheim om kalm en gefokus te bly is om te besluit wat jy volgende gaan doen. Dit verhoed dat die gat van spekulasie en bekommernis oopmaak. Wanneer ek op iets konsentreer sal my gedagtes gefokus bly ten spyte van wat rondom my gebeur. Ek weet wat moet gebeur, wat die volgende stap is!

Ek bly gefokus op die volgende stap.Miskien is dit net ‘n klein stappie, dit is doodreg. Miskien is die situasie só dat ek moet vra vir hulp, geen problem daarmee nie! Dink spesifiek voor jy die volgende stap neem. Ons vriend vertel van ‘n situasie waarin hy homself bevind het. Hy was 40m onderwater toe die elektronika is sy asemhalings toerusting ingee. Dit het hom nie meer die suurstof, om te lewe, voorsien nie. In alle opsigte het hierdie gekwalifiseer as ‘n krisis. Hy het egter geweet dat daar ‘n metode is om die elektronika te omseil en self suurstof te voorsien. Dit was nie meer ‘n krisis nie. Wanneer jy deur die situasie kyk en sien wat werklik aangaan is dit baie makliker. Ek fokus nie op die onsekerheid nie maar op “wat is die volgende stap?” Vermy negatiewe emosies deur op die proses (stappe)  te fokus en nie op die resultaat  aan die einde nie!

Nou kan jy ook vra, Cobus ek weet nie wat die volgende stap is nie, hoe bly ek kalm? Ons vriend was ook in só ‘n situasie. Hy vertel dat hy voor ‘n bom was en fokus op die volgende stap verloor het. Die toestel was baie gevaarliker as wat hy verwag het en hy was nie voorbereid vir ‘n ergste situasie nie. Vrees het hom beetgepak, nie net oor homself nie maar ook vir die veiligheid van sy span. Hoe het hy dit hanteer? Hy moes homself afvra: “ Help hierdie gedagtes my of nie?” Hy het besef dat hierdie gedagtes hom na die “gat” sleep. Hy het ‘n besluit geneem en dit was: Kry hulp in.” Dit is geen vernedering om te vra vir hulp nie.

Dit is medies bewys dat besluitneming verminder bekommernis en vrees. Besluitneming verander jou persepsie van die wêreld en die vind van oplossings kalmeer jou senu stelsel. Die oomblik wat ek kalm en rustig word is dit soveel makliker om die leiding en stem van die Heilige Gees te hoor. Dan sal Hy my oprig en versterk.

Gebed. “Here Jesus, help my asseblief om my gedagtes gevange te neem, ook in moeilike situasies. Help my om op U gefokus te bly en gee my U vrede in hierdie tye. Ek wil die sagte stem van die Heilige Gees hoor soos Hy my lei. Amen”

 (cobus van heerden - cvh@oicb.co.za)

Jy hoef nie te vrees nie

“Hy sal jou dek met sy vlerke, en onder sy vleuels sal jy skuil; sy trou is ‘n skild en pantser. Jy hoef nie te vrees vir die skrik van die nag, vir die pyl wat bedags vlieg nie, vir die pes wat in die donker wandel, vir die siekte wat op die middag verwoes nie! Al val daar duisend aan jou sy en tien duisend aan jou regterhand—na jou sal dit nie aankom nie. Net met jou oë sal jy dit aanskou en die vergelding van die goddelose sien.” (Psalm 91:4-8)

Die afgelope paar maande sien ek hoedat mense in totale vrees en verwarring begin ingaan oor wat besig is om in Suid Afrika te gebeur. Een whatsapp of e-pos boodskap wat meehelp om vrees, verwarring en veral ook rassisme by mense aan te hits, word opgevolg deur een wat selfs meer opruiend van aard is.

En die ergste van alles is dat dit juis Christene is wat daaraan meedoen. Soos wat die whatsapp boodskappe by my verbykom, ervaar ek sommer die vrees, verwarring en ook rassisme wat in die verskillende boodskappe vervat is. Dan wonder ek hoe gebeur dit dat mense wat hulleself uitgee as kinders van die Here, in hierdie lokval inval? Is dit bloot maar steeds omdat hulle dwaal omdat hulle nie die Skrifte EN GOD SE KRAG ken nie, volgens Mattheus 22:29?

Want ek persoonlik glo my God het nog nooit verander nie, en dat die woorde van Psalm 91:4-8 steeds op Sy kinders van toepassing is. En wat beteken dit dan vir ons?

1. Dat ons NIE HOEF TE VREES NIE, omdat ons onder Sy vleuels skuil.
2. Dat Sy trou ‘n skild en pantser vir my is, waardeur NIKS kan dring nie.
3. Dat selfs al val daar duisend aan my sy en tienduisend aan my regterhand, na my toe sal dit NIE aankom nie.
4. Ek sal die goed rondom my sien gebeur en ook die vergelding van die goddelose sien.

En omdat ek glo dat my God steeds die Almagtige Skepper van hemel en aarde is, en dat Sy Woord steeds vandag nog fisies waar is, neem ek nie deel daaraan om daardie boodskappe aan te stuur om nog meer vrees in mense se harte aan te wakker nie. Ek verkies eerder om mense te herinner aan die woorde van Psalm 91:4-8 en hulle te leer om hulle oog op hulle God gefokus te hou, eerder as op die omstandighede wat vrees in hulle wil opjaag.

“Vader, baie dankie dat ek as U kind mag weet, ek hoef nie te vrees vir enigiets wat rondom ons gebeur nie. Ek kies om my oë elke dag eerder op U te hou as op die omstandighede rondom my, want ek weet U Woord leer my dat al val daar duisend aan my sy, en tienduisend aan my regterhand, na my toe sal dit nie aankom nie. Ek kies om eerder die waarheid van U Woord te glo, as die sieninge en opinies van mense. Amen.”

 (tiaan gildenhuys - tg@oicb.co.za)
Geplaas met toestemming van Tiaan Gildenhuys

Deur die Here ingesluit.

Gen 7:16  En die wat ingaan, het gegaan as mannetjie en wyfie van alle vlees soos God hom beveel het. En die HERE het agter hom toegesluit.

Baie mense het sekerlik al gewonder hoé Noag dit reggekry het om só 'n groot skip te kon bou, oor só 'n lang tydperk, met die beperkte toerusting en middele wat hulle in daardie tyd gehad het. Nie net moes dit drie verdiepings hoog gewees het nie, maar dit moes ook 'n reuse vrag kon vat en op die waters kon dryf vir meer as 150 dae, sonder om te sink of water in te neem.

Ek dink dat die antwoord daarin lê dat dit spesifiek en noukeurig volgens God se instruksies gebou moes word en dan ook in die kern van die vers hierbo wat sê dat God self hul ingesluit het, nadat almal in die ark was. Dit was nie maar net 'n deur wat Noag moes toetrek en daar gaan hulle nie...God self het dit geseël met Sy heilige teenwoordigheid!

Net só het God baie jare later, vir Moses baie duidelike instruksies gegee oor hoé die Tabenakel gebou moet word en nadat die werk noukeurig volgens Sy instruksies uitgevoer was, het Hy die Tabernakel gevul met Sy heilige teenwoordigheid!

Net só kan ons as kinders van God, vandag nog staatmaak op Sy beskutting en beskerming as ons leef volgens Sy instruksies (die Bybel). Ons lees in Job dat hy 'n baie vroom en Godvresende man was en dat die duiwel self moes erken dat Job deur God self “ingesluit” was.

Job 1:9  En die Satan antwoord die HERE en sê: Is dit verniet dat Job God vrees?
Job 1:10  Het U nie self hom en sy huis en alles wat hy het, aan alle kante rondom, beskut nie? Die werk van sy hande het U geseën, en sy vee het sterk vermeerder in die land.

Ons lees ook baie duidelik in Ps 91 hoé groot en kragtig God se belofte is vir beskerming vir dié wat in die skuilplek van die Allerhoogste sit. Die probleem in vandag se lewe is dat die kind van God sy vertroue in sóveel ander stelsels en goeters begin stel het, dat hul vertroue nie meer volkome is by die God bo alle gode nie. Wanneer daar dan dinge met hulle gebeur, dan vra hulle gou die vraag: “waar was God se beskerming dan?”

Die Bybel is baie duidelik dat God nie verander het nie en dat Sy woord nooit leeg na Hom sal terugkeer nie en dat dit steeds net só lewendig en kragtig is soos toé Jesus dit gebruik het om die heelal te skep of soos toe Hy self hier op aarde gewandel het!

Die probleem lê dus by ons as kinders van God en in die wyse waarop ons vandag glo. Ons is vinnig met argumente dat die mensdom nou baie meer boos is as in die tyd van die Bybel en dat die duiwel se aanslae nou meer intens is. Tog sê die Woord dat daar niks nuuts op hierdie aarde is nie en dat alles wat nou is, alreeds was. En in Noag se tyd, het God die aarde verwoes as gevolg van die boosheid. Is ons argumente dan nou regtig só waterdig soos wat ons dink?

Die feit is dat God nooit sal verander nie en ook nie Sy woord nie! Daarom moet ons dus begin om selfondersoek in te stel om te sien of ons werklik glo soos wat ons sê ons doen? Paulus stel dit só:

2Kor 13:4  Want al is Hy gekruisig uit swakheid, lewe Hy tog uit die krag van God. Want ons is ook swak in Hom, maar ons sal saam met Hom vir julle lewe deur die krag van God.
2Kor 13:5  Ondersoek julself of julle in die geloof is; stel julself op die proef. Of is julle nie seker van julself dat Jesus Christus in julle is nie—as julle ten minste nie verwerplik is nie!

Mag elkeen van ons opnuut in 2017 ervaar dat Jesus Christus steeds die Almagtige God is wat nog nooit verander het nie en absoluut getrou aan Sy woord is!

Vrede en seën in Christus Jesus van Nasaret

(ernest phillipson - ecp@oicb.co.za)
Geplaas met toestemming van Tiaan Gildenhuys