Hoe hou ons die Heilige Gees aan die werk in ons lewens?

Hou die vuur brandend... Geskryf deur Past Johann De Villiers

2 Tim. 1:3-11: "...(onthou) dat jy die genadegawe wat God jou gegee het...soos 'n vuur weer moet aanblaas" (vs. 6).

Genl. William Booth, stigter en leier van die Heilsleër (beter bekend as die Salvation Army), het vir sy offisiere en manskappe gesê: "Jongmanne, pas die vuur in julle harte op, want dit is geneig om dood te gaan." Toe maak hy 'n paar vergelykings, dat hulle met die geestelike vuur in hulle harte net so moet werk as wat 'n mens 'n vuur op die vuurherd brandend sal hou.

Eerstens moet vuur genoeg lug kry, die vensters moet oop wees, sodat daar 'n trek kan wees. Windstilte laat vuur smoor en doodgaan. "'n Hemelse lug, die werking van die Heilige Gees, moet gedurig deur die venster van gebed invloei." Jesus het die werk van die Heilige Gees vergelyk met die wind wat waai: "Die wind waai waar hy wil. Jy hoor sy geluid, maar jy weet nie waar hy vandaankom en waar hy heen gaan nie. So gebeur dit met...die Gees..." (Joh.3:8).

In Handelinge word die werk van die Heilige Gees met wind en vuur vergelyk: "Skielik was daar 'n geluid uit die Hemel soos van 'n geweldige stormwind... Hulle het iets soos vuur gesien wat... op elkeen van hulle gekom het." (Hand.2:2,3). Ons weet wind wakker vuur aan, maar die wind kan net deur oop vensters in die huis inkom. Gebed is die vensters vir die inkom van die werk van die Gees in ons harte.

Tweedens moet die ou as gereeld verwyder word, anders smoor die vuur. "Deur selfondersoek en belydenis van sondeskuld moet die vuurherd van die hart skoon gehou word anders sal die vuur doodsmoor." "... as ons, ons sondes bely – Hy is getrou...Hy vergewe ons, ons sondes en (boonop) reinig Hy ons van alle ongeregtigheid" (1 Joh.1:9).

Derdens moet daar gereeld nuwe brandhout op 'n vuur gesit word. "Deur die Woord van God te lees en te oordink word die geestelike vuur in ons harte gevoed en brandend gehou."

GEBED: Here, vandag sorg ek vir U vuur in my lewe...

Moet ons die Evangelie tydig en ontydig verkondig?

2 Tim. 4:1-5: "…verkondig die Woord; hou daarmee vol, tydig en ontydig…" (vs. 2)

In die laat tagtigerjare het 'n kreupel vrou, Irma Jansen, in 'n hospitaalsaal in Kaapstad gelê. Vir die soveelste keer was sy in die hospitaal. Sy dink nie oor haar eie probleme nie. 'n Belangriker saak verg haar aandag. 'n Siek vrou is so pas ingebring en aan die anderkant van die saal op 'n bed neergelê. Sy is duidelik baie siek.

Irma is dadelik oor haar besorg. Is sy gereed om te sterf? Self is sy te siek om na die vrou toe te gaan. Sy lê nog en prakseer hoe sy die vrou kan bereik, toe versleg die vrou se toestand en sy word haastig na 'n privaatkamer gestoot, waar net die familie by haar toegelaat word. Sy is besig om te sterf.

Opnuut aangedaan deur die onverbiddelikheid van die dood wat nie van uitstel weet nie, bid Irma in haar bed vir die vrou wat nou buite haar fisiese bereik lê.

'n Verpleegster kom haastig na Irma se bed toe. Omdat sy so dikwels in die hospitaal beland, ken die verpleegpersoneel haar al goed. Hulle weet sy is 'n Christen. "Kan ons tog jou Bybel leen," vra die verpleegster. "Die familie wil graag aan hulle sterwende moeder uit die Bybel voorlees." Die verpleegster gee 'n skewe glimlaggie. "Ek weet jy het al die belangrike verse onderstreep."

Ure later bring die verpleegster die Bybel terug. Die vrou het heengegaan.

'n Paar dae later bring die vrou se seun vir Irma 'n ruiker. Hy kom dankie sê vir die gebruik van haar Bybel. Hy is seker dit het sy ma getroos om na die Here se Woord te kon luister. Maar eintlik wil hy oor iets anders praat. Met hóm het iets gebeur. Hy het nooit veel vir godsdiens omgegee nie, maar toe hy daar voor die werklikheid en finaliteit van die dood vir sy ma die onderstreepte tekste voorlees, het hy die verlossing van Christus begryp. Geloof het in sy hart wakker geword en hy het vir haar kom vertel hy is nou Wedergebore.
 "Saai jou saad in die môre, gaan in die laatmiddag daarmee voort. Jy weet nie watter van die twee sal 'n oes lewer nie en of altwee ewe goed sal wees nie" (Pred.11:6) "'n Saaier het uitgegaan om saad te saai …die saad is die Woord van God …(die) wat in goeie grond val dui op dié (hoorders) wat die Woord met 'n opregte hart hoor en …vrug dra" (Mat.8:5,11, 15).

GEBED: Here, vandag, more, oormore, altyd,  wil ek getrou wees en  U Woord aan iemand oordra.-Sjibbolet

Volheid van die Heilige Gees

Geskryf deur Manie Colyn.

Ef. 1:1-14: "Deur Christus het ook julle deel geword van die volk van God toe julle die waarheid wat aan julle verkondig is, die evangelie van julle verlossing, gehoor en tot geloof gekom het. In Christus het die Heilige Gees wat deur God belowe is julle as die eiendom van God beseël" (vs. 13).

Charles G. Finney se naam word gedurig met die herlewing van meer as 'n eeu gelede verbind. Hy was 'n regsgeleerde, maar na sy oorgawe aan die Here het die Here hom op buitengewone wyse met die Heilige Gees vervul. Sy prediking was daarna vol krag en baie mense het tot bekering gekom.

In die Elim Evangel beskryf hy sy ervaring met hierdie woorde wat herinner as die uitstorting van die Heilige Gees op die eerste dissipels op Pinksterdag: "As I turned and want to take a seat by the fire, I received the mighty Baptism of the Holy Spirit. The Holy Spirit descened upon me in a manner that seemed to go through me, body and soul. I could feel the impressions like a wave of electricity going through and through me. Indeed, it seemd to come in waves and waves of liquid love; for I could not express it in any other way. I wept aloud with joy and love; and I do no know, but I should say I literally bellowed the unuttterable gushings of my heart."

Sy kragtige verkondiging van die evangelie en die herlewings wat gevolg het oral waar hy gepreek het, het 'n stempel geplaas op die egtheid van hierdie ervaring. Die prediker, D. L. Moody, het 'n soortgelyke kragtige ervaring van die vervulling met die Heilige Gees gehad. Ander werkers van die Here, wat net so bruikbaar en geseën in die Here se diens was, het weer nie so 'n dramatiese ervaring gehad nie.

Die prediker en skrywer, F. B. Meyer, wat net so kragdadig deur die Here gebruik is en wat nou nog sy baie boeke gebruik en seën, skryf in The Overcomer soos volg oor sy ervaring van die volheid van die Heilige Gees:

"I left the prayer meeting and crept out into the lane, away from town. As I walked I said, 'O my God, if there is a man who needs the power of the Holy Ghost to rest upon him it is I; but I do not know how to receive Him. I am too tired, too worn, too nervously down, to agonize.'

In my heart a voice said: 'As you took forgiveness from the hand of the dying Christ, take the Holy Ghost form the hand of the living Christ.' I turned to Christ and said, 'Lord, I breath into me a breathe in this whiff of warm night air, so I breathe into every part of me Thy blessed Spirit.'"

Hy gaan voort om te getuig dat hy nie gevoel het die Here se hand word op hom gelê, of 'n vuurvlam val op hom, of dat hy 'n gedruis uit die Hemel gehoor het nie, maar deur geloof, sonder emosie, sonder opgewondenheid, het hy vir die eerste keer, en daarna keer op keer, die volheid van die Heilige Gees vir hom in sy hart toegeëien. Sy vrugbare arbeid daarna het ook in sy geval die egtheid van sy vervulling met die Heilige Gees bekragtig.

Paulus skryf aan die Efesiërs: "Ek bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word, dat Christus deur die geloof in julle harte sal woon en dat julle in die liefde gewortel en gegrondves sal wees" (Ef.3:16). "...laat die Gees julle vervul..." (Ef.5:18). Ons kan nie in eie krag die geringste werk in die Here se koninkryk met vrug en seën verrig, sonder die krag van die Heilige Gees in ons hart nie. Vra Hom vrymoedig vir die volheid van sy Heilige Gees.

GEBED: Here, vandag vra ek U vir die vervulling van u Heilige Gees en ek ontvang dit. – Manie Colyn

Jesus heel die gebroke harte!

Wanneer ‘n goeie mens struikel...


Geen volgeling van Jesus Christus moet dink dat dit vir hom of vir haar onmoontlik is om te struikel en te val nie, selfs so ver dat hulle Christus verloën.
          1 Kor. 10:12 waarsku: “Daarom, wie meen dat hy staan, moet oppas dat hy nie val nie.”
          Petrus had ‘n geleentheid wat nie een van ons ooit kan hê nie, hy het sy aan sy met Jesus gewandel. As iemand soos Petrus tot ‘n val kon kom, wat dan van ons?
          Baie Christene het deur die jare gestruikel. Ander het selfs geval. Sommige gaan darem nog kerk toe, maar is basies geestelik dood. Hulle het gestruikel en het berou getoon en om vergifnis gevra, maar kan nie hulself vergewe nie.
          Ander kere vergewe diesulkes hulself wel, maar dan vergewe die gemeenskap hulle nie.
          Kyk wat doen GOD wanner iemand berou het en sy sonde bely: “Hy sal Hom weer oor ons ontferm, ons ongeregtighede vertree; ja, U sal al hulle sondes in die dieptes van die see werp.” Miga 7:19.
          “So ver as die ooste verwyderd is van die weste, so ver verwyder Hy ons oortredinge van ons.” Ps 103:12.
          “As ons, ons sondes bely, Hy is getrou en regverdig om ons die sondes te vergewe en ons van alle ongeregtigheid te reinig.” 1 Joh 1:9
          As die gemeente of die gemeenskap steeds die sonde van iemand ophaal, dan sondig hulle.
          Sommige meen daar is nie vergifnis vir ‘n Christen wat gestruikel en geval het nie.
          ‘n Spieëlbeeld van die lewe van Petrus gee ons die volgende insigte:

Petrus het gevloek en gesweer dat hy Christus nie ken nie. Dit het hy gedoen nadat:

·       Hy magtig deur God gebruik was;
·       Hy wonderwerke, tekens en wonders aanskou het;
·       Sy naam in die Boek van die Lewe geskrywe was;
·       Hy siekes gesond gemaak en demone uitgedryf het;
·       Hy die Evangelie verkondig en siele vir die Koninkryk ingewin het.

Petrus is in ‘n strik gelei deur twee vroue en ‘n groep ongereddes:

·       Meeste mans se swakheid en val is deur vroue veroorsaak;
·       Baie mans het die HERE verloën omdat hulle nie situasies in hul eie huisgesinne kon hanteer nie;
·       Koning Dawid het geval  en ellende oor miljoene mense gebring, dog hy het ook herstel;
·       Moses het geval en ook herstel;
·       Jona het geval en herstel;
·       Baie jong Christene struikel en val omdat hulle toegee aan die eise van ongereddes.

Sommige mense dink Petrus het gesink toe hy (in eie krag) op die water na Jesus probeer loop het:

·       Hy het bloot begin om te sink en toe na Jesus uitgeroep en toe na die boot teruggeloop;
·       Hy het meer as die ander dissipels gedoen want hulle het nie eers probeer om op die water te loop nie;
·       Hy het ‘n nuwe begin gemaak, homself opgerig en weer probeer;
·       Hy het die aanbreek van ‘n nuwe geestelike dag aanskou na ‘n lang donker nag.

Petrus het ‘n spesiale uitnodiging ontvang, alhoewel hy:

·       Gevloek, gesweer en ontken het dat hy Jesus ken;
·       Hy Jesus drie maal verloën het, en drie maal bely het;
·       Hy Jesus drie maal in die openbaar verloën en drie maal in die openbaar bely het;
·       Sy les geleer het deur ‘n lang donker nag deur te gaan;
·        Die opdrag gegee was om die HERE se skape te laat wei.

Petrus het besef Jesus het steeds vertroue in hom, toe het hy:

·       Homself opgerig en bewys gelewer dat hy ‘n klippie kon wees;
·       Hy het homself vergewe, nadat Christus hom vergewe het;
·       Hy het nie homself aanhou verwyt oor wat gebeur het nie;
·       Hy het die verlede vergeet en hom uitgestrek na wat voor is;
·       Is daarna magtig deur God gebruik om duisende ander te help.

Veronderstel Petrus sou vandag in Kleinmond gelewe het, dan sou mense:

·       Nie weer vertroue in Petrus gehad het nie;
·       Petrus sou nie toegelaat word om weer te preek nie;
·       Hy sou beskinder gewees het;
·       Die media sou hulle in sy val verlustig het;
·       Sy kerk sou hom as predikant geskors het;
·       Baie sou altyd die voorval in herinnering roep;
·       Hulle sou sê hy het toegelaat dat ‘n vrou hom tot ‘n val gebring het;
·       Sommige sou hom uit die gemeenskap weggewens het.

Maar God het steeds vertroue in Petrus gehad.  Deur Petrus se bediening:

·       Word 3 000 siele op een dag gered;
·       ‘n Verlamde man spring op en loop;
·       Die Heilige Gees word uitgestort;
·       Selfs gewone mense kon sien dat God met Petrus wandel.

Petrus is deur die godsdiensleiers opponeer. Hulle:

·       Het hom misverstaan omdat hy nie altyd ortodoks was nie;
·       Het hom bestempel as onkundig en ongeleerd;
·       Het hom vele kere aangekla en verhoor;
·       Hom gewaarsku om nie teen hulle tradisies te gaan nie;
·       Hom selfs gesensor, gegesel en in tronke opgesluit.

Alhoewel Petrus hierdie dinge moes verduur, het:

·       Is hy met die krag van God gesalf  tot diensbaarheid en om ander na Christus te lei;
·       Mense het die strate vol gestaan met siek mense sondat Petrus hulle kon bearbei en genees;
·       Mense het besef al val Petrus se skaduwee net hom hulle genees hulle;
·       Die tekens wat gevolg het, het almal laat besef dat God Petrus vergewe het.

Soos wat Petrus onder die krag van God deur die strate beweeg het:

·       Was die krag van God aanwesig om die mense te genees;
·       Daar was nie eers geleentheid vir mense om oor siektes en pyne te praat nie of te verduidelik nie;
·       Die mense was so veelvuldig in getalle dat Petrus nie eers vir almal die hande kon oplê nie.

Christene wat die HERE Jesus in ons tyd verloën het, het baie maal probeer om na die weë van God terug te keer, maar ons wou hulle nie vergewe nie. Die rede waarom sulke mense graag weer by die HERE wil uitkom, is omdat die Gees van God hulle dring om dit te doen, omdat God hulle vergewe het, omdat God steeds vertroue in hulle het, maar ons het nie.
Wanneer ons na die lewe van Petrus kyk, dan besef ons, as ons berou het en bely, God ons graag terug in die kudde wil hê en ons boonop graag ook magtig wil gebruik.
En aan diegene wat diesulke nie wil vergewe en wil terugneem in die kudde nie, spreek Gal 6: 1 boekdele wanneer hy sê: “Broeders, as ‘n mens ewenwel deur die een of ander misdaad oorval word, moet julle wat geestelik is, so een reg help met die gees van sagmoedigheid, terwyl jy op jouself  let, dat jy nie ook versoek word nie.”
En dan die opdrag in strofe 7: “Dra mekaar se laste en vervul so die wet van Christus, want as iemand meen dat hy iets is, terwyl hy niks is nie, mislei hy homself, maar laat elkeen sy werk op die proef stel; en dan sal hy grond van roem hê alleen wat homself betref en nie wat die ander een betref nie.”
En, na alles, is dit vir ons ook moontlik om daagliks geestelik saam met Jesus te wandel.
Onthou, God wil van die klippies rotse maak!
    En jy gevallene, staan op, God wag vir jou!  Hy sê vir jou soos Hy ook vir Jeshua in Sag. 3: 1,3,4 gesê het:  “Ek wil jou oortredinge vergewe en Ek gaan vir jou skoon klere aantrek! – Sjibbolet