My gestremde dogter, my geskenk van God

Goeie Dag... vandag wil ek skryf oor myself en hoe God elke slegte situasie ten goede kan verander. Chene my dogter het met geboorte breinskade opgedoen en ek kon die seer daarvan vir jare nie verwerk nie. Sy is amper 16 en vandag wil ek vir julle se sy is die grootste geskenk wat ek ooit kon kry. God het haar nie gestremdheid nie veroorsaak nie, die dr het....maar God het deur haar vir my gewys dat Hy God is!

Op die ouderdom van 1jr het medici gese sy sal nie loop nie, nie self kan eet of sit nie, sekere kos teksture nie kan sluk nie, nooit praat nie, nooit van doeke af wees nie en nog n lys verder. Sy het wat hul noem mixed muscle tone. Haar spiere trek te styf en verslap te veel.

Na die diagnose het ek vir 3dae myself en haar in die kamer toegesluit... al wat ek kon doen was huil en bid!! Was ek kwaad vir God? Baie beslis! Ek het met Hom baklei, Sy Woord teen Hom gebruik! Hom gevra waar is Sy beskerming? Waar was Hy toe sy gebore is? Hy is haar Skepper wat is Sy plan met haar lewe?

Vandag as ek terug kyk sien ek al my antwoorde... syt begin sit op 15mnde, geloop op 18 mnde, sy kan enige iets eet en haarself voer, sy kan nie net haar glas vashou nie maar ook haar eie koeldrank of melk ingooi, sy het n paar woorde wat sy perfek kan sê.

Hoekom deel ek dit vandag? Want ek wil getuig van iets dieper as wat die oog kan sien! Menslikheid en liefde!!

Kom ek vertel julle wie het God vir my gegee!

Chene is baie na aan my en tel my gemoed baie vinnig op. As ek kwaad is sê sy "shuut" en wys met haar hande soos jy vir iemand sal sê kalmeer, as ek huil sit sy haar armpies om my nek en druk haar kop teen my skouer asof sy se "dit sal okay wees", as ek siek is bring sy vir my water, asof dit my aan die lewe sal hou, en voel sy my voorkop om te voel of ek koors het, as ek slaap en sy sien die kombers is nie op my nie, maak sy my toe. As ek lag, lag sy saam, as ek bid maak sy die deur vir my toe, as ek stil is gee sy my n drukkie of kielie my dat ek moet lag.

Maar behalwe vir haar menslikheid is haar liefde onbeskryflik! Sy vra niks...sy gee!! God het Sy liefde aan my geopenbaar deur n kind wat in dade vir jou wys wat liefde en omgee is..."lief vir jou" het nog nooit oor haar lippe gekom nie, maar kom elke dag deur haar optrede! Dit is liefde onbeskryflik groot! Dit is God se liefde! Die liefde wat Hy nie vir ons elke dag hoorbaar sê nie maar vir ons wys! Deur haar voel ek elke dag Sy onbeskryflike groot liefde vir ons en kan ek Hom net terug liefhê en sê dankie dat ek nou eers verstaan waar Hy was met haar geboorte en wat haar doel op aarde is!

Ek glo al vir baie jare Jesus gaan haar ten volle genees tot eer en verheerliking van Hom. Mag Chene in en deur Hom verheerlik word wanneer Sy tyd reg is!

Dankie Vader dat U, U liefde vir my gegee het deur haar.

Wees geseend
Belinda

Die Begin!

Gen 1:1  "In die begin het God die hemel en die aarde geskape."

Hier aan die begin van die wêreldse jaar het ons dalk net nodig om ook weer kennis te neem van die begin van die Bybel.

Baie mense, insluitende Christene verstaan nie altyd hoe ‘n uiters belangrike vers hierdie is nie. Hoekom? Want satan weet as hy die mensdom kan kry om te twyfel aan hierdie vers, kan hy hulle kry om te twyfel aan die res van die Woord. En juis daarom word daar selfs in sommige kweekskole vir die studente geleer dat die boek van Genesis bloot ‘n “sameflansing” is van verskeie ander kulture se oer-ontstaansverhale en dat dit nie ‘n werklike geskiedkundige boek is nie.

Want as mens nie kan glo dat dit GOD is wat aan die begin die hemel en die aarde geskape het nie, hoekom sal ons glo wat Johannes 14:6 bepaal oor Jesus as die ENIGSTE weg na die Vader toe?

As ons nie Genesis 1:1 kan glo net soos hy daar staan nie, hoe kan ons glo dat 1 Johannes 5:7 waar is waar dit bepaal dat ons God ‘n Drie-Eenheid is? As ons nie Genesis 1:1 kan glo nie, hoekom sal ons glo dat ons moet klaarmaak met ons sondes? As ons nie Genesis 1:1 kan glo nie, waarom sal ons glo dat Jesus Christus enigsens bestaan het, aan ‘n kruis gesterf het, opgestaan het uit die dode en gaan sit het aan die regterhand van die Vader?

As ons nie Genesis 1:1 kan glo nie, waarom sal ons glo dat God getrou is aan Sy beloftes volgens Psalm 91 om ons deur die komende jaar te dra en te beskerm teen enige aanvalle of gevare?

En as ons nie Genesis 1:1 kan glo nie, waarom sal ons Openbaring 19:11 glo dat Jesus sal terugkeer uit die hemel uit, of waarom sal ons Openbaring 21 glo oor die nuwe hemel, die nuwe aarde, die nuwe Jerusalem, en die ewige heerlikheid saam met God?

Geliefde in die Here, maak seker dat jy in jou hart VERSEKERD is dat dit GOD is wat in die begin die hemel en die aarde geskape het, want as jy nie verseker is daarvan nie, gaan satan toelaat dat twyfel en ongeloof oor die res van die Woord, en enige beloftes van God, jou hierdie jaar gaan laat wegkwyn in jou geloof, want hy sal graag wil hê dat jy heeltemal moet wegval van God af. Moenie dit toelaat nie.


Gebed:

"Vader, ek kom nie U in die Naam van U Seun, Jesus Christus. Ek vra dat U my sal vergewe waar ek my in die verlede verlaat het op die opinie van enige ander mense oor die korrektheid en waarheid van Genesis 1:1. Leer my asseblief om in hierdie nuwe jaar U Woord as waarheid te aanvaar, te ervaar en toe te pas in my hele lewe, en om gehoorsaam te lewe aan elkeen van U opdragte. Sodat U daardeur verheerlik kan word in my lewe. In Jesus Naam. Amen."

 (tiaan gildenhuys - tg@oicb.co.za)
Geplaas met toestemming van Tiaan Gildenhuys