Die Eerste Gebod

In die evangelies lees ons waar die Skrifgeleerdes na Jesus toe kom om Hom met strikvrae te probeer betrap om sodoende 'n rede te kry om Hom dood te maak. Een van daardie vrae was dan ook wat die eerste gebod is... ons lees onder andere daarvan in
Markus 12:

Mar 12:28  En toe een van die skrifgeleerdes wat bygekom het, hulle hoor redetwis, en wis dat Hy hulle goed geantwoord het, vra hy vir Hom: Wat is die eerste gebod van almal?

Let wel dat die vraag in hierdie deel, spesifiek gaan oor wat die heel eerste gebod sou wees en dan antwoord Jesus hom baie duidelik in die volgende verse:

Mark 12:29  En Jesus antwoord hom: Die eerste van al die gebooie is: Hoor, Israel, die Here, onse God, is ‘n enige Here;
Mark 12:30  en jy moet die Here jou God liefhê uit jou hele hart en uit jou hele siel en uit jou hele verstand en uit jou hele krag. Dit is die eerste gebod.

Jesus maak dit dus baie duidelik in hierdie deel dat gehoorsaamheid die eerste en grootste gebod is en dan volg Hy dit op in vers 30 deur te sê: “EN jy moet die Here jou God liefhê...

Baie keer word hierdie belangrike punt van Jesus se antwoord misgekyk of net verbygelees om by die deel uit te kom dat om God lief te hê, die grootste gebod is. Tog as ons teruggaan na toe God vir Adam gemaak het, sien ons nêrens dat Hy aan Adam en Eva die opdrag gegee het om God lief te hê nie. Ek is van mening dat die mens dus van die begin af geskape is met die inherente begeerte om God lief te hê. Na die sondeval egter, het die mens willens en wetens begin kies om God nie lief te hê nie en ander gode te aanbid.


Was daar dan enige gebooie wat God aan die mens voorgehou het toe Hy hulle gemaak het? Ja verseker! Ons lees daarvan in Genesis 2:

Gen 2:16  En die HERE God het aan die mens bevel gegee en gesê: Van al die bome van die tuin mag jy vry eet,
Gen 2:17  maar van die boom van die kennis van goed en kwaad, daarvan mag jy nie eet nie; want die dag as jy daarvan eet, sal jy sekerlik sterwe.

Omdat God die mens met 'n vrye wil geskape het, moes Hy iets daar stel om die mens in staat te stel om daardie kenmerk van sy wese, te kon beproef. Al vereiste wat Vader toe daargestel het, was die opdrag van gehoorsaamheid.

Was daardie deel in Markus, die enigste plek waar Jesus na hierdie groot gebod verwys het, of is daar bewyse dat Hy dit op 'n ander stadium weer bevestig het?  Kom ons gaan kyk bietjie na die boek van Johannes:

Joh 14:15  As julle My liefhet, bewaar my gebooie.

Joh 14:21  Wie my gebooie het en dié bewaar, dit is hy wat My liefhet; en wie My liefhet, hóm sal my Vader liefhê, en Ek sal hom liefhê en My aan hom openbaar.

Joh 15:10  As julle my gebooie bewaar, sal julle in my liefde bly, net soos Ek die gebooie van my Vader bewaar en in sy liefde bly.

Uit bogenoemde is dit duidelik dat gehoorsaamheid direk verband hou met liefde vir God en sien ons dat Jesus dit hier nog drie keer beklemtoon het. In die tyd van die eerste koning van Israel, Saul, lees ons dat Samuel hierdie belangrike gebod ook bevestig:

1Sam 15:22  Daarop sê Samuel: Het die HERE behae in brandoffers en slagoffers soos in gehoorsaamheid aan die stem van die HERE? Kyk, om gehoorsaam te wees is beter as slagoffer, om te luister beter as die vet van ramme.

Terwyl daar weer baie voornemes vir die nuwe jaar gemaak sal word vir die nuwe jaar van 2019, dink en weet ek dat die heel belangrikste en beste voorneme wat enige kind van God kan maak, is om weer radikaal gehoorsaam te raak en te wees aan die stem van die Here en Sy Heilige Gees!

Daarin is daar lewe en hoop!

GEBED: 
"Vader van genade, ons het in hierdie afgelope jaar weer baie verkeerde besluite geneem, omdat ons nie gehoorsaam was aan U stem nie...vergewe ons daarvoor en kom versterk ons met nuwe krag om terug te keer na U toe in radikale gehoorsaamheid... In Jesus Naam. Amen."

 Geskryf deur: ernest phillipson
(ecp@oicb.co.za)

Wanneer is dit die Einde?

Hoeveel keer vra ons tog nie vir onsself hierdie eenvoudige vragie nie? Soms vir ietsie eenvoudigs, maar soms vir iets wat selfs ons saligheid kan raak. Hoe kan ek dit sê?

Wel, kom ons sê jy speel byvoorbeeld in ‘n rugbywedstryd en jy is aan die verloorkant, erg. Jy kan dan nie meer wag totdat die spel verby is nie en jou gedagtes sing met: "WANNEER IS DIT DIE EINDE?" al het jy wel ‘n horlosie om op te werk en te sien hoeveel tyd is nog oor.

Netso in dieselfde wedstryd speel jy aan die wenkant, en jy sal ook sê: "WANNEER IS DIT DIE EINDE?" maar sonder kommer want die horlosie sal jou wys hoe lank voor jy kan seëvier in jou span se oorwinning.

Dieselfde geld vir ons geestelike wandel in die lewe ook.

Wanneer iemand dalk erg aan die verloorkant is van die lewe is dit maklik om te vra: "WANNEER IS DIT DIE EINDE - want dan is die seer nie meer daar nie?", of so vermoed baie mense.

En wanneer ons aan die wenkant of aan geestelike groei floreer, vra ons ook met opgewondenheid: "WANNEER IS DIT DIE EINDE?" want ons kan nie wag om by ons Skepper en Koning te wees tot in alle ewigheid nie.

So, die vraag is altyd, altyd, daar. In beide goeie tye en slegte tye van die lewe.

Dit hang wel van onsself af wat die antwoord is op hierdie eenvoudige vragie. Beide in die fisiese en in die geestelike.

In die fisiese, bepaal jou gemoed hoe die vraag beantwoord sal word en as jy lewe in die geestelike groei soos bepaal deur die Woord van God in Romeine 12:2 sal die fisiese gemoed deur die geestelike versterk word om beslis die positiewe te kan beantwoord.

Romeine 12:2  "En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is."

Solank ons ons oë hou op Jesus Christus van Nasaret wat vir my en jou sondes gesterf het, opgevaar het na die Hemel, en huidiglik (ek is seker) ook nie kan wag om die antwoord op "WANNEER IS DIT DIE EINDE?" finaal te kan volbring nie.

Dis dalk wel moeilik om die antwoord vir hierdie vraag te kan bedink wanneer die vervolginge en verdrukkinge nou hier op aarde plaasvind, veral in daardie oomblikke van seer en moeilikheid, maar tog sal God ons deurdra deur alles!

Deuteronómium 4:31  "Want die HERE jou God is ‘n barmhartige God; Hy sal jou nie verlaat en jou nie in die verderf stort nie; en Hy sal die verbond van jou vaders wat Hy hulle besweer het, nie vergeet nie."
Nou die vraag in die geestelike, "WANNEER IS DIT DIE EINDE?"

Alle aanvalle in die geestelike hier op aarde kom van satan af en as dit erg raak en hierdie vragie kom in ons koppe op, moet ons moed hou want ons weet dat Jesus self ‘n klomp tekens aan Sy dissipels genoem het wat moet plaasvind, voordat die einde sal kom.

Beide in Matthéus 24:6 en Markus 13:7 sê Jesus persoonlik aan Sy dissipels “...maar dit is nog nie die einde nie” en Hy verwys na die eintlike ware vraag wanneer is DIT die einde? wat in ons almal se gedagtes ronddwaal.

DIT verwys tog sekerlik na die hartseer, wreedheid, bose wêreld van vandag, ens. en slegs God die Vader weet wanneer DIT die FINALE einde sal wees!

So elke dag wanneer die vragie in jou gedagtes opkom, beide in jou geestelike groei (van Jesus se kant af) en miskien in jou mismoedigheid (van satan se kant af), kan jy steeds WEET met ‘n blye hart dat God steeds in beheer is en Hy alleen weet WANNEER DIT DIE EINDE IS!

Matthéus 24:36  "Maar van dié dag en dié uur weet niemand nie, ook die engele van die hemele nie, maar net my Vader alleen."

Hierdie is ook die begin van ‘n nuwe jaar, so beslis is dit nie die einde nie, maar ‘n nuwe begin wat ons kan opdra aan Jesus Christus, en waar ek kan weet die jaar wat voorlê het geen struikelblokke vir my wat ek nie kan oorwin nie, want my God is aan my kant.

Filippense 4:13  "Ek is tot alles in staat deur Christus wat my krag gee."

Gebed:

"Almagtige Vader wat in die Hemel is, Skepper van Hemel en Aarde, U is die Alfa en die Omega, U is die begin en die einde, U alleen weet wanneer dit die einde sal wees. Help my asseblief om elke dag te waak en bid soos U Woord my sê om te doen sodat wanneer ek dalk wonder oor die einde, ek sal weet, U is in beheer en U weet alles en gee my dan asseblief die krag om my gemoed te versterk deur U Woord sodat ek die vyand kan oorwin deur U Heilige Gees.Ek bid dit in Jesus Naam.
Amen."

Geskryf deur: hein henning
(heinh@sunlightfs.co.za)

Moenie agtertoe kyk nie!

Ek wens al ons lesers 'n baie mooi en geseende 2019 toe, mag die vrede van God met julle wees elke dag van 2019, voorspoed, geluk en vrede wens ek julle toe in Jesus Naam.

Groete en seen
Belinda

Lukas 9:62: "En Jesus antwoord hom: Niemand wat sy hand aan die ploeg slaan en agtertoe kyk, is geskik vir die koninkryk van God nie."

Hier aan die begin van 'n nuwe twaalf maande tydperk volgens die wêreldse kalender, is ons as gelowiges tog so baie kere geneig om heeltyd te wil terugkyk na die vorige twaalf maande. Ons kyk terug na verkeerde besluite wat ons gemaak het, of ons kyk terug na verhoudinge wat ten einde geloop het, of ons kyk terug na 'n loopbaan wat tot 'n einde gekom het...

En wat veroorsaak daardie terugkyk in die meeste gevalle? Hartseer, of swaarmoedigheid of moedeloosheid, in sommige gevalle selfs vrees, of onvergifnis en bitterheid. Maar van waar kom al daardie negatiewe dinge? Van niemand anders as satan nie!

Want hy ken die Bybel en hy weet wat Lukas 9:62 bepaal. Daarom sal hy gedagtes in ons koppe plaas om ons heeltyd te laat terugkyk na "gister", want daar kan hy ons vasbind. En juis daarom sê Jesus self in Lukas 9:62 ons MOENIE agtertoe kyk nie, want dan is ons nie geskik vir die koninkryk van God nie.

En die woordjie "koninkryk" in Grieks is "basileia" en beteken: "to rule, to reign, or have dominion". Met ander woorde, as satan ons kan kry om heeltyd terug te kyk na gister, is ons nie geskik vir God se geestelike outoriteit in ons lewens nie. En satan weet dit ook.


Daarteenoor is die Here se plan vir ons die volgende:

Jeremia 29:11: "Want ek weet watter gedagtes Ek aangaande julle koester, spreek die HERE, gedagtes van vrede en nie van onheil nie, om julle 'n hoopvolle toekoms te gee."

Hier sien ons waarom God nie wil hê dat ons agtertoe moet kyk nie, want Hy wil hê ons moet daagliks in ons geestelike outoriteit lewe in Sy Koninkryk, en Hy het gedagtes van vrede vir ons en nie van onheil nie. So, al daardie onheil wat my dalk in 2018 getref het, was beslis nie van Hom nie. Daarom leer Hy ons verder in Sy Woord in Filippense 3:14:

"Maar een ding: ek vergeet die dinge wat agter is en strek my uit na wat voor is, en jaag na die doel om die prys te verkry van die hoë roeping van God in Christus Jesus."

Kom ek en jy leer dus om sommer vroeg in hierdie nuwe jaar reeds klaar te maak met alles wat agter is, deur te vergewe en vry te spreek soos die Here my leer in Sy Woord, en om my dan uit te strek na die dinge wat voor my is, sodat ek en jy kan instap in daardie hoopvolle toekoms wat ons liefdevolle Hemelse Vader vir ons het.

GEBED: 

"Vader, ek kom na U in die magtige Naam van Jesus Christus. Vader, ek kies om klaar te maak met die dinge van die verlede, help my asseblief om dag vir dag almal te vergewe wat my tenagekom of seergemaak het, en leer my ons my uit te strek na wat voor is en die hoopvolle toekoms wat U vir my het, ook in 2019. In Jesus Naam vra ek dit. Amen."

 Geskryf deur: tiaan gildenhuys
(tg@oicb.co.za)